Matiyu 23

1Niŋi n na, Yeesu daa n yeli o nyaaŋpaariba ni zamusi maa, 2Ya nyaasi, zaaliguwusiriba ni Farisii dima yi wusira Musa zaaligusi gbina, 3ya niŋi aniya niŋina seema ba n wusira, ama ya da niŋina seema ba n niŋina. A kpali bo, ba wusira a, ka bi niŋina a. 4O niŋini maa ba n tira niriba ziira zitimsa, ka ki sagi n paasi ba beela zaa ziira a. 5Yaseesi zaa ba n niŋina, ba kpabira niriba ba nyaara a. Lala n na, ba naa Naawun zaaligusi sebi sabikara, a niŋi ba niŋa, niriba ba nye a, ka mi ti ba wajaasi yagilasi, a ba wogilim, 6ka kpabira zisuma ziisi, a yi bindira ziya, a ni laŋsigu diisi puusi, 7ka kpabira jilima puusigu ga, a yi daa puwa, niriba ba boona ba karichisi. 8Ama ya wune, ya da ti niriba ba boona ya karichisi, a kpali bo, nivuluŋko niŋi ya karichi, ka ya zaa niŋi luŋko, 9ka da boona nisaala zaa ya ba, a kpali bo, Naawunni koluŋko niŋi ya ba, ka ba Alizaana puwa, 10ka da ti niriba boona ya ba duuma, a kpali bo, mani Kristu niŋi ya duuma, 11ka so n niŋi kpeema, a yi ya puwa, o tumi n tira ya. 12So zaa n ti o yuuri du, o yuuri ni sigi, ka so zaa n ti o yuuri sigi, o yuuri ni du. 13Ka Yeesu daa n lee n yeli, Ya zaaliguwusiriba ni Farisii dima niŋini yomsiriba, ya ni nye nam ga. A kpali bo, ya bi kpabira Naawun naalim, ka mi bi sagi seesi n kpabira u ba kpeera. 15Ya zaaliguwusiriba ni Farisii dima niŋini yomsiriba, ya ni nye nam ga. A kpali bo, ya wara wogilawogila, a kpabi nira o pa ya zu, ama o ti pa ya zu, ya ti o niŋi nivubee, a gaari ya, ya zaa ya gaari bugum ziya. 16Ya niŋini maa zoomasi n wusira zoomasi soori, ya ni nye nam ga, a kpali bo, ya yetira, ka niso pe Naawun dii, ka bi nyisi o noori maa, a baasini, ama ka o pe Naawun dii sugasi, o ki lee n tee n zagsi o noori maa nyisigu. 17Yarima zoomasi, zolisi, Naawun dii n ti sugasi maa loobi Naawun toori, a zu, dii maa gaari sugasi maa. 18Ya mi yetira, ka niso pe bunso zu ba n ku buŋkobiri tira Naawunni, ka bi nyisi o noori maa, a baasini, ama ka o pe buŋkobiri maa, o ki lee n tee n zagsi o noori maa nyisigu. 19Yarima zoomasi, bunso zu ba n kuura buŋkobiri maa ti buŋkobiri maa loobi Naawun toori, a zu, buŋ maa gaari buŋkobiri maa. 20Lala n na, so zaa n peera buŋ maa, buŋ maa ni bunso zaa n ba o niŋi n na o peera, 21ka so n peera Naawun dii peera dii maa ni Naawunni zaa, a kpali bo, Naawunni ba o puwa, 22ka so n peera Alizaana peera Naawunni ni o zii zii zaa, a kpali bo, Naawunni n ba nisaaniŋi. 23Ya zaaliguwusiriba ni Farisii dima niŋini yomsiriba, ya ni nye nam ga. A kpali bo, ya yi niŋini yabilisi, ka bi niŋina yaseesi n daga ga. Ka ya po, koo, a tugsi ziya zaa, ya yi barigi a bupiiya, ka nyisi luŋko ti Naawunni, ama ka bi dira seriya nene, koo, a zora niriba nimbaa, koo, a niŋina Naawunni yeride. O veela ya n niŋina a zaa. 24Ya niŋini maa zoomasi n wusira zoomasi soori, koo seesi n togira binyuura, ba da ŋuura duŋŋu, ka mi ŋuura binyuura, ka vali buŋkobkarigu paasi. 25Ya zaaliguwusiriba ni Farisii dima niŋini yomsiriba, ya ni nye nam ga. A kpali bo, ya yi pegi kopusi ni pireetesi nyaana, ka be puu niŋi, a zuura, a mari beem. 26Yarima zoomasi, ya pegi a puu niŋi poin, ka a nyaana gba a veela. 27Ya zaaliguwusiriba ni Farisii dima niŋini yomsiriba, ya ni nye nam ga. A kpali bo, ya niŋini maa kaasi, seesi zuuri ba n maali nene la, ama a puu niŋi kpiinsi koba ni dagiri ko n ba niŋi. 28Lala n na, niriba nyaara yasumseesi ya n niŋina, ama ya sufusi niŋi ya be ga, ka yomsira ga. 29Ya zaaliguwusiriba ni Farisii dima niŋini yomsiriba, ya ni nye nam ga, a kpali bo, Naawun chaamesi ni nivusuma, seesi ya yaadima n daa n ku la, ya maali ba kaasi nene ga, a yetira, ni ka ya daa n di ba niŋi, ya di ki paasi ba niŋi ku ba. 31Lala n na, ya wusira maa, ya ni ya yaadima maa niŋini luŋko, 32a zu, ya wa ti baasi yabeseesi ya yaadima n daa n niŋina la. 33Yarima waagi ŋa, ya ki tee n zo bugum ziya. 34Ya nyaasi, m ya n tumini Naawun chaamesi ya saani, a ni yambaŋiniba, a ni wusiriba, ya kpa ba seesi daa, a ku ba, ka feebi seesi, a yi ya laŋsigu diisi, ka chaŋina tiŋsi namsira ba ga. 35Lala n na, ya gba li, a maa ya gba ku nivusuma zaa ba n daa n ku la, a yi Yeebu, a ti paa Zakariya, Barakiya biya, so ba n daa n ku, a yi Naawun dii puu la. 36Yamonsi ma yeli ya, yela ŋa zaa ni niŋi, ka pimpariŋa dima na ba niŋi. 37Ka Yeesu daa n lee n yeli, Jiruusilim dima, Jiruusilim dima, ya daa n yi naani kuga kuura Naawun chaamesi o n tumi ya saani la. Ya nyaasi, m daa n yi kpabirini m laŋsi ya, seema nonyaaŋu yi n laŋsi o nobilisi, ka ŋuni a niŋi la, ka ya zagsi. 38A zu, Naawunni zagsi ya saani, 39ka ma yeli ya, ya mi ki lee n nye ma zaa, halli ka ya ti yeli, ni Naawunni naani barika ti niso o n tumi la.

will be added

X\