Luuka 8

1A n ti niŋi daba ayi, Yeesu daa n chaŋina tiŋsi, a naa Naawun naalim yasuma, a wusira niriba. O nyaaŋpaariba pii ni bayi maa ni pogseesi paag u gaari, ka pogiba maa zoo, ka yi nyisi ba gbagba ligirisi, a paasira ba niŋi. Yeesu daa n tibi pogiba maa seesi toorasi, koo, a kari ba kikpaarigusi basi. Yinni niŋi Mariama Magiliini, Yeesu daa n karini kikpaarigusi ayapoin, a yi o niŋi. Yindaana niŋi Jowana, o sira niŋi Chuuza, ka niŋi naaba ba n boona Herodi la tumtumina. Yinni niŋi Suzana. 4Dindaso niriba daa n yi tiŋsi chena Yeesu saani, ka loobi zamutintaa, o bo ba kiŋaasa, a yeli, 5Dabso n nyisigi, a niŋi kokpaara, ka wa ti yaatira o bumbura. O n yaatira maa, seesi fa n li soori puwa, niriba chaŋŋi a niŋi, niinsi mi ti naag a di. 6Seesi fa n li kparibunyena niŋi, a buli, ka kpi, a kpali bo, a bi nye koom. 7Seesi li goosi puwa, goosi maa karigi n nyaŋŋi a, a bi wali. 8Seesi mi li tansuŋŋu niŋi, a buli, a karigi nene, a wali biisi koowa. Yeesu n yeli n ŋa baasi, o tasi n yeli, So n niŋi wumina, cheli o wumi. 9A n ti niŋi beela, o nyaaŋpaariba boosi u kiŋaasa maa gbinni. O yeli ba, 10Naawunni sagini ya baŋŋi o naalim yamonseesi niriba n bi baŋŋi. Niseesi zaa n che wumina kiŋaasasi maa ko, a kpali bo, ba ni nye, ka ki nye a gbina, ba ni wumi, ka ki baŋŋi a gbina. 11Kiŋaasa maa gbinni n ŋa. Bumbura maa niŋini Naawun yela. 12Seesi n li soori puu la niŋini niseesi n yi wumi, ka Sitaana ti nyisi a, a yi ba sufusi niŋi, ba da deeg a nye moligirisim. 13Seesi n li kparibunyena niŋi la niŋini niseesi n yi wumi, ka deeg a, a ni pupeelim, ba mi ka nyaga, ka dee daba ayi, ka ba ti ba toom puwa, ba zagsi a. 14Seesi n li goosi puu la niŋini niseesi n yi wumi, ama ka ba ti nyisigi n wara, ba feera ba nam ni bindaalim yela ni kiperi yaniŋisa, a yi nyevuya puwa. N ŋa, ka yela maa nyaŋŋi ba, ba da nye tono, a maa waliseesi n bi karigira nene. 15Ka seesi mini n li tansuŋŋu niŋi la niŋini niseesi n yi wumi, ka deeg a niŋi ba sufusi niŋi, a ni yamonsi, ka naa kenyiti nye tono, a maa waliseesi n moogira. 16Niŋi n na, Yeesu daa n lee n bo ba kiŋaasa yeli, Niso zaa ki kusi katulli, ka naa ŋmamini pili o niŋi, koo, a naag u niŋi gideu gbinniŋi. O ni naa n zaali seela so zaa ya n ti kpe, ka nye o paaligu. 17N ŋa n na, bunso zaa n sogi, ba ni nye u, koo, yaso zaa n niŋi zamba, ba ni nye u, ka baŋŋi. 18A zu, ya dasi ya maŋŋa niŋi seema ya n chisira tuba, a kpali bo, so n sali n mari ni nye n paasi, ka so n bi mari, ba ni lee n dee bunso o n fe maa, o mariya gba. 19Niŋi n na, Yeesu ma ni o sunzoba daa n ta, ka ki tee n paag o saani, a kpali zamu maa zu. 20Zamu maa yeli Yeesu, ni o ma ni o sunzoba ba n za yaŋŋa, a kpabira u. 21Yeesu yeli ba, Niseesi zaa n wumi Naawun yela, ka deeg a niŋina la, barima n niŋi m ma ni m sunzoba. 22Dindaso Yeesu ni o nyaaŋpaariba daa n kpe ŋariŋu puwa, o yeli ba, Ya cheli ti gali beeŋkarigaa, a gaari duuraa. A zu, ba naa n wara, 23ka Yeesu gbisira. Ba n wara maa, sautintaa ti vaara, koom damtira, ka kpeera ŋariŋu maa puwa, o ya n muri. 24A zu, ba wa ti nyisigi Yeesu, a yeli, Ti duuma, ti duuma, ti ya n dini koom. Niŋi n na, Yeesu nyisigi n kari sautintaa maa n damtira koom maa la, a zaa cheli, zii niŋi sirim. 25O yeli ba, Bo n na ya bi niŋi ma yeride? Dabeem gbaa ba, a ku ba noya, ba yeli taaba, Ee, ya nyaasi dabaa, halli sauwa ni koom zaa deeg o yela. 26A n ti niŋi beela, ba paa duuri maa. Niŋi n na, Gerasa dima paaligu be, o ni Galili paaligu sunsuu niŋi n na, beeŋkarigu maa do. 27Yeesu n yi ŋariŋu maa puwa, o nye dabyindaana n yi tiŋŋa maa puwa, ka mari kikpaarigusi. A yuuya, ka o na bi lee n pili bimpinna, ka bi doora dii, ka yi wa ti doora kaasi ziya. 28Ka jemanso zaa, kikpaarigusi maa daa n yi ti o kpeera yinyaari. A zu, ba daa n yi niŋi u abanasi, ka nyaasira u, ka o yi kabi abanasi maa, ka kikpaarigusi maa kari u gaari dalimpii paaligusi puusi. Daba maa n nye Yeesu, Yeesu yeli kikpaarigusi maa, ni a yi o niŋi. A zu, daba maa tasi n yeli, Yeesu, Naawun biya, da kpeera m yela niŋi. M suusira i ni, e da namsi ma. 30Niŋi n na, Yeesu boosi u, E yuuri? O yeli, M yuuri niŋi Zamu. Ba boona u lala, a kpali bo, o kikpaarigusi maa zooni ga. 31Niŋi n na, kikpaarigusi maa suusi Yeesu, ni o da ti a gaari bugum ziya. 32Ka pireekusi mi ba n zoo n za zoo zu, a dira. A zu, kikpaarigusi maa suusi Yeesu, ni o ti a wa ti kpe pireekusi maa niŋi. O ti a wa ti kpe. 33A zu, kikpaarigusi maa yi daba maa niŋi, a wa ti kpe pireekusi la niŋi, pireekusi maa chee n sigi zoo maa zu, a wa ti li beeŋkarigu maa puwa, a zaa di koom. 34Pireekukpagiriba maa n ti nye n ŋa, ba zo, a wa ti yeli tiŋŋa maa dima, a ni tiŋseesi n leeli nisaaniŋi. 35A zu, niriba maa yi, ba wa ti nyaasi yaso n niŋi maa, ka paa Yeesu, ka dabso kikpaarigusi maa n yi o niŋi la ba n zi Yeesu yiya, a pili bini, a ni alaanfiya. Dabeem gbaa ba, 36ka seesi n nye yela maa yeli ba seema dabso n di mari kikpaarigusi maa n nye kpeeŋu la. 37Ka nisaaniŋi paaligu dima zaa kari Yeesu, a kpali bo, dabeem gbaa ba ga. A zu, Yeesu wa ti kpe ŋariŋu maa o pori n gaari. 38Ka dabso Yeesu n tibi maa suusi u, o paag u gaari, ka Yeesu bi sagi, ka yeli u, 39ni o kuli, a wa ti yeli niriba seema Naawunni n niŋi u maa. A zu, o kuli, a wa ti yeli tiŋŋa maa niriba zaa seema Yeesu n niŋi u maa. 40Niŋi n na, Yeesu pori n gaari Galili duuri, ka zamu ba n zi n guri u, ba puusi u. 41Niŋi n na, dabyindaana ba n boona Jaarisa be, o niŋini laŋsigu dii kpemba yindaana, ka mi wa ti li Yeesu noba niŋi, ni o ta o yiri, 42a kpali bo, o biluŋko n niŋi poga, ka niŋi yuma pii ni ayi, ka ya n kpi. Yeesu sagi. Ba n ti wara, niriba zoo n poli n jili u, ka tutira u. 43Ka pogso ba niŋi, a niŋi dagiri yuma pii ni ayi, a bi baasira, so zaa tibi u je. 44Niŋi n na, o yi Yeesu nyaaŋa, ka siisi o waje noori. A puli maa niŋi, dagiri maa ŋma. 45Ka Yeesu loobi n boosi, ?ani n siisi ma? So zaa chisi. Piita yeli, M duuma, e bi nye, zamu n poli n jili i, a tutira i, ka e boosira, ni ŋani n siisi i? 46Yeesu yeli, M baŋini ba yindaana n siisi ma, kpeeŋu yi m niŋi. 47Poga maa n ti nye, ni o ki tee n sogi, o yi zamu maa puwa, a chirimi n ti li Yeesu yiya, ka yeli u niriba maa zaa nufu niŋi bunso zu o n siisi u, ka, a puli maa niŋi, o toora maa mi baasi. 48Yeesu yeli u, Bipuŋŋu, yeride niŋinisim zu, e nye kpeeŋu. Wara, a ni niŋgbirimaasim. 49Yeesu na n togsira, dabyindaana yi kpeema ba n boona Jaarisa maa yiri, a wa ti yeli kpeema maa, ni o bii maa kpiya, o da lee n mari Yeesu ta. 50Yeesu n wumi n ŋa, o yeli u, Da zora dabeem, ka niŋi ma yeride, bii maa ni nye kpeeŋu. 51O n wa ti paa yiri maa, o bi ti so zaa kpe yiri maa puwa, ama Piita ni Jon ni Jeemsi, a ni bii maa ba ni o ma, 52ka niriba ba yiri maa puwa, a chaatira, ka Yeesu yeli ba, Ya da kumina, o bi kpini, o gbisirini. 53Ba la u, a kpali bo, ba baŋini o n kpi. 54Ka Yeesu wa ti gbaa bii maa nuwa, ka yeli u, Biya nyisigi. 55Niŋi n na, o lee n nye nyevuri, a puli maa niŋi, o nyisigi, ka Yeesu yeli ba, ni ba naa bindira ti u, o di. 56Yela maa ku o ba ni o ma noya, ka Yeesu yeli ba, ni ba da yeli nira zaa yaso n niŋi maa.

will be added

X\