Matiyu 7

1Ya da choomina taaba, ka Naawunni o da choomina ya. 2A kpali bo, seema ya gba n choomina taaba, Naawunni gba ni choomi ya, ka seema ya n bugsira, Naawunni gba ni bugsi lala ti ya. 3Ya nyaasi, nira ni nye dabila n ba o todaana nufu, ka ki nye dakarigu n ba o gbagba nufu. 4A koo, o ni yeli o todaana la, ni o nyisi dabila maa, a yi o nufu, ka dakarigu maa na ba o gbagba nufu. 5E yomsira, nyisi dakarigu maa, a yi e gbagba nufu, ka tee n nye nene, a nyisi dabila maa, a yi e todaana la nufu. 6Ya nyaasi, ya da naa bunsuma tira baasi, a kpali bo, a ni loobi n gbaa ya, ka da naa kugsuma lobi pireekusi, a kpali bo, a ni chaŋŋi a niŋi. 7Ya lee n nyaasi, ka ya suusira, ya ni nye, ya kpabira, ya ni nye, ya kpaasira, o ni yoo. 8A kpali bo, niso zaa n suusira ni nye, so n kpabira ni nye, so n kpaasira o ni yoo. 9Ya nye, ka so zaa mari biya, ka bii maa yeli u, ni o kpabira paanu, o ki ti u kugiri. 10Koo, o kpabira koroto, o ki ti u waafu. 11A zu, ya wune yabeniŋiniba, ka ya naa bunsuma tira ya biisi, ya ba Naawunni n ba Alizaana puu la gba ni naa bunsuma, a gaari n ŋa, a tira seesi n suusira u. 12A zu, seema zaa ya n kpabira niriba ba niŋi n tira ya, ya gba ya niŋi lala tira ba. Naawun zaaligusi, a ni yaseesi Naawun chaamesi n daa n yeli maa, a gbinni n na la. 13Ya nyaasi, begusi ayi ba niŋi, binyeliŋu, a ni bummootoo. Beguyeliŋu maa kpeebu ni o soori paabu ka toom, a wara bugum ziya, ka nivudamta kpeera nisaaniŋi. Ama ya wune, ya niŋi aniya kpe begumootoo maa. 14O kpeebu ni o soori paabu ba toom, a wara nyevuri ziya, ka seesi n kpeera nisaaniŋi mi bi zoo. 15Ya dasi seesi n ŋma jiri yetira, ni ba niŋini Naawun chaamesi, ba niŋini maa buŋkobeeri n pili peeri gbana yomsira niriba. 16Ama ya ni baŋŋi ba, a kpali ba yaniŋisa zu. Lala n na, ba bi poora gaasi, koo maŋgusi, a yi goosi niŋi. 17Tisuma zaa wanna walisuma, ka tibeeri zaa mi wanna walibeeri. 18Tisuŋŋu ki tee n wali walibeeri, ka tibeeri mi ki tee n wali walisuma. 19A zu, ka tii zaa n bi wanna walisuma, ba ŋma u lobi, a naa n niŋi bugum. 20Lala n na, ya ni baŋŋi nivubeeri, a kpali ba yaniŋisa zu. 21Ya nyaasi, pa seesi zaa n boona ma duuma duuma la ni kpe Naawun naalim puwa, ama seesi n niŋina m ba Naawunni n ba Alizaana puu la kiperi. 22A zu, seriya diibu daari ti paa, nivudamta ni yeli ma, Duuma, duuma, ti daa n wusira ya yela, ka naag e yuuri katira kikpaarigusi, ka niŋi yatintaasi ga, a yi e yuuri niŋi, 23ka m yeli ba, Ya yabeniŋiniba, m na bi baŋŋi ya zaa, ya wara. 24So zaa n wumi m wusigu, ka niŋina a, o niŋini maa yambaŋina n me o dii zaali kugiri zu, 25ka saa ta ga, koom paali n poli n jili u, ka sauwa vaara ga, ama dii maa bi li, a kpali o n za kugiri zu la. 26Ama so zaa n wumi m wusigu, ka bi niŋina a, o niŋini maa zoliga n me o dii zaali tambisigu niŋi, 27ka saa ta ga, koom paali n poli n jili u, ka sauwa vaara ga, ka dii maa zaa nyam li. 28Yeesu n daa n togsi yela ŋa zaa baasi, a ku zamu maa noori, 29a kpali bo, o wusira maa niso n mari daama ga, pa seema ba zaaliguwusiriba n wusira la.

will be added

X\