Maaki 7

1Dindaso Farisii dabseesi ni zaaliguwusiriba n yi Jiruusilim daa n ti laŋsi Yeesu saani, 2ka nye Yeesu nyaaŋpaariba seesi n bi pegi ba nuusi poin, ka dira. 3Farisii dima ni Juusi dima zaa yi pegini ba nuusi poin, ka dira, a kpali bo, ba yaayela n na. 4A zu, ka ba yi yi kulonni zu ta, ka na bi pegi ba nuusi, ba ki sagi n di. Ka ba yaayadamta seesi na ba niŋi, ba niŋina a, a maa seema ba n pegira kopusi ni duguri ni katisasi la. 5Lala zu, Farisii dabsi maa ni zaaliguwusiriba maa boosi Yeesu, Wula n na e nyaaŋpaariba maa bi pa ti yaayela zu, ka naa nudagiri dira? 6Yeesu yeli ba, ya niŋini yomsiriba. Seema Naawun chaame Azaya kusu zaa n daa n yeli ya yela digili la niŋini yamonsi. O yeli, Niriba ŋa kpeesira Naawunni, a ni naŋgbana, ama ba sufusi niŋi ba bi kpabira u. 7A kpali bo, ba naa nisaala yaayela wusira niriba, ka bi wusira ba Naawun zaaligu. A zu, ba kpeesigu maa bi peri Naawunni. 8Ka Yeesu lee n yeli ba, ya yi niŋini ya yaayela, ka zagsi Naawun zaaligu, 9ka fe maa, seema ya n zagsi Naawun zaaligu maa, ka niŋi ya gbagba yaayela, niŋi yam yela. 10Ya nyaasi, Naawun chaame Musa daa n yeli kusu zaa, ni niriba ba niŋina ba ba ni ba ma jilima. Ka lee n yeli, ni so zaa n togsi yabee ŋmeŋsi o ba, koo, o ma, cheli ba ku u. 11Ka ya wune, ka niso yeli o ba, koo o ma, ni tonoso ba n di n ya n nye o saani maa o naa n ti Naawunni, 12ya ki lee n sagi o naa n tira ba. 13Lala n na, ya zagsi Naawun zaaligu, ka niŋina ya yaayela. Ka n ŋa yadamta mi ba niŋi, ya niŋina a. 14Niŋi n na, Yeesu daa n booli zamu ba ta, ka yeli ba, Ya zaa, ya chisi tuba wumi, ka baŋŋi a. 15Bunso zaa n yi yaŋŋa kpe nivu niŋi, ki tee n loobi u nivubee, ama binseesi n yi nivu niŋi yiira n loobira u nivubee. 16So n niŋi wumina, o wumi. 17Niŋi n na, Yeesu cheli zamu maa, ka kpe dii, ka o nyaaŋpaariba boosi u kiŋaasa maa gbinni. 18Yeesu yeli ba, Ya gbagba bi baŋŋi o gbinni? Ya nyaasi, bunso zaa n yi yaŋŋa kpe nivu niŋi ki tee n loobi u nivubee. 19A kpali bo, o bi kpe o sufu niŋi, ka kpe o puu niŋi, ka mari o niŋa niŋi yi. Lala n na Yeesu yeli, ni bindira zaa veelini ba dira. 20Ka o lee n yeli, ni binseesi n yi nivu niŋi loobira u nivubee, 21a kpali bo, feribeeri yiirini sufu niŋi, ka ti seesi saamina diisi, seesi mi zuura, seesi mi kuura, seesi mi kpabira ba taaba pogiba, 22seesi mi kpabira ba taaba bini, seesi mi mari halibee, seesi mi ŋmaara jiri, seesi mi niŋina yabeeri ga, seesi mari pubeerim, seesi tuura taaba, seesi mi poo, seesi bi kpabira yasuma. 23Yabeeri ŋa zaa yini sufu niŋi, ka tira nivu niŋi nivubee. 24Niŋi n na, Yeesu daa n nyisigi n we tiŋseesi ba n boona Taya ni Sidon la paaligu, ka wa ti kpe diyindaana, ka bi kpabira nira zaa ba baŋŋi o yela, ka sogi n je. 25Niŋi n na, pogso wumi Yeesu yela, o bi niŋi Juusi poga, ama ba daa n dogi u ni Foniisiya paaligu puwa, ka o bipuŋbila mari kikpaarigusi. O n wumi Yeesu yela maa, o we o saani, a wa ti fa n li o noba niŋi, ka suusi u o kari kikpaarigusi maa, a yi bipuŋŋu maa niŋi. 27Yeesu yeli u, Cheli biisi ba di poin. A bi veela m naa biisi maa bindira ti baasi. 28Poga maa yeli u, M duuma, yamonsi n na, ama baasi ba teebul gbinniŋi, a dira biisi bindira seesi n fa n liira la. 29Yeesu yeli u, A kpali e n yeli n ŋa zu, kunna, kikpaarigusi maa yi e bii maa niŋi. 30Niŋi n na, poga maa kuli, ka wa ti nye o bii n do gideu zu, ka kikpaarigusi maa lee n ka o niŋi. 31Niŋi n na, Yeesu daa n yi paaliguso Taya n be la, ka dee Sidon, a we paaliguso tiŋsi pii n be la, ka pori n gaa Galili beeŋkarigu. 32Niŋi n na, ba mari tikpiriso n bi wumina, ka bi togsira nene ta, ka suusi Yeesu, ni o naag o nuu pa o niŋi, a tibi u. 33Niŋi n na, Yeesu mari u yi zamu maa niŋi, a gaari o ko, ka naag o nubilisi niŋi o tuba niŋi, ka tusi nuntoori siisi o zulimini, 34ka nyaasi saazu, ka siimi, ka yeli daba maa, ni o tuba a yoo. 35A puli maa niŋi, o tuba yoo, ka o togsira nene. 36Ka Yeesu kpaasi ba tuba, ni ba da yeli nira zaa. Ka seema o n kpaasi ba tuba, ba da yeli yela maa, ba zagsi, ka yeli yela maa ga. 37Ka seesi zaa n wumi yela maa, a ku ba noya ga, ba yetira, ya nyaasi, o niŋina yaso zaa nene. Halli o ti tikpiri wumina, ka togsira.

will be added

X\