Matiyu 5

1Yeesu n daa n ti nye zamusi maa, o du zoo wa ti zi, ka o nyaaŋpaariba ta o saani, 2ka o wusi ba, a yeli, 3Seesi n baŋŋi maa, ba ka daama, a yi Naawun saani, ba puusi a peligi, a kpali bo, Naawunni niŋi ba naaba. 4Seesi n kumina, ba puusi a peligi, a kpali bo, ba ni nye meesim. 5Seesi n ba boin, ba puusi a peligi, a kpali bo, ba ni kpe o naalim niŋi. 6Seesi n kpabira ba niŋina Naawun kiperi ko, ba puusi a peligi, a kpali bo, Naawunni ni ti ba niŋi n ŋa. 7Nimbazoriba, ba puusi a peligi, a kpali bo, Naawunni ni zo ba nimbaa. 8Seesi n mari sufuluŋko, a kpabira yasuma, ba puusi a peligi, a kpali bo, ba ni nye Naawunni. 9Seesi n taasira niŋgbirimaasim, ba puusi a peligi, a kpali bo, ba ni booli ba Naawun biisi. 10Seesi n niŋina Naawun kiperi, a nyaara namsigu, ba puusi a peligi, a kpali bo, Naawunni niŋi ba naaba. 11Yarima, ka niriba tuura ya, ka namsira ya ga, ka paara ya jiri, a kpali m zu, 12ya ti ya puusi a peligi ga, a kpali bo, ya sanyoobu zooya ga, a yi Alizaana. Lala n na ba daa n namsira Naawun chaamesi kusu zaa la. 13Yarima n niŋi maa durinye puu yaarim, ama ka yaarim ti borigi a meesim, a ki lee n tee n nye a meesim maa, ka bi lee n mari tono zaa, ba naag a basi, ka chaŋina a niŋi. 14Yarima n lee n niŋi maa durinye ŋa puu paaligu, a ti niriba nyaara. Ya nyaasi, tiŋso n ba zoo zu ki tee n sogi. 15Koo, niriba bi kusira katula naa n sogira, ka pa ba naa n tomi seela o n di n niŋi paaligu yi dii maa zaa. 16Lala n na, ya niŋina aniya, a maa ya n tira paaligu, niriba ba nye ya yasuma, ka kpeesira ya ba Naawunni n ba Alizaana puwa. 17Ya da feera maa, m tani m ti cherigi Naawun zaaligusi, a ni yaseesi Naawun chaamesi n daa n yeli maa, ama m tani a zaa a ti loobi yamonsi. 18Ya nyaasi, Naawun zaaligusi bimbila gba ka cherigirisim, ama tiŋŋa ni saazu ni yela zaa baasini. 19A zu, so zaa n zagsira zaaligusi maa bimbila zaa, ka mi wusira niriba ba da paara a, o yuuri ni sigi n gaari niriba zaa, a yi Naawun naalim puwa. Ama ka so zaa paara a zu, ka mi wusira niriba lala, o yuuri ni du, a yi Naawun naalim puwa. 20Yamonsi n na, ka ya bi paara Naawun zu nene, a gaari zaaliguwusiriba ni Farisii dabsi, ya ki tee n kpe Naawun naalim puu zaa. 21Ya baŋŋi maa, ba daa n yeli kusu zaa, ni nira o da ku o todaana, ka so zaa yi ku o todaana, ba ku o gba. 22Ama m mi yeli ya, ka so zaa n je suuri niŋi o todaana, koo, a booli u zoliga, yela ŋa ni tee n ti ba di o seriya, o gaari bugum ziya. 23A zu, ka e ya n ku buŋkobiri ti Naawunni, ka teesi maa, e niŋi e todaana yabee, 24cheli buŋkobiri maa nisaaniŋi, ka wa ti kpabi e todaana maa, ya niŋi naŋgbanluŋko, ka pa wa ti ku buŋ maa ti Naawunni. 25Ya nyaasi, ka nira ya n weni, a wa ti sami i, niŋi aniya maag o suuri, ba da di e seriya, ka yo i dii. 26Yamonsi n na, ka ba yo i dii, e ki lee n yi, ama e yoni samini maa zaa nyam. 27Ya baŋŋi ba n daa n yeli, ni niso o da do o todaana poga saani, 28ama m mi yeli ya, ka niso nye poga, ka kpabira o do o saani, o sali n niŋi yabeeri, a yi o sufu niŋi. 29A zu, ka e nimbiri taasi e niŋina yabeeri, nyisi u basi. A kpali bo, ka e basi e niŋa wulli, ka kpe Alizaana, lala n so e n mari e niŋa zaa, ka kpe bugum ziya. 30Lala n na, ka e nudii taasi e niŋina yabeeri, ŋma u basi. A kpali bo, ka e basi e niŋa wulli, ka kpe Alizaana, lala so e n mari e niŋa zaa, ka kpe bugum ziya. 31Kusu zaa ba daa n yeli, ka so n kari o poga, o sebi n ti u, ni o kari u ni. 32Ama m mi yeli ya, ka so n kari o poga, ka poga maa na bi saami o dii, o ni taasi o niŋi yabee, a do dabyindaana saani. Ka dabso n lee n naag u maa mi niŋi yabee. 33Ya lee n nyaasi, ya baŋŋi ba n daa n yeli kusu zaa, ni ka niso pe Naawunni ti noori, o da zagsi o noori maa nyisigu. 34Ama m mi yeli ya, ka so zaa ya n ti noori, o da pe bunso zaa, halli Alizaana, a kpali Naawun naalim zii n na, 35koo durinye, a kpali Naawun noba zaa zii n na, koo Jiruusilim, a kpali nakarigu maa tiŋŋa n na, 36koo o gba zu, a kpali bo, o ki tee n cherigi o zukobiluŋko zaa n niŋi binsobili o loobi bimpeeli. 37Ama o yeli, Oo, koo, M-m, ka da naa n paasira, a kpali bo, yaso zaa o n naa n paasi niŋini yabeeri. 38Ya lee n nyaasi, ya baŋŋi kusu zaa ba n daa n yeli, ni ka niso saami o todaana nimbiri, koo, a va o nyinni, ba saami o gba toori. 39Ka pimpariŋa m yeli ya, ka niso niŋi i yabee, da niŋi u yabee. A zu, ka niso lobi i e nudii nimpegu, loobi nimpegso n che, a paasi u. 40Koo, o ya n sami i, a naag e kpariga, naag e tagite paasi u. 41Koo, o bobi i, e zi o ziiri chaŋŋi mayiluŋko, e chaŋŋi mayilsi ayi. 42Naa n ti niso n suusira i, ka da moŋŋi so n ya n paŋŋi e saani. 43Ya lee n nyaasi, ya baŋŋi kusu zaa ba n daa n yeli, ni niso zaa o kpabira o todaana, ka chisira o dimma. 44Ama m mi yeli ya, ya kpabira ya dindima, ka suusi Naawunni tira seesi n namsira ya. 45N ŋa n na ya ni niŋi maa e ba Naawunni n ba Alizaana puu la n niŋina, a kpali bo, o yi tini wuluŋu biigira nivubeeri ni nivusuma zaa, ka lee n ti saa chena nivusuma ni nivubeeri zaa saani. 46Ya nyaasi, ka ya kpabira seesi n kpabira ya, bo tono n na ya ya n nye? Ka seŋ. A kpali bo, lampoo deegiriba gba niŋina lala. 47Koo, ka ya puusira ya niriba ko, ya bi niŋina yasuma gaari niriba zaa, a kpali bo, baligusi gba niŋina n ŋa. 48Ka ya wune, ya niŋina yasuma, a maa ya ba Naawunni gba n niŋina seema la.

will be added

X\