Matiyu 10

1Niŋi n na, Yeesu daa n booli o nyaaŋpaariba pii ni bayi, ka ti ba daama ba katira kikpaarigusi, ka tibira toora zaa. 2Nyaaŋpaariba maa niŋi o tumusi, ba yuya n ŋa, Simon, so ba n boona Piita la, a ni o sunzo Andiru, a ni Zebidi bii Jeemsi ni o sunzo Jon, 3a ni Filipi, a ni Baatolimi, a ni Tomasi, a ni Matiyu lampoo deegira, a ni Alifiisi bii Jeemsi, a ni Tadiya, 4a ni Simon Keenim, a ni Juudasi Ikaroti, so n ya n koosi Yeesu la. 5Niŋi n na, Yeesu daa n ya n tumi o nyaaŋpaariba pii ni bayi maa, ka yeli ba, Ya da wara balisi tiŋsi, koo Samaariya dima tiŋsi, 6ama ya wara Juusi dima tiŋsi ko. Barima n niŋi maa peseesi n borigi, 7ya wa ti yeli ba, ni Naawun naalim ya n tani, 8ka tibira baaradima, a ni koritedima, ka tira kpiinsi nyevuya, ka katira kikpaarigusi. Naawunni ti ya ni jaga, ya gba ya wa ti ti jaga. 9Ya wara, ya da mari ligiri zaa gaari, 10a ni koligu ni bindira, a ni bimpinna ayi, a ni sabtaasi, a ni daŋkpalli. A kpali bo, a daga tumtumina n nyaara bindira. 11Tiŋŋa zaa ya n wa ti kpe, ya kpabi nivusuŋŋu yiri kpe, a wa ti ba niŋi, halli ka ti yi tiŋŋa maa puwa. 12Ya pa ti kpe yiri puwa, ya yeli, Naawunni ti ya niŋgbirimaasim. 13Nisaaniŋi, ka ba mari ya nene, ya ti niŋgbirimaasim maa o ba niŋi. Ama ka ba bi mari ya nene, ya da ti niŋgbirimaasim maa o ba niŋi. 14Lala n na, ka so zaa zagsi ya deegirisim, koo ya wuminisim, ka ya ti yi nisaaniŋi, ya pisigi ya noba tana basi, ba baŋŋi ba n bi niŋi nene. 15Yamonsi ma yeli ya, a yi Naawun seriya diibu daari, tiŋŋa maa dima ni nye nam, a gaari Sodom ni Gomora tiŋsi dima. 16Ya nyaasi, ka m ti tumi ya maa, ya ni niŋi maa peeri, ka sibonasi poli n jili ya. A zu, ya niŋi aniya mari yam maa waagi, ka niŋina yasuma ko, a maa kilisi. 17Ya dasi niriba niŋi, a kpali bo, ba ni gbaa ya gaa kuwatisi, ka feebi ya, a yi ba laŋsigu diisi puusi, 18ka ti gominasi ni nadima ba dira ya seriyasi. Lala n na ya ni nye daama naa m yela wusi ba ni balisi, m yuuri o du. 19Ama ka ba ti gbaa ya n ŋa, ya da ti yaso ya n di n yeli maa tiri ya, a kpali bo, a jemani maa ya ba Naawunni ni ti ya o siya, ya baŋŋi yaso ya n di n yeli. 21A jemani maa daba ni ti ba ku o beeri, koo o sunzo, koo o biya, ka biisi gba ba zagsi ba niriba, ka ti ba ku ba, 22ka so zaa ba chisi ya yela, a kpali m zu. Ama ka so n bi zagsi ma, a ti paag a baasigu, o ni nye moligirisim. 23Ya nyaasi, ka ba namsira ya, a yi tiŋyindaana, ya zo n gaa tiŋyindaana. A ni naa zaa, ya ki paa Juusi dima paaligu tiŋsi zaa, ka mani Naawun Nisaala ti ta. 24Ya lee n nyaasi, bamsira bi matira daama gaatira so n wusira u, ka tumtumina mi bi matira daama gaatira o yidaana. 25Ama ka bamsira la paag o wusira la, koo, tumtumina la paag o yidaana la, lala veela. Ama ka ba tuura yiridaana, ni o niŋini maa Sitaana, ba ni tuura o yidima gba. 26A zu, ya da zora ba dabeem, a kpali bo, yaso zaa n pili, o ni yoo, koo yaso zaa n sogi, ba ni nye u. 27A zu, yaseesi ni sogi n wusira ya, ya ti so zaa ba baŋŋi, ka yaseesi ni waasi n yeli ya, ya tasi a piisi zuuri. 28Ka seesi di n tee n ku ya niŋasi, ka ki tee n ku ya siisi, ya da zora ba dabeem, ama ya zora Naawunni dabeem, wune ni tee n ku niŋa ni sii zaa, a yi bugum ziya. 29Ya nyaasi, halli jelinjeesi ka ligiri, a luŋko zaa ki tee n li tiŋŋa, ama ya ba Naawunni n sagi. 30O gba baŋŋi seema ya zukoba n sagi. 31Ama ya wune ya mari tono ga, a gaari jelinjeesi, a zu, ya da zora dabeem. 32So zaa n tira ma jilima, a yi niriba nufu niŋi, m gba ni ti u jilima, a yi m ba Naawunni saani. 33Ama so zaa n zagsi ma, a yi niriba nufu niŋi, m gba ni zagsi u, a yi m ba Naawunni saani. 34Ya da fe maa, m marini niŋgbirimaasim ta durinye ŋa puwa, zabiri n na ma ma n ta. 35A kpali bo, m ni ti bii ni o ba ba mari naŋgbana ayi, a ni bii ni o ma, a ni deendima, 36ka daba ni o dindima ba ba yiri luŋko. 37So zaa n kpabira o ba, koo o ma, a gaari ma, o bi daga o n pa m zu. Ka so zaa n kpabira o bii gaari ma mi bi daga o n pa m zu. 38Ka so zaa n bi kpabira o nye nam pa m zu mi bi daga o n pa m zu. 39So zaa n kpabira o nyevuri ni koŋŋi u, ama so zaa n koŋŋi o nyevuri, m yuuri zu, ni nye u. 40So zaa n deegira ya deegira ma, ka so n deegira ma deegira so n daa n tumi ma la. 41So zaa n dee Naawun chaame, a kpali o n niŋi Naawun chaame la zu, o ni nye Naawun chaame laada. Ka so zaa n dee nivusuŋŋu, a kpali o n niŋi nivusuŋŋu la zu, o ni nye nivusuŋŋu laada. 42Ka so zaa n ŋoo komaasim ti m nyaaŋpaariba bibilidaana gba, a kpali o n niŋi m nyaaŋpaara la zu, o gba ni nye o laada. Yamonsi n na.

will be added

X\