1 Ba n daa n ti leena Jiruusilim, ba paa Befeegi, a ni zoyindaana ba n boona Olivi, Yeesu tumi o nyaaŋpaariba bayi, 2 ka yeli ba, Ya we tiŋso n ba yiya. Ya si n kpe, ya ni nye bunduurigu ni o bii n le, ya lerigi a ti ti ma. 3 Ka nira zaa yeli seem zaa, ya yeli, Ti duuma n kpabira a, o ni lee n ti ba mari a ta yoom. 4 N ŋa niŋini maa Naawun chaame n daa n sebi kusu zaa la loobi yamonsi, 5 ni ya yeli Jiruusilim bipuŋŋu, ni o nyaasi, o naaba n chena boin, ka ba bunduurigu ni o biya. 6 Niŋi n na, nyaaŋpaariba bayi maa wa ti niŋi seema Yeesu n yeli ba maa, 7 ka mari bunduurigu ni o bii maa ta, a ti naa ba bimpinna pa a niŋi, ka Yeesu du n ba. 8 Ba n wara maa, zamusi maa nivudamta yerigi ba bimpinna digili soori, ka seesi ŋma vaari, a yi tiisi niŋi, a yerigi n digili. 9 Ka zamuseesi pa o yiya, ka seesi pa o nyaaŋa, ba zaa tasi n yetira, Naaba Dawuda yaŋŋu n ŋa, ya kpeesira u. Wune n na Naawunni tumi, ka ti u barika. Ya kpeesira Naawunni. 10 Yeesu n wa ti kpe tiŋŋa maa puwa, o zaa yiŋsi, ba boosira, ni ŋani n ŋa? 11 Zamusi maa yeli, ni Naawun chaame Yeesu n na, o yi Nazire n ba Galili paaligu puwa. 12 Niŋi n na, Yeesu daa n kpe Naawun dii laanta, a wa ti katira seesi zaa n koosira bini nisaaniŋi, a ni seesi n daara, ka turi cheenji ŋmaariba teebulsi, a ni ŋmena koosiriba kogusi basi. 13 Ka yeli ba, kusu zaa ba daa n sebi n digili Naawun buku puwa, ni Naawun dii ni niŋi seela niriba n togsira Naawun saani, ama ya wune loobi u tayugsi dii. 14 Niŋi n na, zoomasi ni boobisi ta o saani, o tibi ba. 15 Buŋkobkuuriba kpemba ni zaaliguwusiriba n ti nye mamaachi yaseesi o n niŋi, a ni seema biisi n ba Naawun dii laanta tasi n yetira, Cheli Naawunni ti naaba Dawuda yaŋŋu ŋa barika, ba je suuri, 16 ka yeli Yeesu, Wumi seema ba n yetira. Yeesu yeli ba, M wumiya. O niŋini maa seema kusu zaa ba n daa n sebi n digili, ni Naawunni ti bibilisi ni bileesi ba kpeesira u nene. 17 Niŋi n na, Yeesu yi tiŋŋa maa puwa, a wa ti do Befani tiŋŋa. 18 A n daa n le n chee bee, Yeesu pori n wara Jiruusilim tiŋŋa, kom gbaag u. 19 Niŋi n na, o nye tiso ba n boona figi n leeli soori, o gaari o wa ti po o wala di, ka vaari ko n ba niŋi, o yeli tii maa, ni o ki lee n wali wala zaa. 20 Niŋi n na, tii maa zagi, Yeesu nyaaŋpaariba yeli, Ee, ya nyaasi seema tii maa n zagi yoom. 21 Yeesu yeli ba, Yamonsi ma yeli ya, ka ya niŋina Naawunni yeride, a ni tama ga, ya ni tee n niŋi seema ni niŋi tiyaa, ka lee n tee n yeli, ni zotintaa o nyisigi n li teeku niŋi, o li. 22 A zu, bunso zaa ya mari tama, a suusira Naawunni, ya ni nye. 23 A jemani maa Yeesu daa n wa ti kpe Naawun dii laanta wusira niriba, ka buŋkobkuuriba kpemba ni tiŋŋa maa kpemba ti boosi u, Bo daama n na e naa n niŋina yela ŋa? ?ani n ti i daama maa? 24 Yeesu yeli ba, M gba ni boosi ya yaluŋko. Ka ya sagi n yeli ma, m gba ni yeli ya bunso daama ni naa n niŋina yela ŋa. 25 ?ani n ti Jon Baatisi daama o suura niriba koom, Naawunni koo nisaaldima? Niŋi n na, ba di amore, a yeli, Ka ti yeli, ni Naawunni n ti u daama, o ni yeli ti, ka wula zu ya bi deeg o yela. 26 Ti mi ki tee n yeli, ni nisaaldima n ti u daama, a kpali niriba zaa baŋŋi maa, Jon Baatisi daa n niŋini Naawun chaame gbagba, ka ti zora ba dabeem. 27 A zu, ba yeli Yeesu, ni ba bi baŋŋi. Yeesu yeli ba, Lala n na, m gba ki yeli ya daamaso ni naa n niŋina yela ŋa. 28 Yeesu daa n lee n yeli ba, Ya nyaasi, dabso nyisigi, a mari biduusi bayi. Dindaso o wa ti yeli ba yindaana, ni o we pu zinni, a wa ti tumi. 29 Bii maa zagsi, ni o ki gaari. A n ti niŋi beela, o loobi o sufu, ka we. 30 Daba maa lee n wa ti yeli so n che, ni o we pu zinni, a wa ti tumi. Bii maa sagi, ni o ni gaari, ka bi we. 31 Biisi bayi maa ba wumbo niŋi ba ba kiperi? Ba yeli, Piiligu daana la. Yeesu yeli ba, Yamonsi ma yeli ya, lampoo deegiriba ni jagimilusi ni daŋŋi ya kpe Naawun naalim puwa. 32 A kpali bo, Jon Baatisi n daa n ti wusi ya yasuma la, ya daa n bi dee, ka lampoo deegiriba ni jagimilusi deeg a. Halli ya n daa n nye ŋa, ya bi cherigi ya sufusi deeg a. 33 Niŋi n na, Yeesu daa n lee n bo ba kiŋaasa, a yeli, Dabso nyisigi, ka buri tiisi, a yi o pu, ka sabi daari kogi, ka gbi bogiri seela ba n di n togi tiisi maa wala koom, ka me jirambisa. Dindaso o we paaligu yindaana, ka ti niriba nyaasira o pu maa. 34 Wala maa naagirisim n ti paa, pu maa daana tumi o tumtuminiba ba ti deeg o toori ti ti u. 35 Ka seesi n nyaasira pu maa bu tumtuminiba maa yindaana, ka ku yindaana, ka lobi yindaana kuga. 36 Niŋi n na, pu maa daana lee n tumi tumtuminiba, ba zoo n gaari piiligu dima maa, ba niŋi ba gba lala. 37 A zu pu maa daana tumi o gbagba biya, a yeli, ni ba ni ti u jilima. 38 Niriba maa n ti nye u, ba yeli taaba, ni wune n niŋi kapitedira, ni ba ku, ka dee kapitesi maa. 39 A zu, ba gbaag u yi pu maa niŋi, a ku u. 40 Ka pu maa daana pa ti ta, wula n na o ya n niŋi niriba maa? 41 Ba yeli Yeesu, Ba niŋini nivubeeri, o ni ku ba ga, ka lee n ti seesi ba nyaasira, ka nye pu maa bini, a tira u. 42 Yeesu yeli ba, Ya nyaasi seema kusu zaa ba n daa n sebi n digili, a yi Naawun buku puwa, ni Kugiso dimeeriba n naa n meera, ka nyisi n basi, wune n loobi n niŋi kuga maa zaa zudaana. N ŋa ti duuma niŋi, a ku ti noya. 43 A zu, ma yeli ya, Naawun naalim ki lee n niŋi ya toori, ama baliguso n niŋina Naawun kiperi. 45 Buŋkobkuuriba kpemba ni Farisii dima n wumi kiŋaasasi ŋa, ba pa baŋŋi maa, ba yela n na Yeesu yetira, 46 ka kpabira ba gbaag u yo dii, ama a kpali zamusi maa n baŋŋi Yeesu n niŋi Naawun chaame la, dabeem gbaa ba, ba gbaag u je.
