Luuka 5

1Dindaso Yeesu daa n pori n gaa Galili paaligu, ka ba Galili beeŋkarigu noori, ka niriba n kpabira ba wumi o yatoga la tutira taaba, a wa ti paag u. 2Niŋi n na, Yeesu nye ŋarima ayi n za kuŋkunni, ka a dima yi n pegira ba awulesi. 3Yeesu wa ti kpe yindaana n niŋi Simon toori, ka yeli u, ni o mari u leeli kuŋkunni, ka Yeesu zi ŋariŋu maa puwa, a wusira niriba maa n ba kuŋkunni la. 4O n ti togsi n baasi, o yeli Simon, Mari ŋariŋaa gaa seela n limini la, a wa ti lobi ya kisiwusi, a gbaa koroto. 5Ka Simon yeli u, M duuma, yiiŋu la zaa ti tumi n je, ka a kpali e n yeli ti ŋa zu, ti ni lee n naag a lobi. Ka naa n lobi. 6Ba n ti niŋi n ŋa, ba gbaa korotosi ga, kisiwusi maa kasigira. 7A zu, ba kamsi ba taaba ba mari ba ŋariŋu ti paasi ba niŋi. Ba n ta, ŋarima ayi maa zaa paali koroto, a ya n muri. 8Simon Piita n ti nye n ŋa, a ku o noori, o li n gba Yeesu yiya, ka yeli, M duuma, m niŋini yabeniŋina, cheli ma, ka wara. 9O ni seesi zaa n ba ŋariŋu maa puwa, a ni o taaba Jeemsi ni Jon n niŋi Zebidi biisi, koroto maa yela maa ku ba zaa noya. Ka Yeesu yeli Simon, Da zora dabeem, a yi zinaa wara, e ni nye niriba ba paara Naawun zu, a maa seema e n nyaara korotosi la. 11Niŋi n na, ba mari ŋarima maa du kuŋkunni, a cheli a zaa, ka pa Yeesu zu. 12Dindaso Yeesu daa n bani tiŋyindaana, ka dabyindaana ba niŋi, o niŋa zaa mari korite. O n nye Yeesu, o li n naag o nufu pili tiŋŋa, ka suusi u yeli, M duuma, ka e kpabira, e ni tee n tibi ma. 13Niŋi n na, Yeesu teeg o nuu siisi u, ka yeli, M kpabira, mari alaanfiya. A puli maa niŋi, korite maa baasi, 14ka Yeesu yeli u, ni o da pa ti yeli nira zaa, ka naag o maŋŋa wa ti wusi buŋkobkuura, ka ti o ku bini ti Naawunni, a maa seema kusu zaa Musa n daa n yeli ba niŋina, niriba ba baŋŋi o n bi lee n beera. 15A ni lala zaa, yela maa yaari ga. A zu, zamusi laŋsi, ba ti wumi, ka o tibi ba. 16Niŋi n na, o yi n gaari dalimpii paaligu puwa, a wa ti togsira Naawun saani. 17Dindaso Yeesu daa n ba yiri yindaana puu togsi n wusira niriba, ka Farisii dima ni zaaliguwusiriba n yi Galili ni Judiya tiŋbaala zaa ni Jiruusilim puu la ba niŋi, o nye duuma kpeeŋu, ka tibira. 18Niŋi n na, dabseesi mari dabyindaana noba n kpi, a digili o bundoori niŋi, a chena, ba ti digili Yeesu saani. 19Ba n ti paa dii maa, ba bi nye zii ba kpe, a kpali zamu maa zu. Ba du pii maa zu chibi voori, ka naag o ni o bundoori maa turi voori maa niŋi, o sigi n paa Yeesu. 20Yeesu n nye ba niŋi u yeride la, o yeli daba maa, Daba, e yabeeri che n paŋŋi i. 21Zaaliguwusiriba ni Farisii dima maa n ti wumi n ŋa, ba togsi taaba saani yetira, Seema dabaa n togsi n ŋmeŋsi Naawunni, lala veela? Naawunni ko ni tee n che yabeeri paŋŋi. 22Ka Yeesu mi baŋŋi yaseesi ba n feera maa, ka yeli ba, Ya da feera n ŋa. 23Wumbo n ba toom, m ni yeli dabaa, o yabeeri che n paŋŋi u, a ni m ni ti o nyisigi n chaŋŋi? 24Ya nye, m ni wusi ya, ya baŋŋi maa, mani Naawun Nisaala mari daama m che yabeeri paŋŋi, a yi durinye ŋa puwa. Ka yeli dabso noba n kpi maa, M yeli i ni, nyisigi n naag e bundoori kunna. 25A puli maa niŋi daba maa nyisigi ba nufu niŋi, a naag o bundoori, a kunna, ka kpeesira Naawunni, 26a ku ba zaa noya, dabeem gbaa ba, ba kpeesira Naawunni, ka yetira, Zinaa ti nyeni mamaachi yela. 27Yeesu n ti niŋi n ŋa baasi, o yi n gaari, ka nye soori lampoo deegira ba n boona Liivai, ka o ba n zi seela o yi n zi n deegira. Yeesu yeli u, Pa m zu. 28Ka daba maa ba n boona Liivai la cheli yaso zaa, ka nyisigi n pa o zu. 29Niŋi n na, daba maa ti Yeesu ta o yiri, ba dugi bindira ga, ka laŋsi o taaba ni o zodima zoo n ta, ba ti di. 30Ka Farisii dima ni ba zaaliguwusiriba maa zabi Yeesu nyaaŋpaariba, a yetira, Bo n na ya ti ya ni lampoo deegiriba ni yabeniŋiniba la, a dira, ka ŋuura? 31Yeesu yeli ba, Alaanfiya dima bi wara dokita saani, ka pa niseesi n beera. 32M bi tani m ti booli nivusuma, m tani m ti booli seesi n niŋina yabeeri, ba dee ba saamiya. 33Niŋi n na, niseesi yeli Yeesu, ni Jon nyaaŋpaariba yi leerini noori, ka togsira Naawun saani, ka Farisii dima nyaaŋpaariba gba niŋina lala, ka nyi wune nyaaŋpaariba dira, ka ŋuura. 34Yeesu yeli ba, Ka dabso naa poga, ka o zodima ti puusi u, ba leerini noori? Akayi, a kpali o n ba niŋi maa zu, ba ki le noori. 35Dindaso ba ni gbaa daba maa gaari. A jemani maa o zodima ni le noori. 36Niŋi n na, Yeesu lee n bo niriba maa kiŋaasa, a yeli, Nira zaa ki sagi n chee kpariga paali, a naa n ligi buŋkurigu. Ka o niŋi lala, o ni saami bimpaali maa, ka buŋkurigu maa o n se la, o kuri taaba niŋi. 37A koo, seema ya n baŋŋi maa, ka ba yi ti dugi daam, ba naa n niŋi kolisi puwa, ka niso zaa mi ki naa dapaala niŋi kolikurigu puwa. Ama ka o niŋi lala, dapaala maa ni ti koligu maa tasi, a zaag a saami. 38A zu, ya naa dapaala niŋi kolipaali puwa. 39A koo, niso ti ŋu dakura, o bi lee n kpabira dapaala, a kpali bo, o feni maa, dakura maa veela n gaari bimpaala la.

will be added

X\