1 A zu, m taaba, seesi Naawunni n booli, ya ti tumina u la, ya feera Yeesu yela. Ti saani, wune Yeesu niŋini maa buŋkobkuuriba zudaana, a ni Naawun tumu. 2 Naawunni daa n nyisi u, ka o daa n tumina u nene, a maa seema kusu zaa Musa gba n daa n tumina Naawun niriba nene la. 3 Ama o daga maa Yeesu o mari jilima ga gaari Musa, a maa seema niso n meera dii mari jilima gaari dii maa la. 4 A kpali bo, diso zaa mari o meera, ama Naawunni daa n maali bunso zaa. 5 Musa n daa n tumina Naawun niriba nene la, o daa n wusira yaseesi Naawunni n wusira u la. 6 Ama Yeesu Kristu nyaasira Naawun niriba nene, a maa seema bii n nyaasira o ba bini. Ka ti wune, ka ti bi zagsi ti tama, a ni tama maa wusigu, ti niŋini Naawun niriba. 7 N ŋa zu, Naawun sii yetira, Zinni, ka ya wumi o goo, 8 ya da mari zagsigu, a maa seema kusu zaa ya yaadima n daa n mari la. A jemani maa ba daa n chaŋina dalimpii paaligu yuma pisinaasi, ka nye m yaniŋisa nisaaniŋi. Halli lala zaa ba daa n zagsi, ka niŋi ma nyaasira. 10 A zu, m daa n je suuri niŋi ba, a yeli, ni ba sufusi bi kpabira yamonsi, ka ba bi baŋŋi m kiperi. 11 Ka a kpali m suuri maa zu, ma lee n yeli kpeeŋtiri, ni ba ki tee n nye vuusim so ni ya n ti maa zaa. 12 A zu, m taaba, ya dasi ya so zaa o da feera feribeeri, koo, a zagsira yeride niŋinisim. A kpali bo, yela maa ni ti o da lee n paara Naawun gbagba zu nene. 13 Ama taaru zaa, a ni jemanso zaa, ya duusira taaba zuuri, yabeeri ni yomsigu, a da miina ya luŋko zaa. 14 Lala n na, ka ti paara tamaso ti n piili n mari la, a ti paa baasigu, Yeesu Kristu niŋini ti toori. 15 A maa seema ba n daa n yeli, Zinni, ka ya wumi o goo, ya da mari zagsigu, a maa seema ya yaadima n daa n zagsira la. 16 Ba seesi n daa n wumi, ka zagsira la daa n niŋi seesi zaa Musa n daa n mari yi Yijipi paaligu puwa, 17 ka ba chaŋina dalimpii paaligu puwa yuma pisinaasi la. Nisaaniŋi ba nivudamta daa n kpi. Barima n daa n niŋi seesi n daa n niŋi yabeeri, a ti Naawunni je suuri yuma pisinaasi la. 18 Ka a kpali ba zagsigu la zu, Naawunni daa n yeli kpeeŋtiri, ni ba ki tee n nye vuusim so o n ya n ti maa zaa. 19 Lala n na, a kpali seema ba n daa n bi niŋi Naawunni yeride la, ba daa n bi nye vuusim maa.
