Matiyu 6

1Ya da niŋina ya yasuma, niriba ba nyaara a, a kpali bo, ka ya niŋina n ŋa, ya ba Naawunni n ba Alizaana puu la ki ti ya laada. 2A zu, ka niso ti nandaana bunso, o da pemsi kabilli, a maa seema yomsiriba n niŋina, a yi laŋsigu diisi ni soya puusi, niriba ba kpeesira ba. Yamonsi n na, ba nyeni ba laada. 3A zu, ka ya luŋko zaa tira nandaana buŋ, o da ti o nuzaa baŋŋi bunso o nudii n niŋina. 4Lala n na, o ni sogi n ti buŋ maa, ama o ba Naawunni ni nye, ka ti u laada. 5Ya nyaasi, ka ya togsira Naawun saani, ya da za laŋsigu diisi puusi, koo sochagsi, a maa seema yomsiriba n togsira, niriba ba nyaara ba. Yamonsi n na ma yeli ya, ba nyeni ba laada. 6A zu, ka nira ya n togsi ti ba Naawunni saani, o ko o wa ti kpe o dii, ka yo dinoori maa, ka togsira Naawunni ba n bi nyaara la saani, ka wune ni baŋŋi yaseesi o n sogi n togsira la, ka ti u laada. 7Ya lee n nyaasi, ka ya togsira Naawun saani, ya da kaana yadamta, a maa baligusi. Barima n feera maa, ba yadamta maa ni taasi Naawunni o wumi ba yela. 8Ya da niŋina n ŋa, a kpali bo, ya ba Naawunni baŋŋi yaseesi ya n kpabira, poin ka ya suusi u. 9A zu, ka ya togsira Naawun saani ya togsira n ŋa, Ti ba Naawunni n ba Alizaana puwa, ti kpabira e yuuri du, 10ka e naalim o ta, niriba ba niŋina e kiperi, a yi durinye ŋa puwa, a maa seema ba n niŋina a, a yi Alizaana puu la. 11Taaru zaa tira ti ti bindira, 12ka che ti yabeeri paŋŋi ti, a maa seema ti gba n che yabeeri, a paŋina ti taaba, 13ka da ti Sitaana daama o yomsira ti, ka e moligi ti, a yi yabeeri niŋi. 14Ya nyaasi, ka ya che niseesi n niŋina ya yabeeri paŋina ba, ya ba Naawunni gba ni che ya yabeeri paŋina ya. 15Ama ka ya zagsi, ka bi che ba yabeeri paŋina ba, ya ba Naawunni gba ki che ya yabeeri paŋina ya. 16Ya lee n nyaasi, ka ya leera noori, ya da gbaa ya maŋŋa, a maa yomsiriba n niŋina seema la. Barima n yi saamina ba nufusee, niriba ba baŋŋi maa, ba leera noori. Yamonsi n na, ma yeli ya, ba nyeni ba laada. 17Ama ya so zaa n leera noori, o maali o zukoba, ka pegi o nufusee. 18Lala n na niriba ki baŋŋi maa, o leera noori, ama o ba Naawunni so ba n bi nyaara, ka o baŋŋi binseesi ba n sogi n niŋina la wune ni nye u, ka ti u laada. 19Ya da zaana bindaalim bini, a yi durinye ŋa puwa, a kpali bo, paandachirigusi ni ŋobi a, koo, a zaasi, koo, tayugsi ba kpe n zu a. 20Ama ya zaana bindaalim bini, a yi Alizaana. Nisaaniŋi paandachirigusi bi ŋobira bini, ka bini mi bi zaasira, ka tayugsi gba bi kpe n zuura. 21Ya nyaasi, seela nira bindaalim bini n be, nisaaniŋi n na o feri gba be. 22Ya nyaasi, nufu niŋini maa niŋa katulli, a kpali bo, ka so nufu veela, o nyaara paaligu. 23Ama ka o nufu saamiya, ligu ko n ba niŋi. Lala n na, ka o bi nyaara, ligu ko n ba niŋi. 24Ya nyaasi, tumtumina ki tee n tumi yidaandima bayi. Ka o ya n niŋi lala, o ni kpabira yinni, ka chisi yinni, koo, o ni tumina yindaana, ka zagsira yindaana. Lala n na, ya ki tee n tumi Naawunni, ka kpabira ligiri. 25A zu, m yeli ya ni, ya da ti bunso ya n di n di, koo, a ŋu, koo ya bimpinna yela tiri ya, a yi nyevuya puwa. A kpali bo, nyevuri gaari bindira, ka niŋa mi gaari bimpinna. 26Ya nyaasi niinsi, a bi butira, a bi cheera, a bi mari seela zaa a n zaana bindira, ka ya ba Naawunni tira a bindira. A zu, o ni tira ya bindira, a kpali bo yarima n gaari niinsi. 27Ya nyaasi, halli nyevuri yela tiri ya ga, ya ki tee n nye nyevuri beela paasi. 28Ya da ti ya bimpinna yela tiri ya, ama ya nyaasi puuma, seema a n karigira. A bi koora, a bi miira, 29ka ma mi yeli ya, naaba Sulimaana, a ni o bimpinsuma daa n bi paag a veelim. 30Ya lee n nyaasi moori. Naawunni tira a veelim, a ba niŋi zinni, ka soosa ba naag a niŋi bugum niŋi. A zu, ya yeridekoŋiniba, o ki naa bimpinna ti ya, a gaari a? 31A zu, ya da ti yela ŋa zaa tiri ya, halli bindira nyaabu, koo buŋŋuura, koo bimpinna. 32Yela ŋa zaa kpabirisim tirini baligusi, ka ya ba Naawunni baŋŋi ya n kpabira a. 33Ama ya wune ya kpabira Naawun naalim, a ni o yasuma, ka o naa yela ŋa zaa ti ya paasi. 34A zu, ya yi feera zinaa yela, ka da ti soosa yela tiri ya, ka Naawunni o nyaasi soosa yela tira ya.

will be added

X\