1 Yaseesi n ya n niŋi, seesi Naawunni n daa n ti Yeesu Kristu, o ti wusira o tumtuminiba, ka wune Yeesu tumi o malaki gaari Jon saani, 2 ka Jon yeli yaso zaa o n nye. A niŋini yaseesi Naawunni n yeli, ka Yeesu Kristu niŋi a dansiya. 3 So n karimina yela ŋa, niriba wumina, o ni nye barika. Ka seesi n wumi a, ka deeg a di, ni nye barika. A kpali bo, jemani maa paagira. 4 Mani Jon puusira ya chaachisi ayapoin n ba Asiya paaligu puwa. Naawunni ni o siisi ayapoin ni Yeesu Kristu ti ya barika, a ni niŋgbirimaasim. Kusu zaa wune Naawunni daa n ba niŋi, ka na ba niŋi, ka ni ba niŋi saŋa ni saŋa zaa, ka o siisi ayapoin maa ba o naalim niŋi, ka Yeesu Kristu niŋi o dansiya, a togsira yamonsi, ka piili n nyisigi kum puwa, ka niŋi durinye nadima naaba. Wune Yeesu so n kpabira ti, ka naag o zeem moligi ti, a yi ti yabeeri niŋi, 6 ka ti ti loobi nadima, a tumina o ba Naawunni la, Naawunni o ti o yuuri o du, a ni daama ga, saŋa ni saŋa zaa. Aami. 7 Ya nyaasi, Yeesu ni lee n yi sagbana puu ta, so zaa nufu o nye u, halli seesi n ku u gba. Ka durinye ŋa baligusi zaa ni kumi, a kpali o zu. Yamonsi n na. 8 Ti duuma Naawunni kpeeŋu daana, so kusu zaa n daa n ba niŋi, ka na ba niŋi, ka ni ba niŋi saŋa ni saŋa zaa la yeli, ni wune n niŋi piiligu ni baasigu. 9 A kpali Yeesu zu m ni ya zaa nyaara nam, ka ba o naalim puwa, ka mari kenyiti. Dindaso, a kpali mani Jon ya todaana daa n wusira Naawun yela, a ni Yeesu baarusuma la zu, ba daa n gbaa ma gaari paaliguso ba n boona Patimo la, ka teeku koom poli n jili u, m da lee n wusira n ŋa. 10 O dindaso, ti duuma daborigu, Naawun sii gbaa ma, ka a yi m nyaaŋa ma wumi gokarigu, a maa kabilli, 11 o yeli, Seema e ni nye, sebi n digili gbaŋŋu niŋi, ka naa n tolimi chaachisi ayapoin, a yi tiŋseesi ba n boona Afesu, a ni Simaana, a ni Paagama, a ni Tayataara, a ni Saadi, a ni Filadelifiya, a ni Loodisiya la puwa. 12 Ni wumi n ŋa, ma loobi n nyaasi goo maa n togsira m saani la, ka nye suga bini ayapoin, seela ba n zaana katula, 13 ka a sunsuu niŋi niso n ŋmaani Naawun nisaala ba niŋi, ka o pili kpariwogili, ka sugasi mii kirisi o nyaari, 14 ka o zu ni zoba zaa peligi maa gumini, koo sakuga, ka o nufu ŋmaani bugum zulima, 15 ka o nopana nyagsira maa kutiri ba n naa n niŋi bugum niŋi, ka bilimi, ka o goo ŋmaani koom n paali n zora, 16 ka o mari ŋmeribiisi ayapoin, a yi o nudii niŋi, ka sukarigu kagi o naŋgbanni, o lugima ayi zaa pegi, ka o nufusee nyagsira maa wuluŋu. 17 Ni nye u, ma li o noba niŋi, a maa ni kpi la, ka o naag o nudii pa ma, ka yeli, Da zora dabeem, mani n niŋi piiligu ni baasigu, 18 ka daa n kpi, ka mari nyevuri, a wara saŋa ni saŋa zaa, ka mi mari daama m moligi niriba, a yi kum ni bugum ziya, koo, a zagsi moligirisim maa. 19 Pimpariŋa sebi yaseesi e n nye la, a ni yaseesi n niŋi, a ni yaseesi n ya n niŋi. 20 ?meribiseesi e n nye, a yi m nudii puu la niŋini chaachisi ayapoin maa malakisi, ka suga bini ayapoin, seela ba n zaana katula la niŋini chaachisi ayapoin maa gbagba.
