Juusi dima 5

1Ya lee n nyaasi. Buŋkobkuuriba zudaana zaa ba n nyisi, a yi nisaaldima niŋi yi ku buŋkobiri tira Naawunni, a ti kpisi niriba yabeeri. 2Ama zudaana maa gba niŋina yabeeri, a zu o ni tee n zora seesi n ka baŋinisim, ka niŋina yabeeri la nimbaa. 3Ka buŋkobseesi o n ku n tira Naawunni, o ni niriba zaa yabeeri zu n na. 4Ama ka o ti kpi, ka ba ya n nyisi yindaana, so zaa ki tee n nyisi o maŋŋa o loobi zudaana maa, ama Naawunni ko ni tee n nyisi u, seema kusu zaa o n daa n nyisi Aaron la. 5Lala n na Yeesu Kristu gba bi nyisi o maŋŋa o loobi maa zudaana maa, ama Naawunni daa n yeli u, E niŋini m biya, zinni ma mi loobi e ba. 6Ka o lee n yeli, E ni niŋi zudaana saŋa ni saŋa zaa, a maa seema Mekizade n daa n niŋi la. 7Ya lee n nyaasi. Yeesu n daa n ba durinye ŋa puwa, o daa n naa nintam tasi n suusira Naawunni ga, so di n tee n moligi u, a yi kum puu la. Ka a kpali o n daa n tira Naawunni jilima la zu, Naawunni daa n wumi o suusigu maa. 8Halli o n daa n niŋi Naawun bii la, o daa n nye nam, a paara o ba maa zu. 9Ama o tuma zaa n daa n ti baasi, o daa n loobi n moligira so zaa n paara o zu, ba ti nye moligirisim, a wara saŋa ni saŋa zaa. 10Ka Naawunni daa n booli u zudaana, a maa seema Mekizade n daa n niŋi la. 11Yela ŋa zooya ga, ka ti kpabira ti wusira ya, ama wusigu maa ba toom, a kpali bo, ya bi kpabira a wuminisim. 12Pimpariŋa o veela ya di niŋi wusiriba, ama ya na kpabira niso o wusira ya Naawun buku piiligu yela. O niŋini maa ya na nyisimina bisiri, ka na bi paa bindira diibu. 13So zaa n nyisimina bisiri niŋini bibila, ka bi baŋŋi yasuma. 14Ama so n dira bindira niŋini nivukarigu, ka pa baŋŋi yasuma ni yabeeri, seema a n kuri.

will be added

X\