1 Galingaari diibu n daa n ya n ti paa, ba ya n ŋobi paanu n ka yiisi la, 2 buŋkobkuuriba kpemba ni zaaliguwusiriba kpabira ba ku Yeesu, ka mi zora niriba dabeem. 3 Niŋi n na, Sitaana kpe Juudasi Ikaroti niŋi, o mi niŋini Yeesu nyaaŋpaariba pii ni bayi la yindaana. 4 O we buŋkobkuuriba kpemba ni Naawun dii pirisisi zudaandima saani, ba wa ti to jina, seema o n di n niŋi n ti ba gbaa Yeesu. 5 Lala peri ba, ba sagi, ka ti u ligiri. 6 A zu, o wa ti kpabira seema o n di n niŋi ba gbaa Yeesu, ka nira zaa da baŋŋi. 7 Daa maa n daa n ti paa, ka ba ya n ŋobira paanu n ka yiisi, ka ba kuura Galingaari pebilisi la, 8 Yeesu tumi Piita ni Jon, ka yeli ba, Ya wa ti niŋi siriya, ti ti di Galingaari. 9 Ba boosi u, Ya n na e kpabira ti wa ti niŋi siriya? 10 O yeli ba, Ka ya wa ti kpe tiŋŋa maa puwa, ya ni nye dabyindaana n ŋoogira koom, ya pa o zu, a wa ti kpe jirimbisa so o n kpeera, 11 ka boosi jirimbisa maa daana, Ya n na Yeesu ni o nyaaŋpaariba ya n ti di Galingaari? 12 O ni du n wusi ya jirimbisa maa ditintaa yindaana n mari kogusi. Nisaaniŋi ya niŋi siriya. 13 Niŋi n na, ba we, a wa ti nye seema o n yeli ba maa, ka niŋi siriya ba ti di Galingaari. 14 O jemani n ti paa, Yeesu ni o tumusi maa laŋsi, ba ti di. 15 Yeesu yeli ba, M daa n kpabirini m ni ya ti di Galingaari ŋa poin, ka m nye nam. 16 M yeli ya ni, m ki lee n di u zaa, ama Naawun naalim tani poin. 17 Ka naa kopu togsi Naawun saani, ka yeli o nyaaŋpaariba, Ya dee, ya zaa ya ŋu. 18 A yi pimpariŋa m ki lee n ŋu daam zaa, ama Naawun naalim tani poin. 19 Ka naa paanu togsi Naawun saani, ka ŋma u naa n ti ba, ka yeli, M niŋa n na la. 21 Ka lee n yeli, Ya wumi, niso n ya n ti ba gbaa ma la ba kpe, m ni nu n dira. 22 Mani Naawun Nisaala ni yi durinye puu seema Naawunni n daa n yeli o ni niŋi la. Ka so n ya n ti ba gbaa ma ŋa ni nye nam ga. 23 A kpali o n yeli lala zu, ba zaa boosira taaba so n ya n niŋi yelaa. 24 Niŋi n na, amore nyisigi ba puwa, ba wumbo n niŋi yipaara. 25 Yeesu yeli ba, Baligusi nadima marini daama ga yi ba zu, ka kpabira niriba ba yi yeli, ni ba niŋi niriba ga. 26 A mi ki niŋi lala yi ya saani. So n niŋi ya kpeema, cheli o loobi n niŋi maa biya. So n niŋi ya yipaara, cheli o loobi n niŋi maa so n tumina. 27 Ya nyaasi, wumbo n niŋi kpeema, so n yi mari bindira chena, koo, so n dee n dira? So n dee n dira. Ka ma wune n ba ya saani, a niŋi maa so n tumina la. 28 Ka Yeesu lee n yeli ba, Yarima n niŋi niseesi m ni ya n daa n nyaara nam ga, 29 ka seema m ba Naawunni n daa n nyisi ma m di naalim la, pimpariŋa m gba nyisi ya paasi m niŋi, 30 ti di, ka ŋu nisaaniŋi, ka ya zi nadima kogusi niŋi, a dira Juusi dima baligusi pii ni bayi la seriya. 31 Ka Yeesu lee n yeli, Simon, Simon, wumi. Sitaana daa n suusi Naawunni ga, ni o ti u daama o niŋi ya nyaasi, a maa ba yigili zum, 32 ka ma suusi Naawunni ti i, e da cheli yeride niŋinisim. E pa lee n ti pa m zu, e moligi e taaba nyaaŋpaariba. 33 Piita yeli u, M duuma, m niŋini siriya ba yo ma dii, halli ka kum n na, ti zaa ti kpi. 34 Yeesu yeli u, Yiiŋaa, e ni chisi buta, ni e n bi baŋŋi ma, poin ka nodaasi kumi. 35 Ka Yeesu yeli ba zaa, Ni daa n tumi ya ya yi, ka bi mari ligiri ni koligu ni sabtaasi zaa la, ya kpabi bunso zaa je? Ba yeli, Akayi, ti daa n bi kpabi n je. 36 O yeli ba, Pimpariŋa wune so n mari ligiri o naa, lala n niŋi so n mari koligu gba, ka so n ka sukarigu, cheli o koosi o waje wa ti da. 37 A kpali bo, ba n daa n sebi kusu zaa, ni ba ni naa nira niŋi yabeniŋiniba puwa, mani n daa n na, ka yaseesi zaa ba n daa n sebi m yela la, a ni niŋi. 38 Nyaaŋpaariba maa yeli u, Ti duuma, nyaasi, sukara ayi. O yeli ba, A sagsiya. 39 Niŋi n na, o yi, ka yaa n gaari zoo la ba n boona Olivi la zu, ka o nyaaŋpaariba pa o zu. 40 O n ti paa seela, o yeli ba, Ya ba kpe suusira Naawunni, ni o da ti Sitaana yomsira ya. 41 Ka Yeesu ko we ba yiya, seela ba n di n tee n lobi kugiri paag u, ka gba tiŋŋa togsi Naawun saani yeli, 42 M ba, ka e sagiya, nyisi ma yi nam maa ni ya n nye ŋa puwa. A ni lala zaa, da niŋi seema ni kpabira, ka pa e toori. 43 Niŋi n na, o nye malaki n yi saazu, a ti tira u kpeeŋu. 44 Ka beerim ni sufusaaŋu zu, o suusi Naawunni ga, ka zibiiŋu, a maa zeem, chibi u, a yoosira tiŋŋa. 45 O n ti togsi Naawun saani baasi, ka nyisigi, o gaari o nyaaŋpaariba saani, a wa ti nye, ka ba gbisira, a ni sufusaaŋu. 46 O yeli ba, Wula n na ya gbisira? Ya nyisigi n suusira Naawunni, ni Sitaana o da yomsira ya. 47 Yeesu na n togsira, o nyaaŋpaariba pii ni bayi yindaana ba n boona Juudasi la mari zamu ta, ka o vuu n chena Yeesu saani, a ti puusi u, ka mugsi u. 48 Yeesu yeli u, Juudasi, wula n na e ni tee n niŋi yabeegaa, ka ti mugsi mani Naawun Nisaala, ba gbaa ma? 49 O nyaaŋpaariba la n za nisaaniŋi maa n nye n ŋa, ba yeli, Ti duuma, ti naa sukara cheera ba, koo? 50 Ba yindaana naa suu che buŋkobkuuriba zudaana tumtumina nudii tubiri ŋma. 51 Yeesu yeli ba, ni ba cheli, ka o siisi tumtumina maa tubiri tibi u. 52 Ka Yeesu yeli buŋkobkuuriba kpemba ni Naawun dii pirisisi zudaandima ni kpemba n ta ba ti gbaag u la, Taaru zaa m ni ya yi ba Naawun dii laanta, ka ya bi gbaa ma. Ama pimpariŋa ya taya, ya ti gbaa ma maa tayugu, a ni suusi ni daari, a kpali ligu maa ti ya daama. 54 Niŋi n na, ba gbaa Yeesu, ka mari u gaari buŋkobkuuriba zudaana yiri, ka Piita mi larimi n pa ba zu, 55 ba wa ti maali bugum laanta sunsuwa, ka laŋsi n zi, ka Piita ba ba puwa. 56 Niŋi n na, tumtumina yindaana n niŋi poga nye Piita n zi paaligu niŋi, ka nyaasi u, ka yeli, Yeesu ni dabaa n daa n na. 57 Piita chisi, ka yeli, Poga, ma wune bi baŋŋi u. 58 A n ti niŋi beela, niso lee n nye Piita, ka yeli, E niŋini ba yindaana. Piita yeli, Daba, m bi niŋi. 59 A n lee n ti niŋi beela, yindaana lee n paasi n yeli, M niŋi tama maa, dabaa di bani Yeesu saani, a kpali bo, o niŋini Galili daba. 60 Piita yeli, Daba, m bi baŋŋi yaseesi ya n yetira n ŋa. A puli maa niŋi, o na togsirini, ka nodaa kumi. 61 Ka Yeesu loobi n nyaasi u, o teesi Yeesu di n yeli u, ni poin ka nodaasi kumi, o ni chisi u buta la. 62 A zu, Piita yi n wa ti kumina, a ni sufusaaŋu 63 Niŋi n na, dabseesi n gbaa Yeesu mari la niŋina u siya, ka bu u, 64 ka le o nufu, ka boosi u, Naawun chaame, ŋani n ŋme i ŋa? 65 Ka ba yeli yadamta tuura u. 66 A n kaa bee, tiŋŋa maa kpemba ni buŋkobkuuriba kpemba ni zaaliguwusiriba laŋsi, ka mari Yeesu gaari, ba wa ti di o seriya, 67 ka yeli u, Ka nyini n niŋi Kristu maa, e yeli ti. Yeesu yeli ba, Ka m yeli ya gba, ya ni yeli, ni m ŋmaarini jiri, koo, 68 ka m mi boosi ya yela, ya ki yeli. 69 Ka, a yi zinaa wara, mani Naawun Nisaala ni zi Naawunni kpeeŋu daana nudii zu. 70 Ba zaa boosi u, Ama e niŋini Naawun biya? O yeli, O niŋini seema ya n yeli. 71 Ba yeli, Ya wumi, ti bi lee n kpabira dansiyasi, a kpali bo, ti gbagba wumi seema o n yeli maa.
