Luuka 1

1M kpeema Tofila, m ya n sebini yeli i yaseesi n daa n niŋi, a yi ti puwa. Jemanso Yeesu n daa n piili n wusira niriba la, nivudamta daa n wumi, ka nye, ka mi yetira ti a yela, ka nivudamta mi lee n sebi a digili. M gba pa n baŋŋi yela maa nene zu, m feni maa, a veelini m sebi seema a n daa n niŋi, a ti i. E tee n wumi a yaseesi, ma kpabira e baŋŋi a yamonsi. 5Dabso daa n nyisigi, ba boona u Herodi, o mi niŋi Judiya paaligu naaba. Dabyindaana mi ba niŋi, ba boona u Zakariya, o mi niŋini Naawun buŋkobkuuriba yindaana, ka o ni buŋkobkuuriba seesi n paasi u tumina, ba boona ba Abiya dima. O poga mi yuuri niŋi Alisibeti, o niŋini Aaron yaŋŋu, 6ka niŋi poginyee, ka o ni o sira zaa kpeera kpebilim, ka ba petira Naawunni, a kpali bo, Naawunni n daa n ti Juusi dima niŋina yaseesi la, barima n niŋina a nene. 8Dindaso, Zakariya ni o taaba buŋkobkuuriba maa daa daa n paa ba gaari Jiruusilim, a wa ti tumina ba buŋkobkuuriba tuma, a yi Naawun dii. 9Ba n ba niŋi maa, ba niŋina seema buŋkobkuuriba yi n niŋi n nyisi ba yindaana, o kpe Naawun dii, a kusi tulale bugum la, ka nyisi Zakariya. Niŋi n na, Zakariya kpe Naawun dii, 10ka zamu maa ba yaŋŋa togsira Naawun saani. 11O n ba nisaaniŋi, o nye Duuma malaki n ti za seela ba yi n kusi bugum la nudii zu, 12dabeem gbaag u ga, 13ka malaki maa yeli u, Zakariya, da zora dabeem, Naawunni wumi e suusigu, e poga Alisibeti ni dogi biduwa, e digili o yuuri Jon. 14E dogi u, e sufu ni peligi ga, ka nivudamta puusi a mi peligi, a kpali ya n dogi u maa zu. 15Ya dogi bii maa, Naawunni ni naag o sii ti u, o loobi Naawun nivukara la yinni, ka ki ŋuura daam zaa, 16ka taasi Juusi dima nivudamta ba pa ba duuma Naawun zu, 17ka Alayija sii ni kpeeŋu kpe o niŋi, o ti naa badima ni biisi maali taaba, ka ti seesi n zagsira la ba dee seema seesi n niŋina nene la n yetira, ka ti niriba niŋi siriya duuma o ta. 18Malaki maa n togsi n baasi, Zakariya yeli u, M ni m poga zaa kpeerini kpebilim, wula ma n niŋi n baŋŋi maa, yaseesi e n yeli la niŋini yamonsi? 19Malaki maa yeli u, M yuuri niŋi Geebiyel, ma ba Naawun saani, o tumi ma, m ti yeli i yaseesi n ya n niŋi maa, ka e bi deeg a. 20A zu, e ni loobi namu pimpariŋa, ka ki lee n tee n togsi zaa, ama yela maa niŋini poin. 21Niŋi n na, zamu maa ba yaŋŋa, a guri Zakariya o yi n ta, ka biina bunso zu o n ba Naawun dii maa puu yuu. 22Niŋi n na, o yi n ta, ka bi teeg o togsi ba saani, ba baŋŋi o nye yaso yi Naawun dii maa puwa, ka o bugsi n wusira ba, ka bi togsira. 23A n niŋi daba ayi, o tumi tuma maa baasi, ka kuli. 24O n kuli la, o bi yuu, ka o poga maa mari puwa, ka sogi o maŋŋa ŋmerisi anu, ka yetira, 25Pimpariŋa m duuma suŋŋi ma, ma mari puwa, niriba ba da lee n tuura ma. 26O ŋmerisi ayoobu daana, Naawunni lee n tumi malaki maa ba n boona Geebiyel la, o gaari tiŋŋa yindaana ba n boona Nazire yi Galili paaligu puwa, 27o wa ti puusi suŋguri yindaana ba n boona Mariama. Mariama mi niŋini dabyindaana poga, ka daba maa na bi naag u. Daba maa yuuri niŋini Joosefi, o mi niŋini naaba Dawuda yaŋŋu. 28Malaki maa n paa Mariama, o puusi u, ka yeli u, Naawunni ti i ni barika, ka ba e saani. 29Mariama n ti wumi o puusigu maa, o sufu damtira u, a kpali bo, o bi baŋŋi o gbinni. 30Ka malaki maa lee n yeli u, Mariama, da zora dabeem, Naawunni ti i ni barika, 31e ni mari puwa, a dogi biduwa, ka digili o yuuri Yeesu. 32Bii maa ni niŋi nivumaŋa, ka ba boona u Naawun biya, ka Naawunni o ti o di o yaa Dawuda naam, 33ka ti o nyaasira Yakubu yaŋsi saŋa ni saŋa zaa, ka o naalim maa ka baasigu. 34Malaki maa n ti togsi n baasi, Mariama yeli u, Nira zaa na bi naa ma, ka wula yaŋama ŋa ya n tee n niŋi? 35Malaki maa yeli u, Naawun sii ni o kpeeŋu ni ti e mari puwa, a dogi bii maa. A zu, ba ni booli bii maa Naawun toori, a ni Naawun biya. 36Pimpariŋa, e dogira Alisibeti, so n kpeera kpebilim, ka ba daa n boona u poginyee la marini puwa, o ŋmerisi ayoobu n na la. 37Nyaasi, Naawun saani, yela zaa ka toom. 38Ka Mariama yeli u, To, m niŋini m duuma tumtumina, cheli o niŋi ma seema e n yeli maa. O n togsi n baasi, malaki maa yi n gaari. 39Niŋi n na, Mariama daa n nyisigi n wa ti du Judiya paaligu zoori yoom, ka wa ti paa tiŋyindaana, 40a wa ti kpe Zakariya yiri, ka puusi o poga Alisibeti. 41Alisibeti n wumi Mariama n puusira u la, bii maa dammi o puu niŋi, ka Naawun sii ti o tasi n yeli Mariama, Naawunni ti i ni barika gaari pogiba zaa, ka ti biso e n ya n dogi maa barika. 43Ka wula zu n na Naawunni niŋi m mi jilima, ma nye niso n ya n dogi m duuma? 44Nyaasi, e n puusi ma la, bii la n ba m puu niŋi maa damini, a kpali pupeelim zu. 45Ka nyini, Naawunni ti i ni barika, a kpali bo, ti duuma malaki n daa n ti yeli i yaseesi n ya n niŋi maa, e niŋi u yeride, ni a n di n niŋi. 46Alisibeti n togsi n baasi, Mariama yeli, M sii kpeesirini m duuma Naawunni, 47wune moligira ma yi yabeeri niŋi, a ti m sufu peligi. 48Mani o tumtumina, o ti m yuuri du, saŋa ni saŋa zaa niriba ba yetira, ni Naawunni ti ma barika ga, 49a kpali bo, wune niŋi kpeeŋudaana, ka mi niŋi ma mamaachi yela. O yuuri mi niŋi bunsuŋŋu, 50ka saŋa ni saŋa zaa, niseesi zaa n zora u, o zora ba nimbaa, 51ka naag o kpeeŋu niŋina yatintaasi, a katira kiŋkinsi, a ni ba sufu niŋi feri feera basira, 52ka mi katira nadima, a yi ba naalim kogusi niŋi, ka mi ti seesi yuya n bi du, a du, 53ka mi naa bunsuma tira nandaandima, ka mi katira bindaandima, a ni ba nuyoosi. 54Ka o tumtuminiba, Juusi dima, o zora ba nimbaa, a moligira ba, 55a maa kusu zaa o n daa n ti ti yaa Ibrahim ni ti yaadima noori, ni saŋa ni saŋa zaa, o ni niŋina la. Lala n na Mariama yeli. 56A jemani maa, Mariama zi nisaaniŋi ŋmerisi ata, ka pori n kuli. 57Alisibeti dogim n daa n ti paa, o dogi biduwa, 58ka tiŋŋa maa dima ni o dogiriba wumi maa, duuma zoni o nimbaa la, ba zaa puusi peligi. 59Daba anii n ti paa, ba ti ŋma bii maa yoori, ka ba kpabira ba naa o ba yuuri n di Zakariya digili u, 60ka o ma zagsi, ka yeli, O yuuri niŋi Jon. 61Ba yeli bii maa ma, Ee, e dogim puu nira zaa na bi di yuuraa. 62A zu, ba bugsi n wusira bii maa ba seema o n kpabira ba digili bii maa yuuri. 63O ba ti ba naa daa ti u, o sebi n digili daa maa niŋi, ni bii maa yuuri niŋi Jon. Yela maa ku ba noya. 64A puli maa niŋi, bii maa ba naŋgbanni yoo, o zulimini larigi, o togsi n kpeesira Naawunni. 65Niŋi n na, dabeem gbaa tiŋŋa maa dima zaa, ka Judiya paaligu dima zaa n ba zoori zuuri togsira yela maa, 66ka seesi zaa n wumi la bi tami o yela, ka yetira, Nyaasi biyaa, ti duuma bani o saani, o yuuri ki du? 67Niŋi n na, Naawun sii daa n ba bii maa ba Zakariya saani, a ti o yeli, 68Ya cheli ti kpeesi ti duuma Naawunni, so ti Juusi dima n tumina la. A kpali bo, o tani ti Juusi dima saani, o ti moligi ti, 69a nyisi niso, a yi o tumtumina naaba Dawuda yaŋsi puwa, o ti moligi ti, 70a maa kusu zaa wune Naawunni daa n ti o chaamesi yeli, 71ni o ni niŋi yela ŋa, a moligi ti, a yi ti dindima ni niseesi zaa n chisi ti yela la saani, 72ka mi zora ti yaadima nimbaa. Kusu zaa, o daa n ti ti yaa Ibrahim noori, ni o ni niŋi yela ŋa, a moligi ti, a yi ti dindima saani, ti da zora ba, ka tumina u, a niŋina yasuma nene ga, ti nyevuya puwa. Ka, a kpali o niŋi Naawunni la zu, o bi zagsi yela maa. 76Ka nyini, m biya, ba ni booli i Naawun chaame, a kpali e ni niŋi siriya, duuma o ta, 77ka mi wusi o niriba, seema o n ya n moligi ba, a che ba yabeeri paŋina ba. 78Naawunni ni niŋi n ŋa, a kpali bo, o marini jilima, a zora niriba nimbaa. O ni ta maa wuluŋu n yi saazu, 79a pusi n naa paaligu tira seesi n ba ligu niŋi, a ni seesi n ya n kpi, ka mari ti gaari niŋgbirimaasim ziya. 80Niŋi n na, bii maa daa n karigi, ka mari yam yi o sufu niŋi, ka wa ti ba dalimpii paaligu puwa, a ti paa jemanso o n daa n piili n wusira Juusi dima la.

will be added

X\