Kolosi 3

1Ya lee n nyaasi. A kpali ya ni Kristu daa n nyisigi kum puu la zu, ya moo nufu kpabi Alizaana yela, seela Kristu n ba Naawun nudii zu la, 2ka da ti ya bagsi ba durinye puu yela. 3A kpali bo, o niŋini maa ya n kpi, ka mari nyevuri, a yi Kristu saani, so n ba Naawun saani la. 4A zu, Kristu so n tira ti nyevuri la, ka o pa lee n ti ta, ya ni ba o saani, a ni daama. 5A zu, ya zagsi ya durinye puu yabeeri, halli taaba pogiba kpabirisim, koo diisi saaminisim, koo feribeeri, koo bini kpabirisim, o niŋini maa ya n kpabira durinye bini, a gaari Naawunni. 6N ŋa zaa ni ti Naawunni darigi niriba tuba. 7Saŋa la ya n daa n ba yabeniŋiniba puwa, ka niŋina yabeeri ŋa. 8Ama pimpariŋa ya da lee n niŋina a, halli yabeeri maa, koo suya jeebu, koo zabirisim, koo daaŋu niŋinisim, koo tuubu, koo yatogibeeri. 9Ka ya da ŋmaara jiri taaba saani, a kpali bo, ya pa cherigiya, ka bi lee n kpabira ya yakura maa, 10ka Naawunni ti ya feripaala, a ni baŋinisim, ya loobi maa o gbagba. 11A zu, ya da lee n yetira, ni nivu niŋi Juusi nira, koo Giriiki, koo saŋkariŋmaa, koo kisooli, koo saana, koo baligu, koo giruŋŋu, koo so n bi niŋi giruŋŋu. Ya zaa niŋini Kristu niriba, ka o ba ya zaa niŋi. 12Lala n na, ya niŋi seesi Naawunni n daa n nyisi, ya niŋi o toori, ka o kpabira ya. A zu, ya zora nimbaa, ka tira jilima, ka da kpalimina, ka mari bunye, ka tira taaba kenyiti. Ama ka so zaa niŋi o todaana yabee, o che n paŋŋi u, a maa seema ti duuma n daa n che ya yabeeri paŋŋi ya la. 14Ka a puwa, bunso n gaari a zaa, ya kpabira taaba, ya zaa loobi liŋini, 15ka niŋgbirimaasim, so Kristu n tira la o ba ya sufusi niŋi, seema zaa o n daa n nyisi ya, ya niŋi luŋko, a niŋina la. Ka ya kpeesira Naawunni, 16ka ti Kristu yela zaa ba ya sufusi niŋi, ka wusira taaba, a ni yam zaa, ka yiimina yiimseesi ba n yiimi n tira Naawunni la zaa, ya goosi ni ya sufusi zaa a kpeesira u. 17Ka bunso zaa ya n niŋina, koo, a yetira, ya niŋina a, Yeesu yuuri o du, ka naag o yuuri maa kpeesira ti ba Naawunni. 18Pogiba, ya wumina ya siriba noya, a maa seema n veela ti duuma nyaaŋpaariba ba niŋina. 19Siriba, ya kpabira ya pogiba, ka tira ba jilima. 20Biisi, ya wumina ya niriba noya, a yi bunso zaa niŋi, a kpali bo, n ŋa petira ti duuma. 21Badima, ya da namsira ya biisi, a koo ya ni saami ba sufusi. 22Girunsi, ya wumina ya yidaandima noya, a yi bunso zaa niŋi, ka da tumina maa seesi n yomsira niriba, a tumina ba nufu niŋi ko, ama ya yi tumina nene, a ni sufuluŋko, a tira ti duuma jilima. 23Lala n na, bunso zaa ya n niŋina, ya niŋi aniya, a maa ya n tumina ti duuma, ka bi tumina nisaaldima. 24A kpali bo, ya baŋiya maa, wune ni ti ya laada. Ti duuma Kristu n na ya tumina la. 25Ama yabeniŋiniba zaa, Naawunni ni darigi ba tuba, a kpali ba yabeeri zu. Naawunni bi gamsira.

will be added

X\