Luuka 16

1Niŋi n na, Yeesu lee n bo o nyaaŋpaariba yeli, Dabso n nyisigi, a mari bini ga, ka naa tumtumina, o nyaasira a zaa. Dindaso ba yeli daba maa, ni tumtumina la saaminini o bini maa. 2A zu, daba maa booli tumtumina maa yeli u, E saamina m bini, a ni wula? Sebi yaseesi zaa e n daa n naa m ligiri niŋi, ti m nyaasi. A kpali bo, m ni nyisi i m tuma niŋi. 3Niŋi n na, tumtumina maa fe o sufu niŋi yeli, M yidaana ni nyisi ma yi o tuma niŋi, wula ma ya n niŋi? M ka kpeeŋu m di n ko, m mi zora vi m di n dibira. 4Mm, m pa baŋŋi seema m di n niŋi, ka m yidaana ti nyisi ma yi o tuma niŋi, niriba ba mari ma gaari ba yiyasi. 5A zu, o booli o yidaana maa samdiriba liŋaliŋa, ka boosi yipaara maa, M yidaana samini ala n ba e zu? 6O yeli, Kpaam gariwasi koowa. Tumtumina maa yeli u, ni o zi, ka lee n sebi o samini gbaŋŋu, kpaam gariwasi pisinu. 7Yindaana lee n ta, o boosi u, Ala samini n ba e zu? O mi yeli, Chi botesi kobsiyi. Tumtumina maa yeli u, ni o zi n sebi chi botesi koowa ni pisiyoobu 8Niŋi n na, yidaana maa wumi tumtumina la birikonsi yela, ka yeli, Ee, o mari yam ga. Ya nyaasi, lala n na seesi n kpabira durinye puu yela mari yam gaari seesi n kpabira Naawun naalim yela. 9Ka Yeesu lee n yeli, M ya n yeli ya ni, ya naa ya durinye puu ligiri, a dira zoolima. Lala n na, ka jemanso paaya ligiri ki lee n tee n da bunso zaa moligi ya, Naawunni ni dee ya, a niŋi o paaligu niŋi, a wara. 10Ka ya ni tee n niŋi nira yeride yabila zu, ya ni tee n niŋi u yeride yakarigu zu. Ka nira mari birikonsi yabila zu, o mi mari birikonsi yakarigu zu. 11A zu, ka ya mari birikonsi yi durinye ŋa puu ligiri ziya, ba ki naa Naawun bindaalim ti ya nyaasira. 12Ka ya mari so bini, ka niŋina a birikonsi, Naawunni ki ti ya gba tono. 13Ya nyaasi, tumtumina ki tee n tumi yidaandima bayi. Ka o ya n niŋi lala, o ni kpabira yinni, ka chisi yinni, koo, o ni tumina yindaana, ka zagsira yindaana. Lala n na, ya ki tee n tumina Naawunni, ka kpabira ligiri. 14Ama Farisii dimseesi n wumi yela ŋa zaa niŋi Yeesu siya, a kpali bo, ba kpabira ligiri ga. 15Ka Yeesu yeli ba, Ya kpabirini ba yeli ya niŋi nivusuma ga, ka Naawunni mi baŋŋi ya sufusi. Ya nyaasi, yaseesi nisaaldima n kpabira, ŋarima n na Naawunni chisi. 16Ka Yeesu lee n yeli, Yaseesi ba n daa n sebi, a yi ti Naawun zaaligusi ni Naawun chaamesi bukusi puwa, daa n ba niŋi, ka Jon Baatisi daa n ta. A saŋa n na, niriba piili n wumi Naawun naalim yela, ka na wumina, ka so zaa kpabira ba mo n kpeera naalim maa puwa. 17Yamonsi, zaaligusi maa beela zaa cherigirisim ba toom gaari saazu ni tiŋŋa baasigu. 18Ka Yeesu lee n yeli, So zaa n kari o poga, ka lee n naa yindaana, niŋi yabee. Ka dabso zaa n naa pogso o sira n kari n basi, koo, o zagsi o sira, o niŋi yabee, a maa o do pogso n bi niŋi o poga la saani. 19Ka Yeesu lee n bo ba kiŋaasa yeli, Dabyindaana n nyisigi n mari bini ga, a yi pili binsuma, ka dira binsuma. 20Nannyaara mi ba niŋi, ba boona u Lazira. Taaru zaa o yi doni bindaana la begu noori, ka o niŋa zaa mari nantaya, 21baasi yi ti leena a. Ka bindaana la yi n ti di, ka seesi n li la, nandaana maa kpabira o piisi a. 22Dindaso nannyaara maa kpi, malakisi mari u gaari Ibrahim saani. O dindaso bindaana la mi ti kpi, ba naag u pi, 23o we kpiinsi ziya, a wa ti nyaara nam ga. Niŋi n na, o nyaasi wogila, ka nye Ibrahim, ka Lazira ba o lugimini. 24A zu, o tasi n yeli, M ba Ibrahim, a kpali bugum zu, m bani beerim puwa, a zu, zo ma nimbaa, ka tumi Lazira o naag o nubila, a wa ti sugi koom ti maa m zulimini. 25Ibrahim yeli, M biya, teesi. E n daa n ba durinye puu la, e daa n dira meesim, ka Lazira mi nyaara nam la. Pimpariŋa o sufu maag u, ka e mi ba beerim puwa. 26Ka a yi ŋama zaa nyaaŋa, bogitintaa bani ti sunsuu niŋi, nira zaa ki tee n yi ti saani gaari e saani, nira mi ki tee n yi e saani, a ta ti saani. 27Daba maa lee n yeli, M ba, m suusira i ni, e tumi Lazira o gaari m dogim puwa, 28a wa ti yeli m ma biduusi banu, ba da ta beerim ŋa ziya. 29Ibrahim yeli, Nyaasi, ba mari bukuseesi Musa ni Naawun chaamesi n daa n sebi la, cheli ba wumi a yela. 30Daba maa yeli, Akayi. M ba Ibrahim, ba ni zagsi. Ama ka niso nyisigi kum puu we wune, ba ni dee ba saamiya. 31Ibrahim yeli u, Nyaasi, ka ba bi dee Musa ni Naawun chaamesi maa yela, halli ka nira kpiya, ka nyisigi n we, ba sufusi ki cherigi.

will be added

X\