Juude 1

1Ya seesi ti ba Naawunni n nyisi, ka kpabira, ka ya niŋi Yeesu Kristu toori la, mani Juuda puusira ya. M tumina Yeesu Kristu, ka m beeri niŋi Jeemsi. 2Naawunni zo ya nimbaa, ka ti ya niŋgbirimaasim, a ni taaba kpabirisim ga. 3M taaba, m kpabira m sebi n yeli ya ti moligirisim yela ga, ama o tiriya m sebi yayindaana, a duusira ya zuuri, ya niŋina Yeesu yeride nene, ka wusira yaseesi Naawunni n daa n wusi ti, ka ka cherigirisim la. 4M yelini n ŋa, a kpali seema seesi n bi paara Naawun zu n daa n yomsi ya, ka kpe ya puwa. Ba yomsira niriba, ni a kpali Naawunni zora nimbaa ga, ba ni tee n niŋi yabeeri, ka ba mi zagsi ti duuma Yeesu Kristu, so ko n niŋi ti yidaana. Kusu zaa Naawun chaamesi daa n sebi ba yela, ni ba ni li n ŋa. 5Halli ka ya daa n baŋŋi yaseesi nene, m kpabira m teesi ya seema Naawunni n daa n moligi Juusi dima yaadima, a yi Yijipi paaligu kusu zaa la. Ama, ba n daa n ti yi paaligu maa la, o ku seesi n bi niŋi u yeride. 6Ya teesi malakisi yela. Ba seesi n daa n zagsi ba tuma, a ni ba yiya, Naawunni daa n le ba abanasi, a yi ligu niŋi, ba ba niŋi, a ti paa daborigu so o n di n di so zaa seriya la. 7Ya lee n teesi tiŋseesi ba n daa n boona Sodom ni Gomora la, a ni tiŋseesi n daa n leeli a la niriba, ni ba daa n niŋina yabeeri ga, a yi seema dabsi ni pogiba n doora. A zu Naawunni daa n darigi ba tuba, a ti bugum yi saazu di ba, seema o ni darigi yabeniŋiniba tuba, a wara. 8Lala n na, yomsiriba maa mi zaasira zaasima, ka niŋina yabeeri, a yi seema dabsi ni pogiba n doora, ka bi paara zaaligusi zu, ka tuura malakisi. 9Ama malakisi kpeema, so ba n boona Mayiku la, ka o ni Sitaana daa n zabira, a kpali ba so n di n dee Musa kpiiŋu zu, o daa n bi tuura u, ama o yeli u, Naawunni ni boosi i. 10Ama niriba maa, ba zabira yaseesi gbina ba n bi baŋŋi, ka yaseesi ba n baŋŋi, a maa seema buŋkobseesi n ka feri la n baŋŋi, yela maa ti ba liira. 11Naawunni ni ti ba nye nam ga, a kpali ba n niŋina yabeeri seema kusu zaa Keen n daa n niŋina, a chisira o sunzo la, a ni seema Beelim n daa n niŋi n kpabira ligiri la, a ni seema Koora ni o nyaaŋpaariba n daa n zagsi zaaligusi, ka kpi la. 12Ya nyaasi, ya n ti laŋsi n dira, a kpali ya n kpabira ya taaba Yeesu nyaaŋpaariba, niriba maa gba mi dira, ka saamina yela, a ni dabilim, ka kpabira ba ko yela. Ba niŋini maa sagbana n ka koom, ka chaŋina. Koo tiseesi n paa wala jemani, ka bi wali. O niŋini maa a n kpi, ba vigi a basi. 13Koo teeku koom n damtira ga, ka niriba nyaara ba yabeeri. Koo ŋmeribiseesi n chaŋina saazu, ka ni loobi ligu, a wara saŋa ni saŋa zaa. 14Niriba maa yela n na dabso ba n boona Yiinoki, ka niŋi Adam dogim nuu ayapoin la daa n togsi, a yeli, ni o duuma Naawunni ni mari o malakisi tusa ta, 15a ti di so zaa seriya, ka ti yeli so zaa n bi paara a zu, ni ba liya. A kpali bo, ba yabeeri bi peri u, ka ba togsi yabeeri ŋmeŋsira u. 16N ŋa niriba fomina ga, ka zabira taaba, ka niŋina ba gbagba kiperi, ka kpalimina, ka mari naŋgbanmeesim yomsira niriba, a ti nyaara tono. 17M taaba, ya teesira seema ti duuma Yeesu Kristu tumusi n daa n yeli yaseesi n ya n niŋi, 18a yeli ya, ni baasigu maa ti paa, niriba ni niŋina ya siya, ka bi paara Naawun zu, ama ba gbagba kiperi. 19Ba kpabira durinye puu yela, ka ti niriba zabira taaba, ka bi mari Naawun siya. 20Ama ya wune, ya moo nufu bamsira Naawun yeride niŋinisim nene, ka naag o sii togsira o saani, 21ka niŋina seema o n kpabira, ka gutira ti duuma Yeesu Kristu, o ti zo ya nimbaa, ya nye nyevuriso n ka baasigu la. 22Ka niseesi n ka tama, ya wusi ba yamonsi, 23a moligi ba, a yi bugum niŋi, ka zora seesi nimbaa, a ni dabeem, a chisira ba bunso zaa ba n daa n naa n niŋina yabeeri. 24Ya nyaasi. Naawunni ni tee n ti ya da li, ka ti ya da mari yabee zaa, a yi jemanso o n di n mari ya gaari o gbagba saani, a ni ya pupeelim. 25O ko n niŋi Naawunni, ka ti ti duuma Yeesu Kristu moligi ti. A zu, cheli niriba baŋŋi maa, o mari kpeeŋu, a ni naalim, a ni daama zaa, a yi jemanso zaa piiligu, a wara saŋa ni saŋa zaa.

will be added

X\