Maaki 13

1Yeesu n daa n yiira Naawun dii laanta maa puwa, o nyaaŋpaariba yindaana togsi Naawun dii yela, ni o mari birikisi suma, a ni disuma. 2Yeesu yeli u, Nyaasi a seema a n veela. Jemanso ni ta ba ŋma kpe zaa, ka ki ti biriki zaa o pa o todaana zu. 3Yeesu n daa n ti yi Naawun dii laanta la, o wa ti du zoso ba n boona Olivi la, ka zi seela o n di n tee n nye Naawun dii maa, ka o nyaaŋpaariba banaasi ti boosi u bunso. Barima n niŋi Piita ni Jeemsi ni Jon ni Andiru, ka ba yeli Yeesu, 4Jemambo n na yaseesi e n yeli maa ya n niŋi? Ka wula n na ti ni niŋi n baŋŋi a n pa n ya n ti niŋi? 5Yeesu yeli ba, Ya dasi, niriba ba da yomsira ya, 6a kpali bo, nivudamta ni naa m yuuri ta, a ti yeli, ni barima n niŋi so n ya n ta la, ka yomsi nivudamta ga. 7Ya pa ti wumi towusi ni zabiri yela, ya da zora dabeem, a kpali bo, a zaa ni niŋi poin, ka baasigu maa na bi paa. 8Baligusi ni zabira taaba, ka paaligusi dima gba ba zabira taaba. Seelasi tiŋŋa ni yigsira, ka kom o li. Yela ŋa ni niŋi beerim maa piiligu. 9Ya gbagba ya dasi ya maŋsi niŋi, a kpali bo, ba ni gbaa ya gaa kuwati, ka bu ya yi laŋsigu diisi puwa, ka gominasi ni nadima di ya seriya, a kpali ya n paara m zu, ka ya yeli ba m yela. 10Poin, ka bunso zaa baasigu paa, baligusi zaa ni wumi m baarusuma. 11Ba ti ya n di ya seriya, koo, ba ti niŋi ya bunso, ya da ti yaso ya n di n yeli maa tiri ya. A jemani paaya, ya ni yeli bunso zaa Naawun sii n ti ya yetira, a kpali bo, pa yarima ni togsi, Naawun sii ni togsi. 12A jemani maa daba ni ti ba ku o beeri, koo o sunzo, koo o biya, ka biisi gba ba zagsi ba niriba, ka ti ba ku ba, 13ka so zaa ba chisi ya yela, a kpali m zu. Ama ka so n bi zagsi ma, a ti paag a baasigu, o ni nye moligirisim. 14Yeesu daa n lee n yeli, Dindaso ya ni nye ba naa bimbee zaali seela o n bi daga o ba niŋi, a saamina yela. Cheli so n karimina baŋŋi o gbinni. A jemani maa ti paa, seesi n ba Judiya paaligu ba zo n gaari zoori zuuri. 15So n ba pii zu, o da sigi n kpe dii kaasi o bini gaari. 16Ka so n ba pu, o da kuli, a wa ti naag o waje. 17Ka seesi n mari puusi, a ni seesi ba n nyisimina ni nye nam. 18Ya suusi Naawunni yela ŋa o da niŋi waari jemani. 19A jemani maa ba ni nye nam ga, a gaari nam zaa n ba niŋi, a yi a piiligu, Naawunni daa n maali durinye la, a ti paa zinni. Ka ba ki nye nam ŋa zaa, ama jemani maa ko. 20Lala n na, ka nam maa ti yuu, nisaala zaa ki nye moligirisim, ama Naawunni booni daasi maa, a kpali niseesi o n nyisi la zu. 21Ya lee n nyaasi, ka niso yeli ya, ni ya nyaasi Kristu la, ni o bani kpe, koo nisaaniŋi, ya da niŋi u yeride. 22A kpali bo, niseesi ni nyisigi, ka ŋmaara jiri, ni ba niŋini Kristu, koo Naawun chaame, ka ba niŋi mamaachi yela, a kpabira ba yomsira seesi Naawunni n nyisi la gba. 23A zu n na, ma yeli ya yela ŋa poin, ya dasi ya maŋsi niŋi. 24Ka Yeesu daa n lee n yeli, Nam maa ti baasi, wuluŋu ni ŋmeriga ki ti paaligu, 25ka ŋmeribiisi a dammi saazu liira. 26A jemani maa ba ni nye mani Naawun Nisaala n chena, a yi sagbana puwa, a ni daama ga, a ni kpeeŋu. 27Ka m ni tumi malakisi ba ti laŋsi niseesi Naawunni n nyisi la, a yi durinye seela zaa, ba mari ba gaari Alizaana. 28Ya nyaasi tiso ba n boona figi la yela. O si n ti bosi, ya baŋŋi maa, see ya n see. 29Lala n na, ka ya nye yaŋama ŋa, ya baŋŋi maa, mani Naawun Nisaala potirisim paagira yoom. 30Yamonsi ma yeli ya, pimpariŋa dima zaa ki kpi, ka yela ŋa zaa niŋi. 31Saazu ni tiŋŋa zaa ni baasi, ka m wusigu ka baasigu. 32Jemanso yela maa ya n niŋi so zaa ka a baŋinisim, halli malakisi n ba Alizaana puwa, koo mani Naawun biya. Ti ba Naawunni ko n baŋŋi. 33Ka a kpali ya n bi baŋŋi jemani maa zu, ya dasi ya maŋsi niŋi, ka nyaasira. 34O niŋini maa dabso n wara seela, ka che o tumtuminiba, ka ti ba zaa tuma ba tumina, ka yeli so n nyaasira o dinoori maa o nyaasira nene. 35Lala n na ya gba ya nyaasira nene, a kpali bo, ya bi baŋŋi jemanso mani ya yidaana di n ta, halli yiiŋu, koo tunsuwa, koo nodakpaŋŋu, koo bogufifi. 36Ya nyaasira nene, m da ta, ka ya gbisira. 37Ka seema ni yeli ya n ŋa, lala ma yetira so zaa, ba nyaasira.

will be added

X\