1 Niŋi n na, ba zaa nyisigi, a mari Yeesu gaari gomina ba n boona Pailati la saani, 2 a wa ti yetira, ni Yeesu tini Juusi dima ya n zabi, ka o lee n yetira, ni ba da lee n yo lampoo tira Aroom naaba, ka mi lee n yeli, ni wune n niŋi Kristu, so n niŋi nakarigu. 3 Gomina maa boosi Yeesu, Nyini n niŋi Juusi dima nakarigu? Yeesu yeli, Nyini n yeli. 4 Ka gomina maa yeli buŋkobkuuriba kpemba ni zamusi maa, ni o bi nye Yeesu yabee zaa. 5 Ka ba zagsi, ka yeli kpeeŋutiri, Nyaasi, o damtira Juusi dima zaa sufusi, halli, a yi Galili paaligu, a ti paa kpe, ni ba da pa Aroom naaba zu. 6 Gomina maa n ti wumi n ŋa, o boosi, ni Yeesu yini Galili, ba sagi, 7 o pa baŋŋi Yeesu n yi naaba ba n boona Herodi la paaligu puwa. A jemani maa naaba maa mi daa n bani Jiruusilim puwa, gomina maa ti ba mari Yeesu gaari o saani. 8 Ba n ti mari u gaari naaba maa saani, naaba maa puu peligi, a kpali bo, o daa n yi wumini yaseesi o n niŋina, ka kpabira o nye u, o niŋi mamaachi yelli, o nyaasi. 9 A zu, o boosi u yadamta, ka Yeesu muuri u, ka bi yeli yelli zaa. 10 Ka buŋkobkuuriba kpemba ni zaaliguwusiriba mi ba niŋi yetira kpeeŋutiri, ni Yeesu liya. 11 Ka naaba maa ni o soojisi gba tuura u, ka naa wajesuŋŋu pili u, a niŋina u siya, ka ti ba pori u gaari gomina ba n boona Pailati la saani. 12 Poin ka yela ŋa zaa niŋi, naaba maa ba n boona Herodi la ni gomina maa daa n niŋini dindima. A dindaari maa ba di taaba zoolim. 13 Niŋi n na, gomina maa booli buŋkobkuuriba kpemba ni Juusi dima kpemba ni niseesi ba laŋsi, 14 ka o yeli ba, Ya nyaasi, ya marini dabaa ta, ka yeli, o tini Juusi dima ya n zabi, ka pimpariŋa m boosi u ya nufu niŋi, ka bi nye o n niŋi yabeseesi ya n yetira la liŋini zaa, 15 ka naaba Herodi gba bi nye, a zu n na, o pori u ti ti ma. O bi niŋi yaso zaa n daga ba n di n ku u. 16 A zu, m ni ti ba feebi u, ka cheli u. 18 Ba zaa zagsi, ka tasi n yeli, Ya mari u wa ti ku, ka nyisi Baraba ti ti. 19 Aroom soojisi daa n gbaani Baraba maa yo dii, a kpali o daa n taasirini zabiri tiŋŋa puwa, ka kuura niriba. 20 Ka gomina maa mi kpabira o nyisi Yeesu, a zu, o lee n togsi ba saani, 21 ba zagsi, ka tasi n yeli, Ya ku u, ya ku u. 22 Gomina maa lee n yeli ba buta daana, Bo zu ma ya n ku u? M bi nye o yabee zaa n daga ba n di n ku u. A zu, m ni ti ba feebi u, ka cheli u. 23 Ka ba zagsi, ka tasi n yetira, ni ba ku u. Ba vu maa zu, gomina maa sufu cherigi, 24 o di Yeesu seriya, ni soojisi ba kpa u tabi daa o kpi, seema ba n kpabira la, 25 ka nyisi dabso ba n daa n yo dii, a kpali o n taasira zabiri, ka kuura niriba la ti ba. 26 Niŋi n na, ba mari Yeesu gaari ba wa ti ku u. Ba n wara maa, ba nye Sariini daba ba n boona Simon n ti kpeera tiŋŋa maa puwa, ba gbaag u, ka ti o naa Yeesu kuubu daa bugi n pa o zu. 27 Ka zamutintaa mi pa, ka pogiba zoo n ba ba puu kumi n tira Yeesu. 28 Ka Yeesu loobi n yeli pogiba maa, Jiruusilim pogiba, ya da kumi n tira ma, ya kumi n tira ya maŋŋa, a ni ya biisi, 29 a kpali bo, jemani ni ta, ba yeli, Poginyeesi puusi a peligi ga, 30 ka ba mi yetira, Zotintaasi ni zobilisi, ya li ti niŋi. 31 Ka daa maaya, ka ba niŋi n ŋa, ka o ti kuu, ba ni niŋi yabee paasi? 32 Ka ba mari yabeniŋiniba bayi paasi Yeesu niŋi, ba wa ti ku. 33 Ba n wa ti paa seela ba n boona zukoori la, ba kpa Yeesu ni dabsi bayi maa tabi daari, ka damsi a zaali, Yeesu ba ba sunsuu niŋi. 34 Niŋi n na, Yeesu yeli, M ba, Naawunni, che n paŋŋi ba, ba bi baŋŋi yaseesi ba n niŋina ŋa. Ka soojisi maa naa kuga lobi, ba baŋŋi niso n di n dee Yeesu bimpinna. 35 Ka niriba za n nyaasira Yeesu. Ka kpemba la niŋina u siya yetira, O daa n moligira niriba, a zu, ka wune n niŋi Kristu so Naawunni n daa n nyisi kusu zaa la, o moligi o maŋŋa. 36 Ka soojisi maa gba niŋi u siya, a naa datoosi tira u, ka yetira, 37 Ka e niŋini Juusi dima naaba, e moligi e maŋŋa. 38 Ka ba sebi o zu see, ni Juusi dima naaba n ŋa. 39 Niŋi n na, yabeniŋiniba ba n kpa n tabi la yindaana tu Yeesu yeli, Ka e niŋini Kristu maa, e moligi ti ni ni zaa. 40 So n che la zabi o todaana la yeli, E bi zora Naawunni? Nyaasi, ti ni nu zaa nyaarini namluŋko, 41 ti mi toori, a ni a soori n na, o mi bi niŋi yabee zaa. 42 Ka yeli Yeesu, E pa ti di naam ta, e teesi m yela. 43 Yeesu yeli u, Yamonsi ma yeli, zinaa m ni ni ni kpe zisuŋŋu ziya. 44 Wuntooŋu n ti paa, wuluŋu pili, paaligu maa puu zaa loobi ligu, zaanoori ti paagira. 45 A jemani n na, a yi Naawun dii, Naawun patisa cheeg ayi. 46 Ka, a yi Yeesu saani, Yeesu tasi kpeeŋu ga, a yeli, M ba, Naawunni, m naa m sii ti i. O n yeli n ŋa baasi, o kpi. 47 Soojisi maa kpeema n ti nye yaso n niŋi ŋa, o kpeesi Naawunni yeli, Yamonsi n na, dabaa bi niŋi yabee zaa la. 48 Ka zamusi maa zaa n nye n ŋa, ba pori n kuli, a ni sufusaaŋu. 49 Ka Yeesu zodima, a ni pogiseesi n pa o zu yi Galili paaligu puu la za larimini nyaasira yela maa. 50 Niŋi n na, dabyindaana daa n ba niŋi, ba boona u Joosefi, o yiri n niŋi Juusi dima tiŋso ba n boona Arimatiya la, ka o niŋi nivusuŋŋu, ka ba Juusi dima kpemba satigu la puwa, ka bi sagi ba n niŋi seema ba n niŋi maa, ka mi kpabira o nye Naawun naalim. 52 Yeesu n kpi, o we gomina ba n boona Pailati la saani, a wa ti suusi Yeesu kpiiŋu maa, 53 ka wa ti sigi u, a yi daa maa zu, ka sooli u wajepeeli, a naag u wa ti digili kugiri voori ba n daa n chibi, ka na bi naa kpiiŋu zaa digili o puwa. 54 Pogiseesi n daa n pa Yeesu zu yi Galili paaligu puu la wa ti nye voori maa ni seema ba n pi u. A jemani maa siriya niŋinisim daari n daa n na, ka wuluŋu liira, daborigu ya n paa. 56 Pogiba maa pori n kuli, ba wa ti niŋi kpaam ni tulale ti sarigi Yeesu niŋa. A n kaa bee, daborigu n na, ba vuusi, a kpali Naawun zaaligu maa zu.
