Matiyu 25

1Yeesu daa n bo kiŋaasa yeli ba, Naawun naalim niŋini maa suŋguriba pii n mari katula, ba wa ti tuusi pogipaali daana, 2banu zoligi, ka banu mi mari yam. 3Zolisi maa naa ba katula, ka bi naa kpaam paasi, 4ka yambaŋiniba maa naa ba katula, a ni kpaam. 5Niŋi n na, daba maa bi ta yoom, suŋguriba maa gbisi. 6Tunsuu n ti paa, niso tasi n yeli, Ya nyaasi daba maa. Ya yi n ti tuusi u. 7Niŋi n na, ba nyisigi n maali ba katula. 8Zolisi maa yeli yambaŋiniba la, Ti katula ya n kpisini, ya nye ya kpaam maa ti ti. 9Yambaŋiniba la yeli ba, Ka ti nye n ti ya, a koo, a ki paa ti gba, a zu, ya gba ya wa ti da. 10Niŋi n na, ba yi n gaari, ba wa ti da, ka daba maa ta, o ni seesi n niŋi siriya la kpe, ba wa ti di, ka kpari dii maa noori. 11A n ti niŋi beela, zolisi la ta, a ti booli daba maa, a yeli, Ti ba, ti ba, ti yoo ti. 12Daba maa yeli ba, Yamonsi ma yeli ya, m bi baŋŋi ya. 13Ka Yeesu lee n yeli, Ya dasira, a kpali bo, ya bi baŋŋi jemanso m di n ta. 14Niŋi n na, Yeesu lee n bo kiŋaasa yindaana, a yeli, Dabso nyisigi, a mari tumtuminiba. Dindaso o ya n gaari paaligu yindaana, ka booli o tumtuminiba maa, a naag o bini ti ba, ba nyaasira a. 15O ti yindaana botesi pisinu, ka ti yindaana pisiyi, ka ti yindaana piiya, a kpali seema ba n mari yam, ka gaari. 16Dabso n nye botesi pisinu la naag o bini loobira, ka lee n nye botesi pisinu paasi. 17Lala n na, botesi pisiyi la daana lee n nye botesi pisiyi paasi. 18Ka so n nye pii la naag o toori wa ti gbi tiŋŋa, ka naa n pi. 19A n ti yuu, ba yidaana maa ta, o ti nyaasi seema ba n niŋi. 20Niŋi n na, botesi pisinu la daana ta, a ni botesi koowa, a ti yeli, M yidaana, e daa n ti ma ni botesi pisinu, nyaasi, ma lee n nye pisinu paasi. 21Yidaana maa kpeesi u yeli, E tumi nene ga, a ni kenyiti, ka bi zagsi yabila maa, a zu, m ni ti i daama ga. Ta, m ni ni ti mari pupeelim. 22Niŋi n na, botesi pisiyi la daana ta, a ti yeli, M yidaana, e daa n ti ma botesi pisiyi, nyaasi, ma lee n nye pisiyi paasi. 23Yidaana maa kpeesi u yeli, E tumi nene ga, a ni kenyiti, ka bi zagsi yabila maa, a zu, m ni ti i daama ga. Ta, m ni ni ti mari pupeelim. 24Niŋi n na, botesi pii la daana ta, a ti yeli, M yidaana, m baŋŋi e mari sufukpeeŋu, a cheera binseesi e n bi butira, ka nyaara tono, a yi binseesi e n bi tumina, 25a zu, dabeem gbaa ma, ma naag e botesi pii la wa ti pi tiŋŋa. ?arima n ŋa. 26Yidaana maa yeli u, Zinyagiri daana niŋi i, ka e be ga. E baŋŋi m cheera binseesi ni bi butira, ka nyaara tono, a yi binseesi ni bi tumina. 27A zu, a daa n veela e n di n naa m ligiri maa ti banki dima, m di n nye tono beela paasi. 28Ka lee n yeli, Ya dee botesi pii la, a yi o saani, ka naa n ti so n mari botesi koowa la. 29A kpali bo, so zaa n mari, ba ni lee n paasi u, o mari ga, ka so n bi mari, ba ni dee beela la o n mari la yi o saani. 30Ka zinyagiri daana ŋa, ya kari u niŋi ligu niŋi, seela beerim n be, niriba kumina la. 31Yeesu daa n lee n yeli, Mani Naawun Nisaala lee n ti ta, m ni mari daama ga, ka mari malakisi zaa ta, a ti di naam, 32ka ti ba laŋsi baligusi zaa m yiya, m barigi ba, a maa pekpagira n barigira peeri ni buusi, 33ka ti peeri maa ba m nudiya, buusi maa mini a ba m nuzaa. 34Niŋi n na, ma ni yeli seesi n ba m nudii zu la, Ya chena, m ba Naawunni ti ya ni barika, ya ti ba o naalim puwa, seema o n daa n zaali ya, a yi durinye ŋa piiligu. 35A kpali bo, kom n daa n gbaa ma, ya ti ma bindira. Konyuuri n daa n mari ma, ya ti ma ŋu. Ni daa n niŋi saana, ya dee ma. 36Ni daa n pirigi, ya ti ma bimpinna. Ni daa n beera, ya ti moligira ma. Ba n daa n yo ma dii, ya ti puusi ma. 37Niŋi n na, nivusuma maa ni boosi ma, Ti duuma, sambo kom n daa n gbaag i, ti ti i bindira, koo, konyuuri mari i, ti ti e ŋu, 38koo, e niŋi saana, ti deeg i, koo, e pirigi, ti ti i bimpinna, 39koo, e beera, koo, ba yo i dii, ti ti puusi i? 40M ni yeli ba, Yamonsi ma yeli ya, ya n daa n niŋi n ŋa, a ti m nyaanzaariba bibilidaana la, mani n na ya niŋi n tira. 41Niŋi n na, m ni lee n yeli seesi n ba m nuzaa zu la, Ya wara, Naawunni si ya noori, ya gaari bugum ziya, seela n maali n guri, Sitaana ni o malakisi ba we la. 42A kpali bo, kom n daa n gbaa ma, ya bi ti ma bindira. Konyuuri n daa n mari ma, ya bi ti ma m ŋu. 43Ni daa n niŋi saana, ya bi dee ma. Ni daa n pirigi, ya bi ti ma bimpinna. Ni daa n beera, koo, ba yo ma dii, ya bi ti puusi ma. 44Ba gba ni boosi ma, Ti duuma, sambo kom n daa n gbaag i, koo, konyuuri mari i, koo, e niŋi saana, koo, e pirigi, koo, e beera, koo, ba yo i dii, ka ti bi moligi i? 45M ni yeli ba, Yamonsi ma yeli ya, ya n daa n bi niŋi a ti m nyaanzaariba bibilidaana la, mani n na, ya bi niŋi n ti. 46Niŋi n na, ba ni mari ba gaari tubiri darigirisim n ka baasigu la ziya, ama nivusuma maa ni nye nyevuriso n ka baasigu la.

will be added

X\