Luuka 6

1Dindaso daborigu daari, Yeesu ni o nyaaŋpaariba daa n punna pu, ka nye chi n dogi n za, o nyaaŋpaariba meemi a ŋobira, seema Juusi dima yi niŋina la. 2Farisii dima yeli, Bo n na ya niŋina lala? Ti chisirini n ŋa daborigu daari. 3Ka Yeesu yeli ba, Ya nyaasi seema kusu zaa Dawuda n daa n niŋi. Dindaso kom daa n gbaag o ni o taaba, 4o wa ti kpe Naawun tanti dii, ka naa Naawun dii puu paanu, so buŋkobkuuriba ko n ŋobira la, a ŋobi, ka seesi n che, o naa n tori o taaba. 5Ka Yeesu yeli ba, Mani Naawun Nisaala daama n gaari daborigu daama. 6Daborigu yindaana n lee n ti paa, Yeesu daa n kpe laŋsigu dii wusira niriba, ka dabso ba niŋi, o nudii kpi, 7ka zaaliguwusiriba ni Farisii dima mi ba niŋi, ka nyaasira Yeesu ba nye, o ni sagi n tibi daborigu daari? A kpali bo, ka o tibi daborigu daari, ba ni yeli o niŋi yabee. 8Ka Yeesu mi baŋŋi seema ba n feera, ka yeli dabso nuu n kpi maa, ni o ti za kpe. Daba maa nyisigi n wa ti za nisaaniŋi, 9ka Yeesu boosi ba, Wumbo n veela ba n niŋina daborigu daari, yasuma, koo, yabeeri? A moligira nyevuri, koo, a kuura? 10O n boosi ba n ŋa, o nyaasi ba poli n jili, ka yeli daba maa, ni o teeg o nuwa. O teeg u, o nye kpeeŋu maa wune la daana. 11Ka zaaliguwusiriba ni Farisii dima maa je suuri ga, a toora jinasi seema ba n di n niŋi Yeesu. 12A n ti niŋi daba ayi, Yeesu daa n yi n du zoori zu, a wa ti togsi Naawun saani, ka togsira o saani yiiŋu maa zaa. 13Bee n ti chee, o booli o nyaaŋpaariba, a ti nyisi ba pii ni bayi, ka boona ba tumusi. 14Pii ni bayi maa n ŋa, Simon, so o n boona Piita la, a ni o sunzo Andiru, a ni Jeemsi ni Jon, a ni Filipi, a ni Baatolimi, 15a ni Matiyu, a ni Tomasi, a ni Alifiisi bii Jeemsi, a ni Simon so n gamsira la, a ni Jeemsi bii Juudasi, 16a ni Juudasi Ikaroti, so n ya n koosi Yeesu la. 17Niŋi n na, o ni ba sigi n za tiŋŋa, ka zamutintaa ba niŋi. A yi ba puwa, o nyaaŋpaariba zoo n ba niŋi, a ni nivudamta n yi Jiruusilim, a ni Judiya paaligu zaa, a ni Taya ni Sidon paaligu n leeli teeku, 18ba ti wumi o wusigu, ka o tibi ba. Niŋi n na, o tibi seesi zaa n mari kikpaarigusi, 19ka zamu maa zaa kpabi ba siisi u, a kpali bo, daama yiira o niŋi, a tibira ba zaa. 20Ka Yeesu nyaasi o nyaaŋpaariba la, ka yeli, Nandaandima, ya puusi a peligi, a kpali Naawunni niŋi ya naaba. 21Ka ya seesi kom n mari la, ya puusi a peligi, a kpali ya ni piri. Ka ya seesi n kumina la, ya puusi a peligi, a kpali ya ni la. 22Ka ya seesi nisaaldima n chisi, ka katira, ka tuura, ka yetira, ni ya niŋini bimbeeri, a kpali mani Naawun Nisaala zu, 23ya mari pupeelim, a chigsira. A kpali bo, ya sanyoori zooya ga, a yi Alizaana puwa. Lala n na ya yaadima mi daa n niŋina Naawun chaamesi yabeeri. 24Ka ya bindaandima ni nye nam, a kpali bo, ya sali n nye meesim. Ka ya seesi n piri la, ya ni nye nam, a kpali bo, kom ni gbaa ya. 25Ka ya seesi n laara pimpariŋa, ya ni nye nam, a kpali bo, ya ni kumi, ka chaatira. 26Ka ya seesi niriba n kpeesira la, ya ni nye nam, a kpali bo, lala n na ya yaadima daa n kpeesira niseesi n ŋma jiri yeli ba niŋini Naawun chaamesi la. 27Ya seesi n kpabira ya wumi, m yeli ya, ya kpabira ya dindima, ka niŋina seesi n chisira ya yela yasuma, 28ka dibira seesi n siira ya noya, ka suusira Naawunni o naa barika tira seesi n tuura ya. 29Ka niso zaa lobi i nimpegu, loobi nimpegso n che la paasi u. Ka niso zaa naag e kpariga, cheli o naag e tagite paasi. 30Ka niso zaa suusira i, nye n tira u. Ka niso zaa naag e bunso, da yeli u, ni o naa n ti i. 31Niŋi niriba seema e n kpabira ba n niŋina i la. 32Ya nyaasi, ka ya kpabira seesi n kpabira ya, bo tono n na ya ya n nye, a yi Naawun saani? Ka seŋ. A kpali bo, yabeniŋiniba gba kpabirini seesi n kpabira ba yela. 33Koo, ka ya moligira seesi n moligira ya, bo tono n na ya ya n nye, a yi a puwa? Ka seŋ. A kpali bo, yabeniŋiniba gba niŋina lala. 34Koo, ka nira paŋŋi ligiri, a yi ya so zaa saani, ka ya kpabira ya deeg a, bo tono n na ya ya n nye? Ka seŋ. A kpali bo, yabeniŋiniba gba paŋinni taaba ligiri, ka yoora a. 35Ka ma yeli ya, ya kpabira ya dindima, ka niŋina yasuma. Ka nivu paŋŋi ligiri ya saani, ya da lee n ti a yoobu yela tiri ya. Ka ya pa niŋi lala, ya sanyoori n zoo ga, a yi Naawun zu, ka ya loobi Naawun biisi. A kpali bo, Naawunni moligira niriba zaa, halli ka ba ka bunye, koo a ka jilima. 36Lala n na, ya gba, ya zora nimbaa seema ya ba Naawunni n zora nimbaa la. 37Ya nye, ya da choomina taaba, ka Naawunni gba o da choomina ya. Ya da yeli niriba liya, ka Naawunni gba, o da yeli ya liya. Ya che n paŋŋi ya taaba, ka Naawunni gba che n paŋŋi ya. 38Ya naa n tira, ka Naawunni gba o naa n tira ya. O ni bugsi nene, a diisira, ka yigsira, ka naa n paana, a yaari n niŋina ya wajaasi niŋi, a tira ya. Ka seema ya n bugsira la, Naawunni gba ni bugsi lala ti ya. 39Yeesu lee n bo kiŋaasasi yeli ba, Zooma ni tee n wusi o to zooma soori? Akayi. Ka ba niŋi lala, ba zaa ni li bogiri puwa. 40Ya nye, bamsira zaa bi gaatira so n wusira u, ama ka ba ti bamsi n baasi, ba yi paani wusira maa. 41Ya lee n nyaasi, nira ni nye dabila n ba o todaana nufu, ka ki nye dakarigu n ba o gbagba nufu. 42A koo o ni yeli o todaana maa, ni o nyisi dabila, a yi o nufu, ka dakarigu la na ba o gbagba nufu. E yomsira, nyisi dakarigu la, a yi e gbagba nufu poin, ka tee n nyaasi nene, a nyisi dabila maa yi e todaana la nufu. 43Ya lee n nyaasi. Tisuŋŋu zaa bi wanna walibeeri. Koo, tibee zaa mi bi wanna walisuma. 44Tii zaa mi wala n na ba naa n baŋina u. Ba bi poora mangusi, koo gaasi, a yi goosi puwa. 45Nivusuŋŋu ferisuma zu n na, o niŋina yasuma, ka nivubeeri feribeeri zu n na, o niŋina yabeeri. Yaso zaa n ba sufu niŋi n na, naŋgbanni yi togsi. 46Ka Yeesu lee n yeli ba, Bo n na ya boona ma ya duuma, ka bi niŋina seema ni yetira ya? 47So zaa n ta m saani, ka wumi seema ni yetira, ka niŋina lala, m ni wusi ya seema o n be. 48O niŋini maa dabyindaana n meera dii, ka gbi tiŋŋa paa kugitintaa, ka me n tomi o niŋi. Saa n ti ta ga, mogiri paali n ta dii maa see, a ŋma u je, a kpali bo, o zani kugiri maa niŋi. 49Ka so mini wumi seema ni yetira, ka bi niŋi lala, o niŋini maa dabyindaana n meera dii, ka bi gbi tiŋŋa, ka me. Saa n ti ta ga, mogiri paali n ta dii maa see, a puli maa niŋi, dii maa fa n li, o zaa saami.

will be added

X\