Matiyu 11

1Yeesu n daa n wusi o nyaaŋpaariba pii ni bayi maa baasi, o chaŋŋi tiŋsi, a wa ti wusira niriba. 2A jemani maa, Jon Baatisi ba n daa n yo dii la wumi Yeesu yaniŋisa, ka tumi o nyaaŋpaariba ba gaa Yeesu saani, 3a wa ti boosi u, Nyini n niŋi so n ya n ta la bee, ti kpari n kpabira yindaana? 4Yeesu yeli ba, Ya wa ti yeli Jon Baatisi yaseesi ya n wumi, ka nye, 5seema zoomasi n nyaara, ka boobisi chaŋina, ka koritedima nyaara alaanfiya, ka tikpiya wumina, ka kpiinsi nyisigira, ka nandaandima wumina baarusuma, 6ka seesi n tira ma jilima nyaara barika. 7Niŋi n na, Jon Baatisi nyaaŋpaariba maa wara, ka Yeesu naa Jon Baatisi yela yeli zamusi maa, Ya n daa n we dalimpii paaligu la, ya bi we ya wa ti nye sauwa n damtira moori, 8koo dabso n pili binsuma, a kpali bo, seesi n pinna binsuma bani nadima saani. 9Ama ya daa n wa ti nyeni Naawun chaame. Yamonsi n na, o mari daama gaari Naawun chaame, 10a kpali bo, o yela n na Naawunni n daa n ti ba sebi n digili kusu zaa la, a yeli, Ya nyaasi, m ni tumi m tumtumina, o maali e soori poin, ka e ta. 11Yamonsi ma yeli ya, a yi pogiba biisi puwa, so zaa bi gaari Jon Baatisi, ama a yi Naawun naalim puwa, so n niŋi bibilidaana gaari u. 12Ya nyaasi, a yi Jon Baatisi jemani, a ti yini zinni, Naawun naalim nyeni bobirisim, nivubeeri bobi u kpeera. 13Kusu zaa Naawun zaaligusi, a ni Naawun chaamesi zaa daa n togsira Naawun naalim yela, a ti paa Jon Baatisi jemani, 14ama ka ya ni sagi, wune n niŋi Alayija, so n daa n ya n ta la. 15So n niŋi wumina, cheli o wumi. 16Ya nyaasi, m ni wusi ya seema pimpariŋa dima n be. Ba niŋini maa biisi n zi daa puwa, a boona taaba, a yetira, 17Ti n pemsi kabila niŋi ya, ya bi wa. Ti n kumina, ya bi kumi. 18O gbinni niŋi maa, Jon Baatisi n daa n ta, ka bi dira, ka bi ŋuura daam, ya yeli kikpaarigusi n mari u. 19Ka mani Naawun Nisaala ta, a dira, ka ŋuura, ya yeli, ni m kpabira bindira ni daam ga, ka niŋi lampoo deegiriba ni yabeniŋiniba zo. Ya nyaasi, seesi n dee yam baŋŋi maa, yam maa niŋini yamonsi. 20Niŋi n na, Yeesu daa n togsi tiŋseesi o n daa n niŋi yatintaasi ga, ka ba bi dee ba saamiya la yela, a yeli, 21Ya Chorazin dima ni Beseeda dima, ya ni nye nam ga, a kpali bo, mamaachi yaseesi ni daa n niŋi, a yi ya puwa, ka a di daa n niŋini Taya ni Sidon tiŋsi puwa, ba di dee ba saamiya, ka pili kparicheesi zi tampeelim niŋi, niriba ba baŋŋi ba n dee ba saamiya. 22A zu, ka Naawunni ti di durinye seriya, ya ni nye nam gaari Taya ni Sidon dima. 23Ka ya Kapaanim dima, ya ki paa Alizaana, ya ni sigi n gaa bugum ziya, a kpali bo, mamaachi yaseesi ni daa n niŋi, a yi ya puwa, ka a di daa n niŋini Sodom tiŋŋa puwa, tiŋŋa maa di ba niŋi, a ti yini zinni. 24A zu ma yeli ya, a yi seriya diibu daari ya ni nye nam gaari Sodom paaligu dima. 25A jemani maa Yeesu daa n yeli, M ba Naawunni, nyini n niŋi duuma yi saazu ni tiŋŋa zaa, m kpeesira i ni, a kpali bo, e kiperi zu e sogini yela ŋa, a yi yambaŋiniba saani, ka ti biisi ba wumina a gbina. 27Ka Yeesu lee n yeli, M ba Naawunni ti ma ni daama zaa, ka so zaa bi baŋŋi ma, ka pa m ba, ka so zaa mi bi baŋŋi m ba, ka pa mani, a ni so zaa ni kpabira m wusi. 28Ya seesi zaa n tumi n beligi, ya ta m saani, m nyisi ya jeerisi, 29m ni ya ti tumina, ka m wusira ya. Mani n ba boin, ka ni ti ya siisi nye vuusim. 30So zaa n tumina m saani ki tumi n beligira.

will be added

X\