Luuka 15

1Niŋi n na, lampoo deegiriba, a ni yabeniŋiniba daa n chena Yeesu saani, ba ti wumi o yela. 2Ka Farisii dima ni zaaliguwusiriba mi ba niŋi, a zabi u yetira, ni o deegirini yabeniŋiniba, ka o ni ba dira. 3A zu, Yeesu bo ba kiŋaasa yeli, 4Ya nyaasi. Ka dabso zaa mari peeri koowa, ka mari a gaari moo puwa, a yindaana wa ti borigi, o ni cheli pisiwai ni awai la, a za moo maa puwa, ka o wa ti kpabira so n borigi la. 5O ti nye u, o ni naag u bugi n ta yiri, a ni pupeelim. 6O ti paag o yiri, o ni wa ti booli o zodima yeli, Ya ti ya puusi peligi, a kpali bo, m peso n borigi la, m nye u. 7A zu, m ya n yeli ya ni, ka yabeniŋina luŋko deeg o saamiya, n ŋa taasira pupeelim ga, a yi Alizaana puwa, a gaari nivusuma pisiwai ni bawai, seesi n ka saamiya deegirisim. 8Koo, ka poga mari poŋ piiya, ka luŋko borigi, o ni kusi katulli, a pii dii maa kpabi u ga. 9O n ti nye u, o booli o zodima, a yeli, Ya ti ya puusi peligi, a kpali bo, m lagfu n borigi la m nye u. 10A zu, m ya n yeli ya ni, ka yabeniŋina luŋko deeg o saamiya, Naawun malakisi puusi yi peligini. 11Ka Yeesu bo yindaana yeli, Dabso n nyisigi, a mari biduusi bayi. 12Dindaso bibilidaana yeli o ba, Barigi m kapite toori ti ma. A zu, o ba barigi n ti o ni o beeri. 13A n ti niŋi daba ayi, bibilidaana maa laŋsi o bini zaa, a gaari paaligu yindaana n ba wogilim ga. Niŋi n na, o wa ti di o bunso zaa jagajaga. 14O ligiri maa, a ni o bunso zaa n ti baasi, kom li paaligu maa, o mi bi lee n mari bunso zaag o di. 15A zu, o wa ti tumina paaligu maa dabyindaana saani, ka daba maa ti o gaari o pu, a wa ti tira o pireekusi bindira, a dira. 16Ka a kpali kom n kuura u ga la, o kpabira o paa pireekusi maa dira a bindiridagiri la, niso zaa mi bi ti u. 17Niŋi n na, o ti baŋŋi o maŋŋa niŋi, ka fe feri, M ba mari tumtuminiba ga, ba dira, ka cheera, ka mani n ba kpe, a ya n kpini kom. 18A zu, m ni nyisigi n gaari m ba saani, a wa ti yeli u, ni m niŋi o ni Naawunni yabee, 19m bi daga o n di n lee n booli ma o biya, o cheli m loobi o tumtuminiba ŋa yindaana. 20Niŋi n na, o nyisigi n chena. O na n ba wogila, o ba nye u, ka zo u nimbaa, ka chee n wa ti tuusi u, a gori u, ka mugsi u. 21Ka bii maa yeli o ba, M ba, m daa n niŋi e ni Naawunni yabee, m bi lee n daga e ni booli ma e biya. 22Ka o ba maa yeli o tumtuminiba, Ya nyisi wajemaŋa pili u, ka naa beŋŋu niŋi o nubila, ka naa sabtaasi piri o noba, 23ka gbaa nagibiliso n karigi la, a ti ku, ti deemi. 24A kpali bo, m biyaa daa n kpini, ka lee n nye nyevuri. O daa n borigini, ka lee n ta. 25Niŋi n na ba deemina, bii maa beeri yi pu chena. O n ti paagira yiri, o wumi ba n ŋmeera, ka waara. 26A zu, o booli tumtuminiba maa yindaana boosi u, bunso n ta. 27Tumtumina maa yeli u, E sunzo n ta, a zu, e ba ku nagibiliso n karigi la, a kpali o n lee n nye u, a ni alaanfiya, ka yela zaa bi mari u. 28O beeri maa je suuri, ka zagsi yiri maa kpeebu. Niŋi n na, o ba yi, a ti niŋi u jaandi, o kpe yiri. 29O yeli o ba, Nyaasi, m bani kpe, a tumina i yuma seem, ka na bi zagsi e yela zaa, ka e na bi naa bubila gba ti ma, m ku, m ni m zodima ti ŋobi, ka deemi. 30Ka pimpariŋa, e biso n deeg e ligiri, a wa ti ti jagimilusi la lee n pori n ta, e kpali o zu gbaa nagibilikarigu, a ku. 31O ba yeli u, M biya, e yi bani m saani, ka bunso zaa ni mari loobi e toori. 32A daga ti n deemina, a ni pupeelim, a kpali bo, e sunzo daa n kpini, ka lee n nye nyevuri. O daa n borigini, ka lee n ta.

will be added

X\