Luuka 18

1Niŋi n na, Yeesu daa n bo ba kiŋaasa, ni ba yi togsi n suusira Naawun saani, ka da zagsira o niŋinisim, 2a yeli, Dabso n nyisigi, a niŋi seriyadira, ka bi zora Naawunni, o baga mi ka nisaaldima niŋi. 3Pogkoori mi ba niŋi, ka yi wara o saani ti suusira u, ni o di so n saamina o bini seriya ti u. 4Ka daba maa yi zagsira. Dindaso o fe o sufu niŋi yeli, M bi zora Naawunni, ka m baga gba lee n ka niriba niŋi, 5ama a kpali pogkoori maa n fii ma maa zu, m ni di o binsaamina maa seriya ti u. Ka m bi niŋi n ŋa, o ni fii ma ga. 6Ka Yeesu yeli, Ya nye seema so n bi dira seriya nene maa n yeli. 7A kpali n ŋa zu, ka seesi Naawunni n nyisi la suusira u taaru ni yiiŋu zaa, o ni di seesi n saamina ba seriya ti ba? O ni yuu? 8Akayi. O ni di seesi n saamina ba seriya ti ba yoom. A ni lala zaa, ka mani Naawun Nisaala lee n ta durinye puwa, m ni nye niriba niŋina ma yeride? 9Niŋi n na, Yeesu daa n lee n bo kiŋaasa yindaana, a yeli niseesi n fe maa, ba niŋini nivusuma, ka nyaasira niriba jaga la yela, a yeli, 10Dabsi bayi n nyisigi, ŋa la niŋini Farisii daba, ŋa la mi niŋi lampoo deegira. Dindaso Farisii daba maa we Naawun dii, a wa ti togsi Naawun saani, ka lampoo deegira maa gba we. 11Niŋi n na, Farisii daba maa wa ti za, ka togsi Naawun saani yeli, Naawunni, m kpeesira i ni, a kpali bo, m ka seema dabseesi n be la, tayugsi, zaaligu saaminiba, purimasi, koo, lampoo deegiraa. 12Bakwai zaa m yi leni noori buyi, ka bunso zaa ni nye, ma barigi u bupii zu, a nyisi luŋko ti Naawunni. 13Ka lampoo deegira maa mi za wogila, ka ki lali o zu gba saa, ka ŋme o nyaari, a ni sufusaaŋu, a yeli, Naawunni, m niŋini yabeniŋina, zo ma nimbaa. Ba n ti togsi Naawun saani baasi, ba zaa wara ba yiyasi. Niŋi n na, Yeesu yeli, Lampoo deegira la peri Naawunni, ka o todaana la yela bi peri u. A zu, so zaa n wusi o maŋŋa, o yuuri o du, o yuuri ni sigi, ama so zaa n ti o yuuri sigi, o yuuri ni du. 15Niŋi n na, ba daa n mari bibilisi gba wara Yeesu saani, o siisi ba. Yeesu nyaaŋpaariba n nye n ŋa, ba kari ba, ba cheli. 16Yeesu booli biisi maa, ka yeli o nyaaŋpaariba maa, Ya ti biisi maa ba chena m saani, ka da katira ba, a kpali bo, niseesi n niŋi maa biisi n kpeera Naawun naalim puwa. 17Yamonsi ma yeli ya, so zaa bi sagi Naawunni niŋi naaba yi o niŋi, a maa bibila, Naawunni ki niŋi o naaba. 18Niŋi n na, nayindaana daa n boosi u, Karichisuŋŋu, wula ma n niŋi, ka nye nyevuriso n ka baasigu? 19Yeesu yeli u, Bo n na e booli ma nivusuŋŋu? Naawunni ko niŋina yasuma. 20E tee n baŋŋi Naawun zaaligusi la, da kpabi e todaana poga, da kuura, da zuura, da dira dansiya ni jiri, niŋina e ba ni e ma jilima. 21Naaba maa yeli u, Ni niŋi bii zaa, m bi niŋina a. 22Yeesu n wumi n ŋa, o yeli u, A kpari n che yaluŋko, e niŋi. Wa ti koosi bunso zaag e n mari, a tori nandaandima, a nye tono, a yi Alizaana, ka ti pa m zu. 23Naaba maa n wumi n ŋa, o sufu saami, a kpali bo, o niŋini bindaana. 24Niŋi n na, Yeesu nyaasira u, ka yeli, A ba toom ga, ka bindaandima ba kpe Naawun naalim puwa. 25Bindaana ya n kpe Naawun naalim puu ba toom ga, a gaari nyogima n dee seerigu voori puu yi. 26Seesi n wumi n ŋa yeli, Ee, lala wune, so zaa ki nye moligirisim. 27Yeesu yeli, Yaso nisaaldima n ki tee n niŋi, Naawunni ni tee n niŋi. 28Niŋi n na, Piita yeli Yeesu, Nyaasi, ti cheni ti yiyasi, ka pa e zu. 29Yeesu yeli ba, Yamonsi ma yeli ya, so zaa n che o yiri, koo o poga, koo o ma biisi, koo o ma ni o ba, koo o biisi, a kpali Naawun naalim zu, 30wune ni nye tono ga durinye puwa, ka soosa zu, o ni nye nyevuriso n ka baasigu la. 31Niŋi n na, Yeesu laŋsi o nyaaŋpaariba pii ni bayi maa yeli ba, Ya wumi, ti ya n duni Jiruusilim. Nisaaniŋi n na, mani Naawun Nisaala yaseesi Naawun chaamesi n daa n sebi kusu zaa la ni niŋi. 32Ba ni naa ma ti Aroom dima, ba niŋi ma siya, ka namsi ma ga, a tusi nuntoori wuri ma, 33ka feebi ma, ka ku ma, ka m daba ata daari m ni lee n nyisigi. 34Yeesu nyaaŋpaariba maa mi bi baŋŋi yela maa gbina, a kpali bo, a gbina sogini, ba n bi baŋŋi a. 35Niŋi n na, ba daa n wa ti paagira Jeriko, ka zooma yindaana ba n zi sogbarimini, a dibira. 36O n wumi zamu maa n mari vu gaatira, o boosi bunso ba n niŋina. 37Ba yeli u, Yeesu so n yi Nazire la n ti gaatira. 38A zu, zooma maa tasi n yeli, Yeesu, naaba Dawuda yaŋŋu, zo ma nimbaa. 39Ka seesi n ba yii la zabi u, ni o cheli vu. Ka o lee n maali n tasi ga, a yeli, Naaba Dawuda yaŋŋu, zo ma nimbaa. 40Niŋi n na, Yeesu za, ka yeli ba mari u ta. O n ti leeli u, Yeesu boosi u, 41Bo n na e yeli m niŋi? O yeli, M duuma, m kpabirini e yoo m nufu. 42Yeesu yeli u, Nyaara, e yeride niŋinisim moligi i. 43A puli maa niŋi zooma maa nyaara, ka pa Yeesu zu kpeesira Naawunni. Niriba maa n nye n ŋa la, ba gba kpeesira Naawunni.

will be added

X\