Filipai 3

1M taaba, ya ti ya puusi a peligi, a kpali ti duuma zu. Halli ka m lee n sebi yela tira ya, a bi ti ma beligira, ka mari tono, a yi ya saani. 2Ya dasi yabeniŋiniba, ba niŋini maa baasi, ka kpabira so zaa ba ŋma yoya. 3Ama ti seesi n naa Naawun sii kpeesira u, ka ti Yeesu Kristu yuuri o du, ka baŋŋi maa yoya ŋmaabu ki tee n moligi ti, tirima n niŋi Naawun niriba. 4Ya nyaasi, ka so zaa ni tee n nye tono, a yi o niŋa niŋi, mani ni tee n nye tono gaari u. 5A kpali bo, m daba anii daari ba daa n ŋma n yoori, ka m yaadima niŋi Yakubu ni o bii Benjami, a zu, m ni m niriba niŋi Juusi dima, ka m daa n paara Juusi dima zaaligusi zu maa Farisii daba, 6ka bi niŋi a je. Ka a kpali lala zu ma daa n namsira chaachi dima ga. 7M daa n feera maa, yela ŋa mari tono ga, ama pimpariŋa, a kpali Kristu zu, m pa baŋiya maa, a ka tono zaa. 8Yamonsi n na, a yi m saani, bunso zaa ka tono, ka pa m duuma Yeesu Kristu baŋinisim n mari tono gaa ga. A kpali o zu, m zagsini a zaa tono, a maa sagiri, Yeesu Kristu o ti niŋi m tono, 9m loobi o toori, a niŋi nivusuŋŋu, a maa seesi Naawunni n boona nivusuma la. Pa a kpali zaaligusi zu ma loobi nivusuŋŋu, ama m niŋina Kristu yeride, 10m ti baŋŋi u, ka nye daamaso o n nyisigi kum puu nye la, a ni namseesi o n daa n nyaara durinye puu la, halli o kum nam maa, 11m gba m ti nyisigi kum puwa. 12M na bi nye yela ŋa zaa, ka na bi loobi nivusuŋŋu la baasi, ka ma moo nufu m ti nye a zaa, a kpali bo, Yeesu Kristu naa ma loobi o toori. 13M taaba, m na bi nye a zaa. Yaseesi ni sali n nye bi tiri ma, ama soosa zu koluŋko. 14A zu n na, ma moo nufu tumina Naawunni, m ti paa baasigu, Naawunni o ti ma barika, Yeesu Kristu booli ma m gaari Alizaana. 15A zu, ti seesi n mari yam, cheli ti kpabira n ŋa, ama ka ya kpabira yaseesi paasi, Naawunni ni wusi ya, ni ya kpabira a. 16Ama yaseesi ti n baŋŋi maa a veela, cheli ti niŋina a. 17M taaba, ya pontira ma, ka mi pontira so zaa n niŋina seema ti n niŋina. 18Ya nyaasi, m daa n yi yetira ya ni, ka kpari n yetira ya, a ni sufusaaŋu ga, ni nivudamta ba niŋi, a niŋi Yeesu Kristu kum yela dindima. 19Ba mi niŋi bindira kpabiriba, ka naa ba yabeeri loobi poomini, ka kpabira durinye yela, ama ba baasigu ni niŋi ba saaminisim. 20Ama ti wune zii n niŋi Alizaana, ka ti gutira ti duuma Yeesu Kristu, o ti yi nisaaniŋi, a moligi ti, 21ka naag o daama, so n tee n nyaŋŋi bunso zaa la cherigi ti durinye niŋasi ŋa, a loobi maa o gbagba daama niŋa.

will be added

X\