Soosa zu yela 10

1Niŋi n na, ma nye malakitintaa yi saazu sigira tiŋŋa, ka o ba sagbaŋŋu puwa, ka sasuu ba o zu see, ka o nufusee ŋmaani wuluŋu, ka o noba ŋmaani bugum, 2ka o mari gbaŋbila n yoo n ba o nuu niŋi. Niŋi n na, o naag o nudii nobiri zaali teeku puwa, ka naag o nuzaa nobiri zaali tiŋŋa, 3ka tasi maa zuborigudaana. O n tasi maa, saa tasi buyapoin. 4Saa maa n tasi n baasi, ma ya n sebi, ka wumi goo, a yi saazu n yetira, Yaseesi saa n tasi n yeli maa, naag a sogi, ka da sebi a digili. 5Niŋi n na, malaki la n za tiŋŋa, a ni teeku puu la naag o nuu du saa, 6ka pe Naawunni, so n ba niŋi, a wara saŋa ni saŋa zaa, ka daa n maali saazu ni tiŋŋa ni teeku ni binseesi zaa n ba a puu la, a maa Naawunni ki lee n yuu, 7ama dindaso malakisi ayapoindaana la n ti pemsi o kabilli, Naawunni ni ti yaseesi n sogi, ka o daa n naag a wusi o chaamesi la a niŋi. 8Ka goo maa ni wumi saazu la lee n maali n togsi m saani, a yeli, Malaki la n za teeku puwa, a ni tiŋŋa la, wa ti dee gbaŋŋu maa n yoo n ba o nuu puu la. 9Niŋi n na, ma we, a wa ti yeli u, ni o naa gbaŋŋu maa ti ma. O yeli ma, Deeg u ŋobi. E naŋgbanni o meesa maa siiri, ama e puu niŋi o ni ba toom. 10Niŋi n na, ma dee gbaŋbila maa, a yi o nuu niŋi, a ŋobi. O meesa naŋgbanni, a maa siiri, ka m puu niŋi o ba toom. 11Ka ba yeli ma, ni m lee n yeli yaseesi n ya n niŋi, a yi baligusi ni nadima saani.

will be added

X\