Luuka 7

1Yeesu n daa n wusi ba yela ŋa zaa baasi, o gaari Kapaanim. 2Niŋi n na, soojisi kpeema yindaana ba niŋi, ka mari o tumtumina, ka kpabira u ga. Tumtumina maa mi do n beera, a ya n kpi. 3Niŋi n na, soojisi kpeema maa wumi, ni Yeesu taya. A zu, o tumi Juusi dima kpemba seesi, ba wa ti booli Yeesu, o ti tibi o tumtumina maa. 4Ba n wa ti paa Yeesu, ba suusi u ga, ka yeli, A daga e n di n wa ti tibi tumtumina maa, a kpali bo, halli ka soojisi kpeema maa bi niŋi Juusi daba, 5o kpabira ti Juusi baligu ga, ka me laŋsigu dii ti ti. 6Yeesu paa ba gaari. Ba n wara, ka wa ti leeli yiri maa, soojisi kpeema maa tumi o zodima, ba ti yeli Yeesu, ni o da ta, ni o bi daga Yeesu di n kpe o yiri, 7ni o gbagba mi bi daga o ta Yeesu saani, ka kpabira Yeesu togsi yatoga luŋko, o tumtumina maa o nye alaanfiya. 8A kpali bo, niseesi mari daama gaari u, ka o gbagba mari daama gaari seesi, ka soojisi tumina u, ka o yi tumi ŋa la, o gaari, ka booli ŋa la, o ta, ka yeli o tumtumina o tumi, o tumi. 9Yeesu n ti wumi n ŋa, a ku o noori, o loobi n yeli zamu maa n pa o zu la, M yeli ya ni, a yi Juusi dima puu zaa, m bi nye nira zaa n niŋi ma yeride maa dabaa. 10Niŋi n na, dabseesi soojisi kpeema maa n tumi la pori n gaa yiri, ka nye tumtumina maa ni alaanfiya. 11A n ti niŋi daba ayi, Yeesu gaa tiŋyindaana ba boona Neena, ka o nyaaŋpaariba ni zamu paag u gaari. 12O n wa ti kpeera tiŋŋa maa, o nyeni ba mari kpiiŋu wara, ba wa ti pi, ka zamu yi tiŋŋa maa puu pa ba zu. Kpiiŋu maa niŋini daba, o ko n niŋi o ma biya, ka o ma niŋi pogkoori. 13Yeesu n ti nye kpiiŋu maa ma, nimbaa gbaag u, o yeli u, ni o da kumina, 14ka wa ti siisi bunso niŋi kpiiŋu maa n do maa, ka seesi n mari u wara la loobi n za, ka Yeesu yeli kpiiŋu maa, Bipolli, nyisigima. 15Niŋi n na, kpiiŋu maa nyisigi n togsira, ka Yeesu naag u ti o ma. 16Dabeem gbaa niseesi n ba niŋi maa zaa, ba kpeesi Naawunni yetira, ni Naawun chaameso n mari daama ga ta ba puwa, ka lee n yetira, ni Naawunni tani o niriba saani. 17Niŋi n na, yela maa baaru daa n yaari Judiya paaligu zaa, a ni paaligusi zaa n poli n jili u, 18ka Jon Baatisi nyaaŋpaariba naa yela maa ni yaseesi zaa Yeesu n niŋina la, a wa ti yeli Jon. Niŋi n na, Jon booli o nyaaŋpaariba bayi, 19ka tumi ba ba gaari Yeesu saani, a wa ti boosi u, ni wune niŋi niso n ya n ta maa, a koo, ti kpari n nyaasira nyaaŋa? 20Ba n gaa Yeesu saani, ba wa ti yeli, Jon Baatisi n tumi ti, ti ti boosi i, ni nyini niŋi so n ya n ta la, a koo, ti kpari n nyaasira nyaaŋa? 21A jemani maa Yeesu tibi toorasi ga, ka kari kikpaarigusi, ka yoo zoomisi nufusi ga ba nyaara, 22ka loobi n yeli Jon nyaaŋpaariba maa, ni ba wa ti yeli Jon bunso ba n nye, ka wumi, ni zoomisi nyaara, boobisi chaŋina, koritesi baasira, tikpiya wumina, kpiinsi nyisigira, nandaandima wumina yasuma, 23ka so zaa n tira ma jilima nyaara barika. 24Niŋi n na, Jon nyaaŋpaariba maa pori n gaari o saani, ka Yeesu wusi zamu maa Jon yela, a yeli, Ya n daa n we dalimpii paaligu la, ya bi we ya wa ti nye sauwa n damtira moori, 25koo dabso n pili binsuma, a kpali bo, seesi n pinna binsuma, ka dira binsuma bani nadima saani. 26Ama ya daa n wa ti nye Naawun chaame. Yamonsi n na, o mi gaari Naawun chaame, 27a kpali bo, o yela n na Naawunni daa n ti ba sebi n digili kusu zaa la yeli, Nye, poin ka e ta, m ni tumi m tumtumina, o maali e soori, ka e ta. 28Ka m gbagba yeli ya, a yi pogiba biisi puwa, so zaa bi gaari Jon, ama a yi Naawun naalim puu wune, so n niŋi bibilidaana gaari u. 29Zamusi n daa n wumi seema Jon n wusira la, lampoo deegiriba ni niriba zaa ti Jon su ba koom, ka sagi, ni Naawunni niŋina nene. 30Ka Farisii dima ni zaaliguwusiriba zagsi Naawun kiperi, ni Jon o da su ba koom. 31A zu, m ni wusi ya seema pimpariŋa dima n be. 32Ba niŋini maa biisi n zi daa puwa, a boona taaba, a yetira, Ti n pemsi kabila niŋi ya, ya bi waara. Ti n kumina, ya bi kumi. 33O gbinni niŋi maa, Jon Baatisi n daa n ta, o bi ŋobira paanu, o bi ŋuura daam, ya yeli, ni o marini kikpaarigusi. 34Ka mani Naawun Nisaala ta, a dira, ka ŋuura, ya lee n yeli, ni m kpabira bindira ni daam ga, ka niŋi lampoo deegiriba ni yabeniŋiniba zo. 35Ya nyaasi, seesi n dee yam ni baŋŋi maa, yam maa niŋini yamonsi. 36Niŋi n na, Farisii dima yindaana daa n yeli Yeesu, ni o ta o yiri, ba di. A zu, Yeesu wa ti kpe Farisii daba maa yiri, a chinchiŋi, o di. 37Jagimilu yindaana mi ba tiŋŋa maa puwa, ka wumi, ni Yeesu ba daba maa yiri, o naa tulale kolibapeeli, a wa ti kpe diso puu ba n dira maa, 38a za Yeesu nyaaŋa, a leeli o noba, ka kumina nintam maag o noba, ka gbaag o zukoba bilimina a, ka mugsira a, ka naa tulale la sarigi a. 39Farisii daba maa n nye lala, o fe o sufu niŋi, ni ka Yeesu niŋini Naawun chaame, o ni baŋŋi maa, pogso n siisira u maa niŋini jagimilu. 40Ka Yeesu yeli Farisii daba maa, Simon, m ya n yeli i ni yaso. Ka daba maa mi yeli, Karichi, bo n na? 41Yeesu yeli, Dabso n nyisigi, a mari ligiri ga, ba paŋina. Niŋi n na, niriba bayi paŋŋi o ligiri, ŋa la paŋŋi bote, ka yindaana paŋŋi botesi piiya. 42Ba ligiri yoobu jemani n ti paa, ba yindaana zaa bi nye n yo, a zu, daba maa che n paŋŋi ba zaa. Nivusi bayi ŋa wumbo daana ni kpabira u ga? 43Daba maa yeli, Mani wune saani, so o n che n paŋŋi ga la ni kpabira u ga. Yeesu yeli u, E yeli yamonsi. 44Ka loobi n nyaasi poga maa, ka yeli daba maa, Nyaasi pogaa. Ni ti kpe e yiri, e bi ti ma koom ma pegi m noba, ka wune naag o nintam maa m noba, ka gbaag o zukoba bilimi a. 45E bi mugsi ma, ka jemanso ni ta la zaa, o bi cheli m noba mugsigu. 46E bi naa kpaam sarigi m zukoba, ama wune naa tulale sarigi m noba. 47Lala n na o kpabira ma ga, ka wusira maa, o yabeeri maa n zoo ga la n che n paŋŋi u. Ama ka niso yabeeri n bi zoo, o bi kpabira so n che n paŋŋi u la ga. 48Ka Yeesu yeli poga maa, E yabeeri che n paŋŋi i. 49O n yeli n ŋa, niseesi n dira la yeli taaba, Wula nivu n ŋa? O ni tee n che niriba yabeeri paŋina ba? 50Ka Yeesu yeli poga maa, E yeride niŋinisim moligi i basi, wara, a ni niŋgbirimaasim.

will be added

X\