Luuka 10

1Niŋi n na, dindaso, duuma Yeesu nyisi niriba pisiyapoin ni bayi, ka barigi ba bayaayi, ka ti ba pa yiya, a wa ti kpeera tiŋsi zaa o n di n kpe, 2ka bo ba kiŋaasa yeli, Pu bindira niŋiya nene, ka tumtuminiba mi bi zoo. A zu, ya suusi pudaana o kpabi tumtuminiba ba wa ti laŋsi a. 3Ya wa ti niŋi seema ni yeli ya la, ya ni niŋi maa pebilisi, ka sibonasi poli n jili ya. 4Ka ya wara, ya da mari ligiri, koo kolisi, koo sabtaasi, ka ya da za soori puu puusira niriba. 5Poin, ka ya ti kpe yiri zaa, ya yeli, Naawunni ti ya niŋgbirimaasim. 6Ka niso n kpabira niŋgbirimaasim ba nisaaniŋi, ya niŋgbirimaasim maa ni kpe o niŋi. Ama ka nira zaa mi bi kpabira niŋgbirimaasim maa, o ki nye niŋgbirimaasim maa. 7Ka ya da gaa n kpeera yiyasi. Ya kpe yiri maa koluŋko, ka bindira so zaa ba n ti ya, ya di, ka ŋu. A kpali bo, a daga tumtumina n mari sanyoobu. 8Ka ya ti kpe tiŋŋa zaa, ka ba dee ya, ya dira bindiriseesi ba n ti ya maa, 9ka tibira seesi n beera, ka yeli ba, ni Naawun naalim ti leeli ba ni. 10Ka ya mi lee n kpe tiŋŋa zaa, ka ba bi dee ya, ya yi n za ba sunsuu niŋi, ka yeli, 11Ti pisigi ya tiŋaa tanwuligu la n tabi ti noba la gba basi, ya baŋŋi maa, ya bi niŋi nene. A ni lala zaa, ya baŋŋi maa, Naawun naalim leelini. 12Ka Yeesu lee n yeli ba, Naawunni ti di durinye ŋa seriya, tiŋŋa maa dima ni nye nam ga, a gaari Sodom dima. 13Ya Chorazin dima ni Beseeda dima, ya ni nye nam ga, a kpali bo, mamaachi yaseesi ni daa n niŋi, a yi ya puwa, ka a di daa n niŋini Taya ni Sidon tiŋsi puwa, ba di dee ba saamiya, a yi Naawun saani, ka pili kparicheesi zi tampeelim niŋi, niriba ba baŋŋi ba n dee ba saamiya. 14A la zu, ka Naawunni ti di durinye seriya, ya Chorazin dima ni ya Beseeda dima ni nye nam gaari Taya ni Sidon dima. 15Ka ya Kapaanim dima, ya ki paa Alizaana, ya ni sigi n gaa bugum ziya. 16Ka Yeesu lee n yeli, Niso zaa n wumi ya yela, m yela n na o wumi. Ka niso zaa n zagsi ya yela, m yela n na o zagsi. Ka niso zaa n zagsi ma, so n tumi ma la n na o zagsi. 17Niŋi n na, nyaaŋpaariba pisiyapoin ni bayi maa we, ka pori n ta, a ni pupeelim, a ti yeli Yeesu, Ti duuma, a kpali e yuuri zu, ti tee n kari kikpaarigusi gba basira. 18Yeesu yeli ba, M daa n nyaasirini, ka nye Sitaana li maa saa n nyagsi. 19Ya nye, m ti ya ni daama ni kpeeŋu ya no waagi ni nonsi ni ti dimma Sitaana kpeeŋu zaa, ka ya ki nye daaŋu. 20Ya lee n nyaasi. Ya da ti ya puusi a peligi, a kpali ya ni tee n kari kikpaarigusi basira la zu. Ama ya ti ya puusi a peligi, a kpali bo, ya paasini niseesi n ya n kpe Alizaana puu la. 21A saŋa maa Naawun sii ti Yeesu puu peligi, o yeli, M ba Naawunni n niŋi duuma yi saazu ni tiŋŋa, m kpeesira i ni, a kpali bo, e kiperi zu e sogini yela ŋa, a yi yambaŋiniba saani, ka ti biisi ba baŋŋi a. 22Ka Yeesu lee n yeli, M ba Naawunni ti ma ni daama zaa. Niso zaa bi baŋŋi niso n niŋi ma, ka pa m ba. Ka niso zaa mi bi baŋŋi niso n niŋi m ba, ka pa mani, a ni niso zaa ni kpabira m wusi. 23Niŋi n na, Yeesu loobi n yeli o nyaaŋpaariba ko, Niseesi n nye yaseesi ya n nye ŋa mari pupeelim. 24A kpali bo, m yeli ya ni, kusu zaa nadima ni Naawun chaamesi daa n ba niŋi, ka ba nivudamta kpabira ba nye seema ya n nyaara ŋa, ka bi nye, ka lee n kpabira ba wumi seema ya n wumina ŋa, ka bi wumi. 25Niŋi n na, zaaliguwusiriba yindaana nyisigi, a boosi Yeesu, o niŋi u nyaasi, a yeli, Karichi, Wula ma n niŋi, ka nye nyevuri so n ka baasigu la? 26Yeesu boosi u, Wula n na ba daa n sebi n digili Naawun zaaligusi puu e karimi la? 27Zaaliguwusira maa yeli, Ka niso n kpabira o nye n ŋa, o naag o sufu zaa, a ni o sii zaa, a ni o kpeeŋu zaa, a kpabira o duuma Naawunni, ka kpabira o todaana seema o n kpabira o gbagba la. 28Yeesu yeli u, E yeliya nene, niŋi lala, ka nye nyevuri maa. 29Ka zaaliguwusira maa lee n boosi Yeesu, ba baŋŋi o n bi boosi putoom, a yeli, ?ani n niŋi m todaana? 30Yeesu yeli, Dabso n nyisigi. Dindaso o yi Jiruusilim sigi n wara Jeriko. O n wara maa, tayugsi wa ti gbaag u soori, a fa o bini zaa, ka bu u, o see n do, ka ba zo n gaari. 31Niŋi n na, buŋkobkuuriba yindaana pa soori maa sigi n wara, ka wa ti nye daba maa, ka ŋma n dee seela gaari. 32Lala n na Liivai daba gba niŋi, o n ti nye u, o ŋma n dee seela gaari. 33Niŋi n na, Samaariya dabyindaana pa soori maa chena, ka ti nye u, ka zo o nimbaa, 34ka we o saani, a wa ti niŋi kpaam ni daam pegi o nantaya, ka naa kparicheesi le a, ka naag u ziili o bunduurigu zu, a mari u we, a wa ti niŋi chaŋchaŋiniba dii puwa, ka nyaasira u. 35A n chee bee, o nyisi ligiri ti niso n nyaasira dii maa, ka yeli u, Nyaasira dabaa, ka seema zaa e n lee n saami o niŋi, ka ma lee n ta, m ni yo i. 36Yeesu n ti sulimi sulimini maa baasi, o boosi zaaliguwusira maa, Dabsi bata ŋa, ba wumbo daana n niŋi dabso tayugsi maa n gbaa la todaana? 37Zaaliguwusira maa yeli u, So n zo o nimbaa la. Yeesu yeli u, E gba, e wa ti niŋi lala. 38Niŋi n na, Yeesu ni o nyaaŋpaariba daa n wara, ka wa ti kpe tiŋyindaana. Pogiyindaana mi ba niŋi, ba boona u Maata, a ni o sunzo Mariama. Yeesu n wa ti kpe tiŋŋa maa puwa, Maata deeg u niŋi o yiri, ka lee n wa ti tumina o tuma. O tuma maa zooya, ka o sunzo wa ti zi Yeesu yiya, a wumina seema o n wusira maa. A zu, Maata wa ti yeli Yeesu, M sunzo cheli m ko tumina. Lala veela? Yeli u, o paasi m niŋi. 41Yeesu yeli u, Maata, Maata, yadamta tiri i, ka damtira i ga. 42Yaluŋko n daga, Mariama mi niŋina u, nira zaa mi ki kari u.

will be added

X\