1 A n lee n ti niŋi yuma seem, dabyindaana ba n boona Jon Baatisi daa n yi n we dalimpii so n ba Judiya paaligu puwa, a wa ti wusira niriba, 2 ni ba dee ba saamiya, a kpali Naawun naalim ya n tani. 3 Dabaa yela n na Naawun chaame Azaya daa n yeli kusu zaa la, ni niso ni ba dalimpii paaligu, a tasi n yetira, Ya niŋi siriya, ti duuma o ta, ka maali o soya, a tooli. 4 Daba maa bimpinna, nyogimasi koba ba naa n wogi a, ka o yi naa gbandeerigu kirisi o see. Ka o bindira mi niŋi lutiya ni sikpaam. 5 A jemani maa, niriba yi Jiruusilim, a ni Judiya paaligu zaa, a ni mogiso ba n boona Jooda la paaligu, a wara o saani, 6 a wa ti deegira n saamiya, ka o su ba koom, a yi mogiri maa puwa. 7 Ama Farisii dabsi ni Sajusii dabsi nivudamta n ti kpabira koom suubu, o yeli ba, Yarima n niŋi maa waagi. Seema ya n kpabira ya zo, a yi Naawun tubiri darigirisim, lala veela? 8 Ya wa ti niŋina yasuma, niriba ba baŋŋi maa, ya dee ya saamiya, 9 ka da fe maa, a kpali Ibrahim n niŋi ya yaaba zu, ya ni zo, a yi tubiri darigirisim maa puwa. Ya nyaasi kuga ŋa, ka Naawunni kpabira, o ni tee n naag a loobi Ibrahim yaŋsi. 10 Ya lee n nyaasi, ba niŋini kikpaŋfu siriya, ba naa n ŋma tiso zaa n bi wanna walisuma, a naa n niŋi bugum o di. Ba ni niŋi niriba seema ba n ya n niŋi tiisi maa. 11 Ka o lee n yeli ba, Mani suura ya koom, a kpali ya n dee ya saamiya. Ama yindaana kpari n chena, ka mari daama gaari ma, m mi bi daga m naag o sabtaasi, ka wune ni ti ya Naawun siya, koo bugum. 12 O niŋini siriya, a maa o yeeli chi, a naa n niŋi kiŋkana puwa, ka wura maa, o niŋi bugum niŋi, bugum maa mi ka kpisigu. 13 A jemani maa Yeesu daa n yi Galili paaligu, a ta Jon saani, a yi mogiso ba n boona Jooda la puwa, Jon o ti su u koom, 14 ka Jon ya n zagsi, a yeli, O daga e ni su ma koom, ama e ta m saani m ti su i koom. 15 Yeesu yeli u, Cheli a niŋi lala pimpariŋa, ti ti niŋi seema Naawunni n kpabira. O n yeli lala maa, Jon sagi, ka su u koom. 16 O n si n su u baasi, Yeesu yi koom maa niŋi, ka saazu yoo, o nye Naawun sii n sigira ŋmaani kili, a ti dobi o niŋi. 17 Ka goo yi saazu, a yeli, M bikpabirigu n na la, o peri ma ga.
