Luuka 19

1Niŋi n na, Yeesu wa ti kpe Jeriko, a gaa n chaŋina tiŋŋa maa puu gaatira. 2Dabyindaana ba niŋi, ba boona u Zakiya, o niŋini lampoo deegiriba kpemba yindaana, ka niŋi bindaana. 3Niŋi n na, o kpabira o nye niso n niŋi Yeesu, ka mi bi teeg o nye u, a kpali bo, zamu maa zooya, ka o mi niŋi nivujiya. 4A zu, o chee n gaa yiya, a wa ti du tiya, ka Yeesu pa ti gaatira, o nye u. 5Yeesu n paa tii maa gbinni, o nyaasi saa, ka yeli daba maa, Zakiya, sigi n ta yoom, a kpali bo, zinaa m ni do e yiri. 6A zu, daba maa sigi yoom, ka mari Yeesu gaari o yiri, a ni pupeelim. 7Ka so zaa n nye yela maa zabi Yeesu yeli, Ya nyaasi, o kpeni dabso n niŋina yabeeri la yiri, a ti zi. 8Niŋi n na, daba maa yeli Yeesu, M duuma, m ya n yeli i ni yaso, e wumi. M ni barigi m bini buyi ti nandaandima, ama ka m daa n zu niso zaa buŋ, m ni ti u bunaasi. 9Yeesu yeli, Zakiya niŋini Ibrahim yaŋŋu, ka zinaa yabeeri che n paŋinisim ta o yiri. 10Lala zu n na, mani Naawun Nisaala ta n ti kpabi seesi n bi nye ba yabeeri che n paŋinisim, ka moligi ba. 11Ba n daa n wumi n ŋa, ka Yeesu wara Jiruusilim la, ba fe maa, ba ni nye Naawun naalim yoom, a zu, Yeesu bo ba kiŋaasa yeli, 12Dabso n nyisigi n niŋi naaba biya. Dindaso o ya n yi o paaligu gaari paaligu yindaana n ba wogila, a wa ti di o gbagba paaligu maa naam ta. 13O n ya n gaari maa, o booli o tumtuminiba piiya, ka naa ligiri bote bote ti ba zaa, ka yeli ba, Ya dee ligiraa loobira, m chena. O n yeli n ŋa baasi, o naa n gaari. 14Ka o paaligu dima chisi u, ka nyisi biisi, ba wa ti yeli, ni ba da naa naam maa ti u. 15Ka ba zagsi, ka naa naam maa ti u, o pori n ta o paaligu. O n paag o paaligu, o yeli ba booli tumtuminiba pii la o n daa n naa ligiri ti la, o nye seema ba n loobi n nye tono, a yi a puwa. 16Niŋi n na, yinni ti yeli, M yidaana, e bote la paasi botesi piiya. 17Naaba maa yeli u, E niŋi nene ga. A kpali e niŋi bimbila yeride n ŋa, m ni pili i tiŋsi pii naam, e nyaasira a. 18Niŋi n na, yinni lee n ti yeli, M yidaana, e bote la paasi botesi anu. 19Naaba maa yeli u, M ni pili i tiŋsi anu naam, e nyaasira a. 20Niŋi n na, yinni lee n ti yeli, M yidaana, deeg e bote la. 21Ni zora i zu, m naa n le kparichee puu sogi. A kpali bo, e mari sufukpeeŋu, ka yi naa bunso e n bi naa n digili, ka cheera binseesi e n bi butira. 22Naaba maa yeli u, Nyini n niŋi tumtuminibee, m ni wusi i e liya, a kpali yaseesi e n togsi la. E baŋŋi m mari sufukpeeŋu, a naagira binseesi ni bi naa n digili, ka cheera binseesi ni bi buri. 23Ka bo n na e bi naa m ligiri niŋi banki puwa, m di ti nye beela paasi? 24Niŋi n na, naaba maa yeli seesi n ba niŋi maa, ni ba deeg o bote la, a ti so n mari botesi pii la. 25Ba yeli, Ti yidaana, o sali n mari botesi piiya. 26Naaba maa yeli, M yeli ya ni, so n mari, ba ni lee n paasi u, ka so n bi mari, ba ni dee beela la o n mari la yi o saani. 27To, m dindimseesi n daa n bi kpabira m di naam maa, ya mari ba ta kpe, a ti ku ba m nufu niŋi. 28Yeesu n daa n togsi n ŋa baasi, o yi n du n wara Jiruusilim. 29O n wara la, o wa ti paa Befeegi ni Befani tiŋsi n ba zoyindaana zu ba n boona Olivi la, ka o tumi o nyaaŋpaariba bayi yeli, 30Ya gaa tiŋso n ba yiya, a wa ti kpe tiŋŋa maa puwa. Ka ya kpeya, ya ni nye bunduuribila n le n za, nira zaa na bi ba u. Ya lerigi u ti ti ma. 31Ka nira zaa boosi bunso zu ya n lerigira u, ya yeli, Ti duuma n kpabira u, a zu n na ti lerigi u. 32Niŋi n na, ba we, ka nye bunduurigu maa, seema Yeesu n yeli la. 33Ba n lerigira u, o daandima boosi ba, Bo n na ya lerigira bunduuribila maa ya niŋi? 34Ba yeli ba, Ti duuma n kpabira u, a zu ti lerigi u. 35Niŋi n na, ba mari u gaa Yeesu saani, a wa ti naa ba bimpinna pa o niŋi, ka ti Yeesu du n zi o niŋi, ba wara, 36ka ba mi naa ba bimpinna we yiya, a wa ti digili soori. 37Ba n wa ti sigira zoo maa zu, a leena Jiruusilim, o nyaaŋpaariba n zoo la tasi n kpeesira Naawunni, a ni pupeelim, a kpali o n daa n niŋi mamaachi yela, ba nye la zu, 38ka ba yetira, Naawunni tini naso o n tumi la barika, ka niŋgbirimaasim ni Naawun veelim bani Alizaana. 39Niŋi n na, Farisii dimseesi n ba zamu maa puu yeli Yeesu, Karichi, yeli e nyaaŋpaariba maa ba cheli vu. 40Yeesu yeli ba, M yeli ya ni, halli ka ba muuriya, kuga ŋa gba ni tasira. 41Ba n ti leeli tiŋŋa maa puwa, Yeesu nye u, ka kpali o zu kumi, 42ka yeli, A di yeli zinni ya baŋŋi bunso n taasira naŋgbanluŋko, ya mi bi baŋŋi, a kpali bo, a sogini, a yi ya nufusi niŋi. 43Dindaseesi ni ta, ya dindima ba ti me gondaasi poli n jili ya, ya da lee n yiira, ka ba zabira ya lugima niŋi zaa, 44ka ku ya ni ya biseesi n ba ya puusi, ka ki ti birikisi ayi gba pa taaba zu. Bo zu n na a ya n niŋi? A kpali Naawunni tani o ti moligi ya, ya mi bi baŋŋi. 45Niŋi n na, Yeesu kpe tiŋŋa maa puwa, ka wa ti kpe Naawun dii laanta, ka katira seesi n koosira bini, 46a yetira ba, Ba daa n sebini kusu zaa, ni Naawunni yeli, ni o dii ni niŋi seela ba n togsira o saani la, ka ya wune naag u loobi tayugsi dii. 47Niŋi n na, Yeesu wa ti wusira niriba taaru zaa, ka buŋkobkuuriba kpemba ni zaaliguwusiriba ni tiŋŋa maa kpemba kpabira ba ku u. 48Ba mi bi nye daama, a kpali bo, niso zaa kpabirini ba wumi o yela.

will be added

X\