Luuka 21

1Niŋi n na, Yeesu daa n nyaasi n nye bindaandima n lobira ligiri niŋina Naawun dii laanta daka puwa, 2ka mi nye pogkoori nandaana n naa kobu ayi niŋi daka maa puwa. 3Yeesu yeli, Yamonsi ma yeli ya, pogkoori nandaanaa lobi n gaari ba zaa, 4a kpali bo, ba nyisini beela yi ba ligidamta puu lobi, ka ŋu wune, a ni o nandaalim zaa, naa bunso zaa o n mari niŋi. 5Niŋi n na, niseesi togsira Naawun dii yela, ni o mari birikisi suma, a ni bunsuma ba n naa n pi Naawunni piini. Yeesu yeli, 6Ya nyaasi a. Jemanso ni ta ba saami kpe zaa, ka ki ti biriki zaa o pa o todaana zu. 7Ba boosi u, Karichi, jemambo n na yela maa ya n niŋi? Ka a pa ya n ti niŋi, wula n na ti ni niŋi n baŋŋi? 8Yeesu yeli, Ya dasi niriba ba da yomsira ya, a kpali bo, niriba ni zoo n ta, a ti yomsira ya, a yeli, Mani n niŋi so n ya n ta la, koo, Jemani maa paaya. Ya da pa ba zu. 9Ka ya wumi towusi yela ni zabiri yela, ya da zora dabeem, a kpali bo, a zaa ni niŋi poin, baasigu maa mi na ki paa. 10Ka Yeesu lee n yeli ba, Baligusi ni zabi, paaligusi dima gba ba zabi, 11tiŋgbana a yigsira ga, ka seelasi kom o li, toorasi a gbaa niriba ga, ka yatintaasi a niŋi n yi saazu, dabeem o gbaa niriba. 12Poin ka ŋama ŋa niŋi, a kpali m yuuri zu ba ni gbaagira ya, a namsira ya, ka naa ya tira laŋsigu diisi dima, ka yoora ya diisi, ka taasi nadima ni gominasi ba gba ba dira ya seriyasi. 13A jemani n na, ya ni niŋi m dansiyasi. 14A zu, ya ŋme ya sufusi, ka da ti yaso ba n di n boosi ya yela tiri ya, 15a kpali bo, m ni ti ya baŋinisim, ya baŋŋi seema ya n di n yeli, ya saaminiba la zaa ba da tee n di ya amore. 16Ka ya badima ni ya madima ni ya mabiisi ni ya dogim puwa, a ni ya zodima,ba gbaagira ya, a ti ba dira ya seriya, ka ba ku ya seesi, 17ka kpali m zu, niriba zaa ba chisi ya yela. 18Ka ŋama ŋa zaa niŋi ya, ya zukobiri luŋko gba ki li n borigi. 19Ka ya aniya ni kenyiti niŋinisim zu, ya ni nye nyevuri. 20Ka Yeesu lee n yeli, Ka ya nye soojisi n zoo n poli n jili Jiruusilim, ya ni baŋŋi o saaminisim paagira. 21A jemani maa seesi n ba Judiya paaligu ba zo n gaa zoori zuuri, ka seesi n ba tiŋŋa maa puwa, ba mi zo n gaari, ka seesi n ba larima, ba da kpe tiŋŋa maa puwa. 22A kpali bo, a jemani ni niŋi tubiri darigirisim, yaseesi ba n daa n sebi la zaa, a pa niŋi n baasi. 23Ka seesi n mari puusi, a ni seesi ba n nyisimina ni nye nam, ka paaligaa dima ba nye nam ga, a ni tubiri darigirisim. 24Ka soojisi maa ba naa sukara ku ba seesi, ka gbaa seesi loobi girunsi gaari paaligusi zaa, ka ŋma Jiruusilim zaa, o za, a ti paa jemanso baligusi maa kpeeŋu n baasi. 25Saazu, a yi wuluŋu, ŋmeriga ni ŋmeribiisi puwa, ya ni nye yaseesi. A yi durinye puwa, baligusi ni nye nam, ka, a kpali koom n damtira vu zu, ba ki baŋŋi seema ba n di n niŋi, 26ka niseesi n feera yaseesi n ya n niŋi, dabeem o gbaa ba, ba see, a kpali bo, ŋmeribiisi yi saazu ni dammi. 27A jemani maa ba ni nye mani Naawun Nisaala n ba sagbana puu chena, a ni kpeeŋu ni daama ga. 28Ka yaŋama ŋa pa niŋina, ya nyisigi n nyaasi saa, a kpali bo, Naawunni ya n moligi ya ni. 29Ka Yeesu bo ba kiŋaasa yeli, Ya nyaasi tiso ba n boona figi, a ni tiisi zaa. 30A si n ti bosi, ya baŋiya, ni see ya n see. 31Lala n na, ka ya nye yaŋama ŋa, ya ni baŋŋi, ni Naawunni naalim ya n tani. 32Yamonsi ma yeli ya, pimpariŋa dima ki kpi n baasi, ka yela ŋa zaa niŋi. 33Saazu ni tiŋŋa ni baasi, ka m wusigu ki baasi. 34Ka Yeesu lee n yeli, Ya dasi, ka da ti bindira diibu, a ni daam ŋuubu, a ni durinye puu yatitira, a tiri ya, yaseesi n ya n niŋi maa, a da pirigi ya maa seema takpab n gbaagira buŋkoowa. A kpali bo, yela maa ni paa durinye ŋa niriba zaa. 36A zu, taaru ya dasi, ka suusira Naawunni, ya mari kpeeŋu, ka tee n yi yaseesi n ya n niŋi maa puwa, a ni alaanfiya, a ti za mani Naawun Nisaala saani. 37Niŋi n na, bee cheegira zaa, Yeesu yi ba Naawun dii laanta wusira niriba. Yiiŋu zaa, o wa ti ba zoyindaana ba n boona Olivi la zu. 38Ka boguu niŋi zaa, o pori n we Naawun dii laanta, niriba zaa ba wa ti wumina o yela.

will be added

X\