Matiyu 12

1Dindaso, daborigu daari, Yeesu ni o nyaaŋpaariba daa n chaŋina puuri, ka kom gbaag o nyaaŋpaariba maa, ba meemina chi biisi ŋobira. 2Farisii dima n ti nye n ŋa, ba yeli Yeesu, Nyaasi, e nyaaŋpaariba zagsini ti zaaligu, ni ba da meemina chi ŋobira daborigu daari. 3Yeesu yeli ba, Ya nyaasi, kom n daa n gbaa naaba Dawuda ni o taaba kusu zaa la, 4ba kpe Naawun tanti dii, a wa ti ŋobi paanuseesi ba n naa n ti Naawunni la, seesi buŋkobkuuriba ko n mari daama ba ŋobira la. 5Ya lee n nyaasi, ti Juusi dima zaaligusi puwa, ba sebi n digili, ni ka Naawun dii buŋkobkuuriba ku buŋkobiri tira Naawunni daborigu daari, o bi niŋi yabee. 6Ama yamonsi, so n gaari Naawun dii bani kpe. 7Naawunni kpabira niriba ba zora taaba nimbaa, a gaari ba n ku buŋkobiri tira u. Ka ya di baŋŋi yela ŋa gbinni, ya di ki yeli, ni yasuma dima liya. 8Mani Naawun Nisaala n niŋi dabora zudaana. 9Niŋi n na, Yeesu daa n wa ti kpe ba laŋsigu dii, 10ka nukpiiŋu daana ba niŋi, ka niseesi lugsi Yeesu noori, a boosi u, Ti zaaligu sagiya, ni ba tibi nira daborigu daari? 11Yeesu yeli ba, Ya nyaasi, ka ya so zaa mari pee, ka daborigu daari o li bogiri puwa, o daana ni wa ti nyisi u. 12Nisaala mi gaari pee, a zu, o veela ti niŋina yasuma daborigu daari. 13Ka Yeesu yeli nukpiiŋu maa daana, ni o teeg o nuwa, o tee, o nye kpeeŋu maa wune la daana. 14Niŋi n na, Farisii dima yi n to jina seema ba n di n niŋi n ku Yeesu. 15Niŋi n na, Yeesu daa n baŋŋi seema ba n kpabira ba niŋi, ka yi n gaa seela, ka nivudamta mi pa o zu gaari, ka o tibi ba zaa, 16ka yeli ba, ni ba da yetira o yela. 17N ŋa ti yaseesi Naawun chaame Azaya n daa n yeli kusu zaa la loobi yamonsi. Seema o n daa n yeli maa n ŋa. 18Nyaasi, mani Naawunni tumtumina n ŋa, ma nyisi u, ka kpabira u ga, ka o peri ma ga. M ni naa m sii ti u, o wusira balisi yamonsi. 19O ki zabi, koo a tasi, ka ba ki wumi o goo, a yi soya puusi, 20ka seesi n ka kpeeŋu, o ni mari ba boin, ka moligira ba, ka ti yamonsi o di, 21ka balisi zaa ni mari tama, a kpali o zu. 22Niŋi n na, ba daa n mari kikpaarigusi daana n niŋi zooma ni namu ta Yeesu saani, ka o tibi u, o togsira, ka nyaara, 23a ku niriba maa zaa noya, ba yeli taaba, A koo naaba Dawuda yaŋŋu, so n ya n ta la n na la. 24Farisii dima n ti wumi n ŋa, ba yeli, Kikpaarigusi zudaana Beezibu n ti u daama maa o katira kikpaarigusi la. 25Yeesu baŋŋi ba feri ŋa, ka yeli ba, Ya nyaasi, ka paaligu, koo tiŋŋa, koo yiri barigi n zabira, o ni ŋma. 26Lala n na, ka Sitaana katira Sitaana, o loobi bayi, o naalim ki lee n tee n di. 27Ya lee n nyaasi, ka m di naa Beezibu daama katira kikpaarigusi, o gba daama n na ya biisi naa n katira a. A zu, barima ni di ya seriya. 28Ama ka Naawun sii daama n na, ma naa n katira a, Naawun naalim ta ya saani. 29Ya lee n nyaasi, ka ba bi le kpeeŋu daana, nira zaa ki tee n kpe o yiri zu bini. 30So zaa n bi paara m zu zabira ma, ka so n bi paasi m niŋi n laŋsira pisimina. 31Ya lee n nyaasi, Naawunni ni tee n che nisaala zaa yabeeri paŋŋi u, halli o yaniŋisa, koo o yatogibeeri, koo mani Naawun Nisaala tuubu, a zaa mari cheebu, ama ka niso zaa niŋi Naawun sii yabeeri o yabeeri maa ka cheebu, a wara saŋa ni saŋa zaa. 33Ya nyaasi, tisuŋŋu zaa wanna walisuma, ka tibee mi wanna walibeeri. 34A zu, yarima nivubeeraa ki tee n togsi yasuma, a kpali bo, ya feribeeri n ti ya togsira yabeeri. 35Lala n na, nivusuŋŋu ferisuma ti o niŋina yasuma, ka nivubee mi feribeeri ti o niŋina yabeeri. 36A zu, ka Naawunni ti di so zaa seriya, ba ni di ya yatogasi zaa seriya, 37ka seesi yatogasi ki ti ba li, ka seesi yatogasi mi ni ti ba li. 38Niŋi n na, zaaliguwusiriba ni Farisii dima daa n yeli Yeesu, Karichi, ti kpabira e niŋi mamaachi yela ti ti. 39Yeesu yeli ba, Pimpariŋa dima niŋini nivubeeri, ba yi kpabirini m niŋi mamaachi yela, ba nyaasira, ba mi ki nye yelli zaa, ka pa Naawun chaame Joona yelli la ko. 40Seema chaame maa n daa n ba korotokarigu puu niŋi daba ata, wuntooŋu ni yiiŋu la, lala n na, mani Naawun Nisaala ni ba kaa puwa, m daba ata, wuntooŋu ni yiiŋu. 41Ya nyaasi, Naawun seriya diibu daari, Niniva dima ni nyisigi, ka pimpariŋa dima ba mi nyisigi, Niniva dima ba yeli, ni pimpariŋa dima liya. A kpali bo, kusu zaa Naawun chaame Joona daa n we Niniva wa ti wusi ba Naawun yela, ba dee ba saamiya, ka pimpariŋa niso n gaari Joona ba kpe, ka ya kpe dima bi dee ya saamiya. 42Lala n na, pogso n niŋi naaba la daa n yi wogilawogila n niŋi kiŋkagili ta, o ti wumi naaba Sulimaana yam la, poga maa gba ni nyisigi n yeli, ni pimpariŋa dima liya, a kpali bo, so n gaari naaba maa ba kpe, ka ya kpe dima bi wumi n tira u. 43Ya nyaasi, ka kikpaarigu ti yi kikpaarigu daana niŋi, o ni dee kokpagu ziisi wara, a gaa n kpabira seela o n di n kpe, ka kpabi n je, 44ka ŋme sufu o lee n wa ti kpe seela o n yi la. O n ti paa niŋi, seela zaa veela, ka bunso zaa lee n ka niŋi, 45o wa ti booli kikpaarigusi ayapoin n be n gaari u, a zaa ti du nira maa. A zu, nira maa nye nam ga, a gaari piiligu la. Ka ma yeli ya, n ŋa ya n niŋi pimpariŋa dima nivubeeri gba. 46Yeesu na n wusira niriba la, o ma ni o sunzoba ti za yaŋŋa, a kpabira u, 48niso yeli Yeesu, ka Yeesu yeli u, M ya n yeli i ni niseesi n niŋi m ma ni m sunzoba, ka teeg o nuu wusi o nyaaŋpaariba, ka lee n yeli, Nyaasi, m ma ni m sunzoba n ŋa. 50So zaa n niŋina m ba Naawunni kiperi niŋini m sunzo, a ni m sunzopoga, a ni m ma.

will be added

X\