Matiyu 20

1Ka Yeesu daa n lee n yeli, Ya nyaasi, Naawun naalim niŋini maa pudaanso n daŋŋi n yi n wa ti kpabi tumtuminiba ba ti tumi o pu tuma. 2O ni ba n di daa, o ti ba gaari o pu, ba wa ti tumi. 3Wuluŋu na n duura, pudaana maa lee n yi, ka nye tumtuminiba n za jaga yi daa puwa, 4o yeli ba, Ya wa ti tumina m pu, ka m ti ya bunso n sagsi, ba we. 5Wuntooŋu n ti paa, a ni wuluŋgauwa, pudaana maa lee n yi n wa ti niŋi n ŋa. 6Zaanoori n ti paa, o lee n yi, ka nye tumtuminiba seesi n za, o boosi ba, Beegaa n chee, bo n na ya za putoom? 7Ba yeli u, So zaa bi naa ti tuma. O yeli ba, Ya gba ya wa ti tumi m pu. 8Wuluŋu lii jemani n ti paa, pu maa daana yeli o tumtuminiba kpeema, ni o booli seesi n tumina pu la ti yo ba samini, o piili seesi n ta zaanoori la, a ti paa piiligu dima la. 9Zaanoori dima maa n ta, o yo ba daso o ni piiligu dima maa n di la. 10Piiligu dima maa fe maa, ba ni nye n paasi, ka mi nye daso ba n di la ko. 11A zu, ba zabi pudaana maa, 12a yeli, Seesi n ta zaanoori la tumi beela, ka ti wune beegaa n chee, wuluŋu ku ti, ama e yo ti ni ba zaa sagi. Lala veela? 13Pudaana maa yeli ba yinni, M zo, m bi niŋi i yabee, a kpali bo, m ni ni dini daa za, 14mari e toori wara. M gbagba ligiri ma naa n yo ya, e ni seesi n bi daŋŋi n ta la zaa luŋko. Da zabi ma, a kpali m bunye zu. 16Lala n na, seesi n pa nyaaŋa, ba ni loobi n pa yiya, ka seesi n pa yiya, ba ni loobi n pa nyaaŋa. 17Dindaso Yeesu ni o nyaaŋpaariba daa n pa soori, a wara Jiruusilim, o mari o nyaaŋpaariba pii ni bayi maa ko gaa seela, a wa ti yeli ba, 18Ya nyaasi, ti ya n duni Jiruusilim. Nisaaniŋi n na ba ni gbaa mani Naawun Nisaala gaari buŋkobkuuriba kpemba ni zaaliguwusiriba saani, ba yeli, ni a veela ba n ku ma. 19A zu, ba ni naa ma ti Aroom dima, ba niŋi ma siya, ka feebi ma, ka ku ma, ka m daba ata daari Naawunni ni nyisigi ma. 20Niŋi n na, Zebidi poga daa n mari o biisi bayi, Jeemsi ni o sunzo Jon, Yeesu nyaaŋpaariba, a ta Yeesu saani, a wa ti gba o yii suusi u bunso. 21Yeesu boosi u, Bo n na e kpabira? O yeli, Ka e pa ti zi e naam la puwa, e ti m biisi bayi ŋa, yinni o zi e nudiya, yinni o zi e nuzaa. 22Yeesu yeli ba, Ya bi baŋŋi bunso ya n suusira n ŋa gbinni. Namso ni ya n nye n ŋa, ya ni tee n nye u, a ni sufuluŋko? Ba yeli u, ni ba ni tee n niŋi. 23Yeesu yeli ba, Namso ni ya n nye n ŋa, ya gba ni nye, ama m ki tee n nyisi niso n di n zi m nudiya, a ni m nuzaa. M ba Naawunni ni naa ziisi maa ti niseesi o n nyisi. 24Yeesu nyaaŋpaariba piiseesi n che maa n wumi n ŋa, ba je suuri niŋi mabiisi bayi maa, 25ka Yeesu booli ba yeli, Ya wumi, ba seesi ba n boona paaligusi zudaandima ni nadima mari daama gaari niriba zaa, ka yi yeli ba bunso ba n di n niŋi, 26ama a yi ya saani ya ki niŋi lala, so n ya n niŋi yipaara, cheli o tumina o taaba zaa. 28Lala n na, mani Naawun Nisaala bi ta, ba ti tumina ma, m tani m ti tumina ba, ka naa m nyevuri tagi nivudamta ba nye nyevuri. 29Yeesu ni o nyaaŋpaariba n daa n wara maa, ba dee Jeriko, ka yi n wara, zamutintaa pa o zu, 30ka zoomasi bayi ba n zi sogbarimini. Zoomasi bayi maa n ti baŋŋi maa, Yeesu n wara, ba tasi n yeli, Naaba Dawuda yaŋŋu, zo ti nimbaa. 31Ka zamu maa zabira ba, ni ba muuri, ka ba tasira gaa ga, Ti duuma, naaba Dawuda yaŋŋu, zo ti nimbaa. 32Yeesu za, ka booli ba, a boosi, Bo n na ya kpabira m niŋi ya? 33Ba yeli u, Ti duuma, yoo ti nufu. 34Nimbaa gbaa Yeesu, o siisi ba nufu, a nyaara, ka ba pa o zu.

will be added

X\