Matiyu 24

1Yeesu n daa n yiira Naawun dii laanta puwa, o nyaaŋpaariba ti yeli u laanta maa gondaasi veelim yela. 2Yeesu yeli ba, Ya nyaasi a, yamonsi ma yeli ya, dindaso a zaa ni ŋma, biriki zaa ki lee n tee n pa o todaana niŋi. 3Yeesu n daa n ti paa zoso ba n boona Olivi la, o nyaaŋpaariba ko ta o saani, a ti boosi u, Yeli ti jemanso yela ŋa n ya n niŋi, a ni seema ti n di n niŋi n baŋŋi e taabu n paagira, a yi durinye ŋa baasigu. 4Yeesu yeli ba, Ya dasi, niriba ba da yomsira ya, 5a kpali bo, nivudamta ni mari m yuuri ta, a ti yeli, ni barima n niŋi so n ya n ta la, ka yomsi nivudamta ga. 6Ya pa ti wumi towusi ni zabiri yela, ya da zora dabeem, a kpali bo, a zaa ni niŋi poin, ka baasigu maa na bi paa. 7Baligusi ni zabira taaba, ka paaligusi dima gba ba zabira taaba, kom o li seelasi, ka tiŋŋa o yigsira. 8N ŋa niŋi nam nyaabu maa piiligu. 9A jemani maa ba ni gbaagira ya wa ti namsira ya, ka kuura ya, ka baligusi zaa ba chisi ya yela, a kpali m zu, 10ka nivudamta ba zagsi ma, ka koosi taaba, a chisi taaba, 11ka nivudamta ba nyisigi, a yomsi n yeli, ni ba niŋini Naawun chaamesi, ka nivudamta ba pa ba zu, 12ka nivudamta ba ki lee n kpabira taaba, a kpali yabeeri ga la zu. 13Ama so zaa n bi zagsi ma, a ti paa baasigu, o ni nye moligirisim, 14ama durinye ŋa zaa, a ni baligusi zaa ni wumi Naawun naalim baarusuma ŋa poin, ka baasigu o ta. 15Yeesu daa n lee n yeli, Dindaso ya ni nye ba naa bimbeso Naawun chaame Daniya n daa n yeli la zaali, a yi Naawun ziya. Cheli so n karimina baŋŋi o gbinni. 16A jemani maa seesi n ba Judiya paaligu ba zo n gaari zoori zuuri, 17ba seesi n ba piisi zu, ba da sigi n kaasi ba bini poin, 18koo seesi n ba puuri, ba da pori n wa ti naa ba wajaasi, 19ka seesi n mari puusi, a ni seesi biisi n nyisimina ni nye nam. 20A zu, ya suusi Naawunni, ni zoobu maa saŋa o da niŋi waari jemani, koo daborigu. 21A kpali bo, a jemani maa ba ni nye nam ga, a gaari nam zaa n ba niŋi, a yi durinye ŋa piiligu, a ti paa zinni, ka ba ki nye nam ŋa zaa, ama jemani maa ko. 22Lala n na, ka nam maa ti yuu, nisaala zaa ki nye moligirisim, ama Naawunni booni daasi maa, a kpali niseesi o n nyisi la zu. 23A jemani maa, ka niso yeli ya, ni ya nyaasi Kristu, ni o bani kpe, koo nisaaniŋi, ya da niŋi u yeride. 24A kpali bo, niseesi ni nyisigi, ka ŋmaara jiri, ni ba niŋini Kristu, koo Naawun chaame, ka niŋi mamaachi yela, a koo ba n di n tee n yomsi seesi Naawunni n nyisi la gba. 25Ama m yeli ya yela ŋa poin, ya baŋŋi a. 26A zu, ka ba yeli ya, ni ya nyaasi, o bani moo puwa, ya da wa ti nyaasi, koo, ni o bani dii puwa, ya da niŋi ba yeride. 27A kpali bo, mani Naawun Nisaala taabu ni niŋi maa saa nyagsira, so zaa, a yi seelasi zaa ba nye u. 28Seela zaa buŋkpiiŋu n be, nisaaniŋi zugusi n laŋsira. 29Yeesu daa n lee n yeli, Nam maa ti baasi, wuluŋu ni ŋmeriga ki ti paaligu, ka ŋmeribiisi a dammi saazu liira. 30A jemani maa durinye baligusi zaa ni kumi, a kpali bo, ba ni nye mani Naawun Nisaala n mari daama ni kpeeŋu ga, a chena, a yi sagbana puwa, 31ka kabilli o pemsi ga, m tumi m malakisi, ba ti laŋsi niseesi zaa Naawunni n nyisi, a yi durinye ŋa seela zaa. 32Ya nyaasi tiso ba n boona figi la yela. O si n ti bosi, ya baŋŋi maa, see ya n seeni. 33Lala n na, ka ya nye yaŋama ŋa, ya baŋŋi maa, mani Naawun Nisaala taabu paagira. 34Yamonsi ma yeli ya, pimpariŋa dima zaa ki kpi, ka yela ŋa zaa niŋi. 35Saazu ni tiŋŋa zaa ni baasi, ka m wusigu ka baasigu. 36Jemanso yela ŋa ya n niŋi, so zaa ka a baŋinisim, halli malakisi n ba Alizaana puwa, koo mani, ama ti ba Naawunni ko. 37Ya nyaasi, mani Naawun Nisaala taabu ya n niŋini maa seema n daa n niŋi kusu zaa, a yi Nuhu jemani la. 38A jemani maa, poin ka koom daa n paali la, ba daa n dirini, ka ŋuura, ka naagira pogiba, ka kulisira, a ti paa dindaso Nuhu n daa n kpe ŋarintintaa la puwa, 39ka ba bi baŋŋi yaso n daa n ya n niŋi, ka koom paali n di ba zaa. Lala n na, mani Naawun Nisaala taabu ni be. 40Dabsi bayi ni ba pu koora, ba ti naa yinni, ka che yinni. 41Pogiba bayi ni neemina, ba ti naa yinni, ka che yinni. 42A zu, ya dasira, a kpali bo, ya bi baŋŋi dindaso ya duuma di n ta. 43Ya nyaasi, ka yiridaana di baŋŋi jemanso tayugu n ya n ta, o ki sagi n gbisi, ama ka nyaasira, tayugu maa o da kpe dii. 44Lala n na, ya gba ya niŋi aniya niŋi siriya, a kpali bo, mani Naawun Nisaala ni ta jemanso ya n bi baŋŋi. 45Yeesu daa n bo kiŋaasa yeli ba, Ya nyaasi, yidaana zaa yi nyisini tumtuminiso n mari yeride, a ni yam, o loobi tumtuminiba maa zaa kpeema, ka yi totira o taaba maa bindira tira ba. 46Dindaso, ka yidaana maa gaa seela, ka ta, ka tumtumina maa tumina nene, o ni nye barika. 47Yamonsi ma yeli ya, yidaana maa ni ti o nyaasira o bini zaa. 48Ama ka yidaana maa n gaari la, ka tumtuminibee fe o sufu niŋi, ni o n di n yuu, ka ki ta yoom, 49ka buura o taaba tumtuminiba, dabsi ni pogiba, ka o ni daŋuuriba ba dira, ka ŋuura ga, 50o yidaana maa ni ta dindaso, a ni jemanso o n bi fe u, 51ka darigi o tubiri, o nye nam, a yi yomsiriba puwa. Nisaaniŋi beerim ni gbaa niriba ga, ba kumi.

will be added

X\