Matiyu 27

1Bee n daa n chee, buŋkobkuuriba kpemba zaa ni tiŋŋa maa kpemba sari, ka togsi seema ba n di n niŋi n ku Yeesu, 2ka le u gaari gomina so ba n boona Pailati la saani. 3Juudasi so n koosi Yeesu la n daa n ti nye, ba n ya n ku Yeesu, o sufu saami, o lee n naa ligiri maa wa ti ti buŋkobkuuriba zudaandima maa ni tiŋŋa maa kpemba, 4a yeli, M niŋi yabee, a ti ba ya n ku so n bi niŋi yabee zaa. Ba yeli u, A bi lee n niŋi ti yela, e yela n na. 5Juudasi naa ligiri maa basi Naawun dii laanta, ka yi, a wa ti yagili miya. 6Niŋi n na, buŋkobkuuriba zudaandima maa naa ligiri maa, ka yeli, ni ba ki tee n naag a jebi Naawun dii ligiri niŋi, a kpali bo, a niŋi kum ligiri. 7A zu, ba sari n to jina, a da dugumeera pu, ba piira saamba, 8ka a ti yini zinni, ba na boona u kum pu. 9N ŋa n ti yaso Naawun chaame Jerimaya n daa n yeli kusu zaa la loobi yamonsi, ni sugasi pisita n niŋi ligseesi Juusi dima n zaali ba da nira, 10ba naa n da dugumeera pu, seema ti duuma n wusi ma. 11Yeesu n daa n za gomina maa saani, gomina maa boosi u, Juusi dima naaba niŋi i? Yeesu yeli u, Nyini n yeli. 12Ka buŋkobkuuriba kpemba ni tiŋŋa maa kpemba yetira, ni Yeesu liya, ka Yeesu muuri. 13Gomina maa yeli, Nyaasi seema ba n yetira e yabeseesi e n niŋi, wula n na e mi yeli? 14Yeesu muuri, ka bi yeli yela zaa, a ku gomina maa noori. 15Yumini zaa ka Galingaari diibu ti paa, gomina maa yi nyisini diyooriba nivuluŋko, so zamu n kpabira, 16ka yumini maa diyoora ba n boona Baraba ba niŋi, so zaa baŋŋi o yela. 17Ka gomina maa baŋŋi, ni pubeerim zu ba mari Yeesu ta, ka o poga mi tolimi n yeli u, a yi seriya diibu ziya, ni o da niŋi nivusuŋŋu ŋa yela zaa, a kpali bo, o zaasi o zaasim boguwaa, a tiri u ga. A zu, zamu n ti laŋsi, gomina maa boosi ba, so ba n kpabira o nyisi n ti ba, Baraba koo Yeesu, so ba n boona Kristu la. 20Buŋkobkuuriba kpemba maa ni tiŋŋa maa kpemba yeli zamu maa, ni ba dee Baraba, ka ti ba ku Yeesu. 21Gomina maa lee n boosi zamu maa, ni bayi maa wumbo ba kpabira. Ba yeli, Baraba. 22Gomina maa boosi ba, Ka wula ma ya n niŋi Yeesu, so ba n boona Kristu la. Ba yeli, cheli ba kpa u tabi daa, o kpi. 23O lee n boosi ba, Wula? Bo yabeeri o niŋi? Ba tasi n yeli kpeeŋtiri, Cheli ba kpa u tabi daa, o kpi. 24Gomina maa n pa ti baŋŋi maa, o ki nye soori, ka zamu maa ya n zabi, o naa koom pegi o nuusi ba nufu niŋi, a yeli, Pa mani n taasi dabaa kum, yarima n taasi. 25Zamu maa zaa yeli, Ka o kum mari tubiri darigirisim, cheli a niŋi ti ni ti yaŋsi. 26Niŋi n na, gomina maa nyisi Baraba ti ba, ka ti ba feebi Yeesu, ka ba wa ti ku u. 27Niŋi n na, soojisi daa n mari Yeesu kpe gomina maa yiri, ka booli ba taaba soojisi zaa, 28ka ba pirigi Yeesu, ka naa wajezee pili u, 29ka naa goosi maali zupiligu, a maa nadima zupiligu, a pili u, ka naa kagitiri niŋi o nudii niŋi, ka gba o yii niŋina u siya, a yetira, Juusi dima naaba, ansa. 30Ka tusi nuntoori wuri u, ka naa kagitiri maa ŋme o zu. 31Ba n niŋi u siya baasi, ba piligi wajezee maa, ka naag o gbagba bimpinna pili u, ka naag u gaari ba wa ti ku. 32Ba n daa n wara, ka yiira tiŋŋa maa puwa, ba nye dabyindaana, Simon n yi Sariini, ka ti o bugi Yeesu kuubu daa gaari. 33Ba n ti paa seela ba n boona Goligofa, so gbinni n niŋi zukoori la, 34ba ti u daam n jebi binseesi. O tagsi n nyaasi, ka bi ŋu. 35Ka ba kpa u tabi daa maa, ka damsi u sabi, ka naa kuga lobi, ba baŋŋi seema ba n di n tori o bimpinna, 36ka zi n nyaasira u, 37ka sebi n digili o zu see bunso zu ba n kpa u tabi la, ni Yeesu, Juusi dima naaba n ŋa. 38Niŋi n na, ba kpa tayugsi bayi paasi o niŋi. Yindaana za o nudiya, ka yindaana mi za o nuzaa. 39Ka niriba gaatira, ka tuura Yeesu, ka yetira, Ee, nyini n yeli, ni ka e di ŋma Naawun dii maa, e n di n lee n tee n me u daba ata, moligi e maŋŋa. Ka e niŋi Naawun Biya, sigi daa maa niŋi. 41Lala n na buŋkobkuuriba kpemba ni zaaliguwusiriba ni tiŋŋa maa kpemba gba niŋina Yeesu siya, a yetira, 42Nyaasi, o moligira niriba, ka ki tee n moligi o maŋŋa. Ka wune n niŋi Juusi dima naaba, cheli o sigi, ka ti niŋi u yeride. 43O niŋina Naawunni yeride, a zu, ka Naawunni kpabira, cheli o moligi u, a kpali o n yeli o niŋini Naawun biya. 44Ka tayugsi maa ba n naa n tabi n paasi o niŋi la mi tuura u lala. 45Wuntooŋu n daa n ti paa, wuluŋu pili, paaligu maa puu zaa loobi ligu, halli zaanoori ti paagira. 46A jemani maa Yeesu tasi n yeli, Ali, ali, lama sabatani. O gbinni niŋi, Naawunni, Naawunni, wula n na e zagsi ma? 47Niseesi n ba niŋi, ka wumi seema o n yeli maa yeli taaba, Dabaa boonini Alayija. 48Ka ba yindaana chee n ti naa gbaari sugi daam, a kusi daa, ka naa n ti Yeesu o ŋu. 49Ka seesi yeli, Cheli u, ti nye, a koo Alayija n ti moligi u. 50Ka Yeesu lee n tasi kpeeŋtiri, ka kpi. 51A jemani maa, a yi Naawun dii, Naawun patisa cheeg ayi, a yi saazu ti sigi. Seelasi tiŋŋa yigsi, kugkara yorigi, 52kaasi yoo, Naawun nivudamta n kpi la lee n nyisigi, 53ka yi kaasi maa puusi. Yeesu n lee n ti nyisigi kum puwa, ba kpe tiŋŋa maa puwa, nivudamta nye ba. 54Yeesu n kpi la, soojisi kpeema ni soojisi n nyaasira u la nye tiŋŋa maa n yigsi, a ni yela n niŋi, a ku ba noya, ba yeli, Yamonsi n na, o niŋini Naawun biya. 55Niŋi n na, pogidamta n daa n pa Yeesu zu yi Galili paaligu, ka suŋina u la za wogila nyaasira u. 56Ba seesi niŋi Mariama Magiliini, a ni Mariama yindaana, Jeemsi ni Joosefi ma, a ni Zebidi poga. 57Zaanoori n daa n ti paa, bindaanso ba n boona Joosefi, a yi Arimatiya, ka niŋi Yeesu nyaaŋpaara la we gomina maa saani, a wa ti suusi Yeesu kpiiŋu. Gomina maa yeli ba naa n ti u. 59Niŋi n na, daba maa wa ti naa kpiiŋu maa, a pili u wajepeeli, 60ka naag u wa ti digili o gbagba kaa n niŋi voori ba n chibi, a yi kugitintaa puu la, ka bilimi kugitintaa nyeri o noori. 61Ka Mariama Magiliini ni Mariama yindaana maa zi n nyaasira. 62Dindaari maa niŋi Juusi dima siriya niŋinisim daari. Bee n daa n ti chee, buŋkobkuuriba kpemba ni Farisii dima laŋsi n we gomina maa saani, 63a wa ti yeli u, Ti kpeema, ti teesi seema yomsira ŋa n daa n ba niŋi, ka yeli, ni o daba ata daari o ni lee n nyisigi, 64a zu, ti suusira i ni, e ti soojisi ba nyaasira kaa maa, daba ata maa ti baasi, o nyaaŋpaariba ba da nye daama wa ti zu o kpiiŋu maa, ka yeli niriba, ni o nyisigini, a yi kum puwa. Ka ba niŋi n ŋa, yomsigu maa baasigu ni gaari yomsigu maa piiligu. 65Gomina maa yeli ba, Mari soojisi ŋa gaari, ka ti ba nyaasira zii maa nene. 66Ba we, a wa ti yo kaa maa nene, ka ti soojisi maa nyaasira u.

will be added

X\