Luuka 13

1A jemani maa seesi yeli Yeesu, ni Aroom gomina Pailati tini ba ku Galili dimseesi, ka ba korigi buŋkobiri tira Naawunni, ba ni buŋkobiri maa zeema jebi. 2Ka Yeesu yeli ba, Ya nyaasi, Galili dimseesi n nye nam maa, barima n niŋina yabeeri gaari Galili dima zaa? 3Akayi. Ka ya bi dee ya saamiya, ya gba zaa ni kpi lala. 4Ya lee n nyaasi. Siloom n ba Jiruusilim puwa, o jirimbisa tintaa n daa n li niriba pii ni banii niŋi, a ku ba la. Barima n daa n niŋina yabeeri ga gaari Jiruusilim dima zaa? 5Akayi. Ka ya bi dee ya saamiya, ya gba zaa ni kpi lala. 6Ka Yeesu bo kiŋaasa yeli, Dabso n nyisigi, a mari o tiisi pu. Tiyindaana ba boona figi mi ba niŋi. Dindaso daba maa we, o wa ti nyaasi, tii maa waliya. O n gaari, ka o na bi wali. 7O yeli kokpaara maa, Nyaasi, yuma ata n na la ma ti kpabi tii maa wala jeera. A zu, che u basi, o da lee n saami ziya. 8Kokpaara maa yeli, M ba, cheli u yuminaa gba, ka ti m ko n poli n jili u, ka naa nagibina niŋi, ka yumini so n chena, ti nye, o ni wali, koo, o ki wali. 9Ka o waliya, nene. Ka o n bi wali, m ni che u basi. 10Dindaso, daborigu daari, Yeesu daa n ba laŋsigu dii, a wusira niriba. 11Pogiyindaana mi ba niŋi, a beera, o toora maa paa yuma pii ni anii, o kuri n chaŋina, ka ki lee n tee n tooli. 12Yeesu n ti nye u, o booli u, ka yeli, M ma, e nye kpeeŋu, 13ka naag o nuusi, a pa o niŋi. A puli maa niŋi, o tooli, ka kpeesira Naawunni. 14Ka laŋsigu dii kpeema je suuri, a kpali Yeesu n tibi daborigu daari la zu, ka yeli niriba maa, Daba ayoobu so zaa ba tumina, ka che daborigu daagaa, so zaa ba da tumina. A zu, ba tibira niriba daba ayoobaa ko, ka da tibira niriba daborigu daagaa wune. 15Niŋi n na, duuma Yeesu yeli, Yomsiriba ŋa. Daborigu zaa ya zaa yi lerigini ya nagidaasi, koo, ya buŋsi, ka mari a gaari, a wa ti ŋu koom. 16Ya nyaasi pogaa, o niŋini Ibrahim yaŋŋu, ka Sitaana ti toora mari u yuma pii ni anii. O veelini m tibi u daborigu daari, koo, o bi veela? 17O n yeli n ŋa, vi gbaa seesi zaa n zabira u la, ka niriba maa zaa puu peligi, a kpali mamaachi yaseesi o n niŋi maa zu. 18Ka Yeesu lee n yeli, M ya n yeli ya ni Naawun naalim yela, a ni seema o n be. 19O niŋini maa bumburigu bila, nira naag u buri o pu, o buli, ka karigi, a loobi tiya, niinsi ti wogi sona, a niŋi o wula niŋi. 20Ka Yeesu lee n yeli, M ya n yeli ya ni Naawun naalim yela, a ni seema o n be. 21O niŋini maa poga n ŋoo zum gariwa, ka niŋi yiisi niŋi a niŋi, a zaa fuŋsi. 22Niŋi n na, Yeesu daa n chaŋina tiŋsi, a wusira niriba, a wara Jiruusilim. 23Dindaso niso boosi u, M duuma, niseesi Naawunni n ya n moligi la zooya, koo, ba bi zoo? Yeesu yeli ba, 24Ya niŋi aniya mari begumootoo maa puu kpe. Nivudamta ni niŋi aniya kpe, ka kpe n je. 25Ya nyaasi, ka yiri maa daana nyisigi n kpari o dinoori, ya ni ba yaŋŋa, a kpaasira kukuluŋ maa, ka yetira, Ti duuma, yoo ti. O mi yeli ya, M bi baŋŋi seela ya n yi. 26Ya pa yetira, E n daa n ba durinye puwa, ti ni ni n di, ka ŋuura, ka e yi yaŋŋa wusira ti. 27O yeli, M yeli ya ni, m bi baŋŋi seela ya n yi, ya niŋini yabeniŋiniba, ya wara. 28Nisaaniŋi n na, ya ni chaatira, ka ŋobira ya nyina, a ni beerim, a kpali bo, ya nyeni Ibrahim ni Isaaka ni Yakubu ni Naawun chaamesi zaa n ba Naawun naalim puwa, ka ya ba yaŋŋa. 29Ka nivudamta ni yi sazu ni sagbinni ni kiŋkagilisi, a ti zi Naawun naalim puu dira. 30Ya nye, seesi n pa nyaaŋa pimpariŋa ni loobi yipaariba, ka seesi mini n pa yii pimpariŋa ni loobi n pa nyaaŋa. 31A jemani maa Farisii dimseesi ta Yeesu saani ti yeli u maa, o yi nisaaniŋi, a kpali bo, naaba ba n boona Herodi la kpabira u ni, o ku. 32Yeesu yeli ba, Ya wa ti yeli nivubee maa, ni o nye. Zinaa ni soosa m tibirini, ka katira kikpaarigusi, ka a daba ata daari m ni baasi yaso zaa ni niŋina maa. 33Zinaa, soosa ni daari, m ya n weni Jiruusilim, a kpali bo, ba bi kuura Naawun chaamesi seela zaa, ka pa Jiruusilim. 34Ka Yeesu lee n yeli, Jiruusilim dima, Jiruusilim dima, ya yi naani kuga kuura Naawun chaamesi o n tumi ya saani la. Ya nyaasi, m daa n yi kpabirini m laŋsi ya, seema nonyaaŋu yi n laŋsi o nobilisi, ka ŋuni a niŋi la, ya zagsi. 35A zu, Naawunni zagsi ya saani, ka ya mi ki lee n nye ma zaa, halli ka ya ti yeli, ni Naawunni naani barika ti niso o n tumi la.

will be added

X\