1 A dindaari maa zaa Yeesu daa n yi n wa ti zi beeŋkarigu maa noori, 2 ka zamutintaa ti poli n jili u, o wa ti kpe ŋariŋu puu zi, ka zamu maa za kuŋkunni, 3 ka o naa kiŋaasasi wusi ba yadamta, ka yeli, Dabso nyisigi, a niŋi kokpaara, ka wa ti yaatira o bumbura. 4 O n yaatira maa, seesi fa n li soori puwa, niinsi ti naag a di. 5 Seesi fa n li kparibunyena niŋi, seela tanni n bi zoo, a buli yoom, 6 ka, a kpali a nyaga maa na n bi kpe limsim la zu, wuluŋu gbaag a, a kpi. 7 Seesi li goosi puwa, goosi maa karigi n nyaŋŋi a, a bi wali. 8 Seesi mi li tansuŋŋu puwa, a buli, a karigi nene, a wali biisi. A seesi wali biisi koowa, seesi wali biisi pisiyoobu, ka seesi wali biisi pisita. 9 So n niŋi wumina, o wumi. 10 Niŋi n na, Yeesu nyaaŋpaariba daa n ti boosi u bunso zu o n boora kiŋaasasi maa. 11 O yeli ba, Naawunni sagi maa, ya wune ya baŋŋi o naalim yela, ka na bi sagi ba wune ba baŋŋi. 12 So zaa n mari ni nye n paasi, ka so zaa n bi mari, ba ni fa seesi o n mari la gba. 13 Lala zu ma boora kiŋaasasi tira ba, ba nye, ka ki nye a gbina, ba wumi, ka ki baŋŋi a gbina. 14 N ŋa n na Naawun chaame Azaya daa n yeli kusu zaa, Ya ni wumi, ka ki baŋŋi a gbina, Ya ni nye, ka ki nye a gbina. 15 A kpali bo, niriba ŋa bi deegira yela, koo, a wumina, koo, a nyaara, ba da nye bimpaala, koo, a wumi yapaala, koo, a baŋŋi a gbina, ba da ta mani Naawunni saani m tibi ba. 16 Ama ya wune, ya nyeni barika, a kpali bo, ya n nyaara, ka wumina. 17 Yamonsi ma yeli ya, Naawun chaamesi ni nivusuma daa n zoo n kpabira ba nye yaseesi ya n nyaara n ŋa, koo, a wumi yaseesi ya n wumina n ŋa, ka bi nye, koo, a wumi. 18 Niŋi n na, Yeesu daa n yeli, Ya nyaasi bumbura kiŋaasa maa gbinni, 19 Bumburiseesi n li soori puwa, niinsi naag a di la niŋini maa niseesi n wumi Naawun naalim yela, ka bi baŋŋi a gbinni, Sitaana ti nyisi a, a yi ba sufusi niŋi. 20 Bumburiseesi n li kparibunyena niŋi la niŋini maa niseesi n wumi yela maa, ka deeg a, a ni pupeelim, 21 ba mi ka nyaga. A zu, a ti niŋi daba ayi, ka yela maa ti ba ba toom puwa, ba zagsi a. 22 Bumburiseesi n li goosi puu la niŋini maa seesi n wumi yela maa, ka feera ba nam ni bindaalim yela ni kiperi yaniŋisa, a nyaŋŋi Naawun toori, Naawunni bi nye tono yi ba saani. 23 Bumburiseesi n li tansuŋŋu puu la niŋini maa seesi n wumi yela maa, ka baŋŋi a gbina, Naawunni nye tono yi ba puwa, a maa biisi koowa, koo biisi pisiyoobu, koo biisi pisita. 24 Niŋi n na, Yeesu daa n lee n bo kiŋaasa yindaana, a yeli, Naawun naalim niŋini maa dabso n buri bumburisuma, a yi o pu, 25 ka yiiŋu o dimma mi ti buri bumburibeeri jebi, ka gaari. 26 Niŋi n na, bumburisuma maa buli, ka karigi, ka wanna biisi, ka moori mi ba niŋi, 27 daba maa tumtuminiba ti yeli u, Ti yidaana, bumbura maa e n daa n buri la niŋini bunsuma, ka wula n na bimbeeri ba a puwa? 28 Daba maa yeli ba, M dimma n buri a. Ba boosi u, Ti gaa n va a? 29 O yeli, Akayi, ka ya va bimbeeri maa, bunsuma maa gba ni va. 30 Ya cheli a zaa karigi, a ti paa naagirisim jemani. A jemani m ni yeli ba, ba ŋma bimbeeri maa poin, a le n kusi bugum, ka pa ti ŋma bindira maa, a niŋi m kiŋkana niŋi. 31 Niŋi n na, Yeesu daa n lee n bo kiŋaasa yindaana, a yeli, Naawun naalim niŋini maa bumburiso n niŋi bimbila, a yi durinye ŋa puu zaa, ka dabso buri u, a yi o pu, ka o karigi n loobi bintintaa, a maa tibila, niinsi ti maali a sona pa. 33 Niŋi n na, Yeesu daa n lee n bo kiŋaasa yindaana, a yeli, Naawun naalim niŋini maa poga n ŋoo zum gariwa, ka niŋi yiisi niŋi a niŋi, a zaa fuŋsi. 34 Yela ŋa zaa Yeesu daa n bo a ni kiŋaasasi, a wusi zamusi maa, ka bi yeli yela zaa wusi ba, ka pa kiŋaasa. 35 ?ama ti seema Naawun chaame Azaya n daa n yeli kusu zaa la loobi yamonsi, a yeli, M ni bo kiŋaasasi, a wusi yaseesi n sogi, a yi durinye piiligu zaa. 36 Niŋi n na, Yeesu daa n yi zamusi maa puu kpe dii, o nyaaŋpaariba ta o saani, a ti yeli u, Wusi ti bumburibeeri la kiŋaasa gbinni. 37 Yeesu yeli ba, So n buri bumburisuma maa n niŋi mani Naawun Nisaala, 38 ka pu maa mi niŋi durinye ŋa, ka bumburisuma maa mi niŋi seesi n ya n kpe Naawun naalim puwa, ka bumburibeeri maa mi niŋi seesi n ya n kpe Sitaana saani, 39 ka dimma maa n buri bumburibeeri la mi niŋi Sitaana gbagba, ka bini maa naagirisim jemani mi niŋi durinye ŋa baasigu, ka seesi n naagira a maa mi niŋi Naawun malakisi. 40 Seema ba n laŋsi bimbeeri maa kusi bugum la niŋini maa seema durinye ŋa baasigu n ya n ti be. 41 O gbinni niŋi maa mani Naawun Nisaala ni tumi m malakisi, ba ti laŋsi yaseesi n taasira yabeeri, a ni yabeniŋiniba zaa, a yi m naalim maa puwa, 42 a lobi n niŋi bugum, ba nye beerim ga, a kumi. 43 N ŋa n ti baasi, nivusuma ko n che n ba ba ba Naawunni naalim puwa, a nyagsira maa wuluŋu. So n niŋi wumina, cheli o wumi. 44 Niŋi n na, Yeesu daa n lee n yeli, Naawun naalim niŋini maa bindaalim bini n sogi, a yi pu, ka dabso wa ti nye a, a ni pupeelim, ka lee n sogi a, ka wa ti koosi o bunso zaa, a da pu maa. 45 Ya lee n nyaasi, Naawun naalim lee n niŋini maa yawudira n kpabira kugsuma, 46 ka nye yindaana n mari ligiri gaari a zaa, o wa ti koosi o bunso zaa, a da u. 47 Ya lee n nyaasi, Naawun naalim lee n niŋini maa kisiwu ba n naa n lobi n niŋi teeku puwa, a gbaa korotosi zaa yiri. 48 O n ti paali, ba darigi a gaa kuŋkunni, ba wa ti gamsi, a naa bunsuma maa niŋi peeri puwa, ka naa bindagiri la basira. 49 N ŋa niŋini maa seema malakisi n ya n niŋi, a yi durinye ŋa baasigu, a gamsira nivubeeri ni nivusuma, 50 ka naa nivubeeri maa lobi n niŋi bugum, ba nye beerim ga, a kumi. 51 Ka Yeesu boosi ba, Ya wumi a zaa? Ba sagi. 52 O lee n yeli ba, Zaaliguwusira zaa n dee Naawun naalim yela niŋini maa yidaanso n mari bindaalim bini, buŋkura ni bimpaala, ka naag a moligira niriba. 53 Yeesu n daa n bo kiŋaasasi maa baasi, o yi nisaaniŋi, 54 a we o gbagba tiŋŋa, a wa ti wusi ba, a yi ba laŋsigu dii, a ku ba noya, ba yeli, Ee, dabaa mari yam, a ni yatintaasi, 55 ama dimeera maa bii n na, ka Mariama mi niŋi o ma, ka Jeemsi ni Joosefi ni Simon ni Juuda mi niŋi o sunzoba, 56 ka o sunzopogiba mi ba niŋi, a zu, wula n na o niŋi n nye yam maa, a ni yatintaasi maa? 57 Ka ba nyaasi u jaga. Yeesu yeli ba, Naawun chaame yuuri duura seela zaa, ama o gbagba tiŋŋa, a ni o yiri, o yuuri ki du. 58 Yeesu mi bi niŋi yatintaasi ga nisaaniŋi, a kpali ba n bi niŋi u yeride la zu.
