1 Dindaso Farisii dima ni zaaliguwusiriba n yi Jiruusilim tiŋŋa puwa daa n ta Yeesu saani, a ti yeli u, 2 Nyaasi, e nyaaŋpaariba bi paara ti yaayela zu, a kpali bo, ka ba ya n di, ba bi pegira ba nuusi. 3 Yeesu yeli ba, Ya nyaasi, a kpali ya yaayela zu, ya zagsini Naawun zaaligusi. 4 Naawun zaaligusi wusira maa, nira o tira o ba ni o ma jilima, ka lee n wusi maa, ba ku so zaa n togsi yabee ŋmeŋsi o ba ni o ma. 5 Ama ya wune, ka niso yeli o ba, koo o ma, ni tonoso ba n di n nye o saani o naa n ti Naawunni, ya ki lee n sagi o naa n tira ba. 6 Lala n na, ya zagsi Naawun zaaligu, ka niŋina ya yaayela. 7 Ya niŋini yomsiriba. Ya yela n na Naawunni daa n ti o chaame Azaya sebi n digili kusu zaa, ni 8 niribaa naa naŋgbana tira ma jilima, ka bi tira ma jilima, a yi ba sufusi niŋi. 9 Ba kpeesi ma ni jeera, a kpali bo, ba naa ba yaayela yetira, ni m yela n na. 10 Niŋi n na, Yeesu daa n booli zamu maa ba ta, o yeli ba, Ya zaa ya chisi tuba wumi, ka baŋŋi a. 11 Bunso zaa ka niŋi o yi yaŋŋa kpe nivu niŋi, a loobi u nivubee, ama yaseesi n yi nivu niŋi loobira u nivubee. 12 Niŋi n na, o nyaaŋpaariba ta o saani, a ti yeli u, Farisii dima n wumi seema e n yeli maa, ba je suuri. 13 Yeesu yeli ba, Tiso zaa m ba Naawunni n bi buri, ba ni va u basi. 14 A zu, ya cheli ba, ba niŋini maa zoomasi n wusira ba taaba zoomasi soori, ba zaa ni li bogiri puwa. 15 Piita yeli u, Wusi ti kiŋaasa maa gbinni. 16 Yeesu yeli ba, Ee, ya gbagba bi baŋŋi o gbinni? 17 Ya nyaasi, binseesi n kpeera naŋgbanni niŋi n kpeera puu niŋi, ka mari niŋa niŋi yiira. 18 Ama yaseesi n yi noori niŋi, a mi yini sufu niŋi, a ti nivu niŋi bimbee. 19 A kpali bo, sufu niŋi n na feribeeri be, a ti nira kuura, koo, a kpabira o todaana poga, koo, a zuura, koo, a ŋmaara jiri, koo, a tuura, 20 ka ŋama zaa ti nivu niŋi bimbee. Ama ka nira bi pegi o nuusi, ka di, lala bi ti o niŋi bimbee. 21 A jemani maa Yeesu daa n nyisigi n we tiŋseesi ba n boona Taya ni Sidon la. 22 O n ti paa niŋi, nisaaniŋi poga n bi niŋi Juusi poga, yi n pa o zu, a tasi n yeli, M duuma, naaba Dawuda yaŋŋu, zo ma nimbaa, kikpaarigusi namsira m bipuŋŋu ga. 23 Yeesu muuri, ka o nyaaŋpaariba yeli u, ni o kari u, a kpali o n tasira la zu. 24 Yeesu yeli, M ba Naawunni tumi ma ni, m ti moligi Juusi dimseesi n borigi la ko. 25 Poga maa ti gba Yeesu yiya, ka yeli, M duuma, moligi ma. 26 Yeesu yeli u, o bi daga ba naa biisi bindira ti baasi. 27 Poga maa yeli, M duuma, yamonsi n na e yeli, ama baasi gba dira bindiriseesi a daandima n dira, ka a liira la. 28 Yeesu yeli, Poga, e niŋi yeride nene ga, cheli yaso e n kpabira o niŋi. A puli maa niŋi o bii maa nye alaanfiya. 29 Niŋi n na, Yeesu daa n yi n dee beeŋkarigu maa noori, a wa ti du zoori zi, 30 ka zamusi mari ba baaradima ta o saani, boobisi, wausi, zoomasi, namusi, a ni ba nivudamta, a ti digili o yiya, o tibi ba. 31 Zamusi maa n ti nye, ka namusi togsira, ka wausi nye kpeeŋu, ka boobisi chaŋina, ka zoomasi nyaara, a ku ba noya, ba kpeesi Naawunni, so Juusi dima n tumina la. 32 Niŋi n na, Yeesu daa n booli o nyaaŋpaariba, a yeli, Ya nyaasi, zamu ŋa yela mari ma nimbaa, a kpali bo, ba daba ata yi m saani, ka lee n ka bindira ba di, m mi bi kpabira m pisimi ba, ba ni kom, a kpali bo, ba seesi ni see soori. 33 O nyaaŋpaariba boosi u, Ya n na ti ya n nye bindira, a yi zikuuŋaa ziya, a ti zamutintaa ŋa ba di? 34 Yeesu boosi ba, Paanusi ala ya mari? Ba yeli, Ayapoin, a ni korotobilisi. 35 Niŋi n na, Yeesu ti zamu maa zi tiŋŋa, 36 ka naa paanusi ayapoin maa, a ni korotosi la, a suusi Naawunni, ka kabi a ti o nyaaŋpaariba maa, ba naa n tori ba, 37 ba zaa di n piri, ka piisi a bincheesi, a paali peeri ayapoin. 38 Ba seesi n di maa ba dabsi tusa anaasi, a ni pogiba, a ni biisi. 39 Niŋi n na, Yeesu pisimi ba, ka kpe ŋariŋu gaari Magada paaligu.
