1 Dindaso Yeesu daa n wusira, a yi Galili beeŋkarigu noori, ka zamutintaa laŋsi n poli n jili u. A zu, o wa ti kpe ŋariŋu puu zi, ka ŋariŋu maa barigi kuŋkunni maa beela, ka zamu maa zaa za kuŋkunni. 2 Niŋi n na, Yeesu naa kiŋaasasi wusi ba yadamta, ka yeli, 3 Ya wumi. Dabso nyisigi, a niŋi kokpaara, ka wa ti yaatira o bumbura. 4 O n yaatira maa, seesi fa n li soori puwa, niinsi ti naag a di. 5 Seesi mi fa n li kparibunyena niŋi, seela tanni n bi zoo, a zu, a buli yoom, 6 ka, a kpali a nyaga maa na n bi kpe limsim la zu, wuluŋu gbaag a, a kpi. 7 Seesi mi li goosi puwa, goosi maa karigi n nyaŋŋi a, a bi wali. 8 Seesi mi li tansuŋŋu puwa, a buli, a karigi nene, a wali biisi. Seesi wali biisi pisita, seesi wali biisi pisiyoobu, ka seesi wali biisi koowa. 9 Yeesu n ti bo kiŋaasa maa baasi, o yeli, So n niŋi wumina, o wumi. 10 A n daa n ti niŋi beela, ka zamu maa lee n ka, o nyaaŋpaariba pii ni bayi maa, a ni niseesi daa n ti boosi Yeesu kiŋaasasi maa gbina. 11 Yeesu yeli ba, Naawunni sagi ya baŋŋi o naalim yaseesi niriba n bi baŋŋi. Ama seesi zaa n che la wumina kiŋaasasi maa, ka ki baŋŋi a gbina. 12 A kpali bo, ba ni nye, ka ki nye a gbina, ba ni wumi, ka ki baŋŋi a gbina, ka ki cherigi ba sufusi, ka Naawunni ki che ba yabeeri paŋŋi ba. 13 Niŋi n na, Yeesu daa n yeli ba, ka ya bi baŋŋi kiŋaasa ŋa gbinni, wula n na ya ni niŋi n baŋŋi kiŋaasasi zaa n che la gbina? 14 Ya nyaasi, kiŋaasa ŋa gbinni n ŋa. Niso n yaatira bumbura maa niŋini maa so n wusira Naawun yela, ba wumina. 15 Ba seesi n wumina la seesi niŋini maa bumbura seesi n li soori puu la, ka Sitaana ta yoom, ka nyisi yela maa, a yi ba sufusi niŋi. 16 Ka ba seesi n wumina la seesi niŋini maa bumbura seesi n li kparibunyena niŋi, ba yi wumi, ka deeg a, a ni pupeelim, 17 ba mi ka nyaga, ka deeg a daba ayi ko. Dindaso, ka ba yi ti ba toom puwa, a kpali yela maa zu, ba zagsi a. 18 Ka ba seesi n wumina la seesi niŋini maa bumbura seesi n li goosi puwa, ba yi wumi, 19 ka ti nyisigi n wara, ka feera ba nam ni bini yela ni kiperi yaniŋisa, a nyaŋŋi Naawun kiperi, Naawunni bi nye tono, a yi ba puwa. 20 Ka ba seesi n wumina la seesi niŋi maa bumbura seesi n li tansuŋŋu puwa, ba deeg a, Naawunni nye tono yi ba puwa, a maa seema waliseesi n moogira, seesi nye biisi pisita, seesi pisiyoobu, seesi koowa. 21 Niŋi n na, Yeesu daa n lee n bo ba kiŋaasa yeli, Niso zaa ki kusi katulli, ka naa ŋmamini pili o niŋi, koo, a naa n niŋi gideu gbinniŋi, ama o naa n zaali seela n tira paaligu. 22 Yaseesi zaa n sogi, ba ni nye a, ka yaseesi zaa n pili, ba ni piligi a. 23 So n niŋi wumina, o wumi. 24 Ka Yeesu lee n yeli ba, Ya chisi tuba, ka wumi. Seema e n bugsi n tira niriba, lala n na Naawunni ni bugsi n ti i, ka lee n naa n paasi i. 25 So n mari ni nye n paasi, ka so n bi mari, ba ni deeg o bini zaa. 26 Ka Yeesu daa n bo kiŋaasa yeli, Naawun naalim niŋini maa dabso n buri bini, 27 ka yiiŋu zaa o gbisira, ka nyisigira taaru zaa, ka bumbura maa bunna, ka karigira, ka daba maa bi baŋŋi seema a n niŋi n bunna, ka karigira. 28 Tanni maa yi ti a buli, ka karigi, ka wali. 29 Wala maa n ti moo, ba ŋma a, a kpali a jemani n paa. 30 Ka Yeesu yeli ba, Ya nyaasi, m ya n yeli ya ni Naawun naalim kiŋaasa. 31 Naawun naalim maa niŋini maa bumburiso n niŋi bimbila durinye ŋa puwa, 32 ba buri u, o buli, a karigi n loobi titintaa, a ni o wulikara, seela niinsi n nye maasim, ka maali a sona. 33 Niŋi n na, Yeesu bo kiŋaasadamta wusira ba Naawun yela, a sagi seema ba n di n tee n baŋŋi a gbina. 34 O n wusira ba maa, o yi boni kiŋaasasi wusira ba. Ama o ni o nyaaŋpaariba yi ti ba niŋi, o wusira ba a gbina zaa. 35 A dindaari, zaanoori, Yeesu daa n yeli o nyaaŋpaariba, Ya cheli ti du beeŋkarigaa. 36 Niŋi n na, ba naa ŋariŋu so Yeesu n be maa, a gaari, ka che zamu maa, ka ŋarima seesi mi ba niŋi. 37 Ba n wara maa, sautintaa ti vaara, koom damtira, ka kpeera ŋariŋu maa puwa, o ya n muri. 38 Ka Yeesu ba ŋariŋu maa nyaaŋa, a kogi zukogu gbisira, ba wa ti nyisigi u, ka yeli, Karichi, ti ya n dini koom, o bi tiri i? 39 Niŋi n na, Yeesu nyisigi, ka kari sauwa maa, ka yeli koom maa, ni a cheli vu, ka da lee n damtira. Zii zaa niŋi surim. 40 Ka o yeli o nyaaŋpaariba maa, Wula n na ya zora dabeem? Ya na bi niŋi ma yeride? 41 Dabeem gbaa ba ga, ba yeli taaba, Ee, wula daba n ŋa, halli sauwa ni koom zaa wumi n ti u?
