Niŋinisim 4

1Piita ni Jon n daa na togsira niriba maa saani, buŋkobkuuriba ni Naawun dii pirisisi zudaana ni Sajusii dima ta, 2a ti je suuri, a kpali seema Piita ni Jon n naa Yeesu kum nyisigirisim la yela, a wusira maa, Naawunni ni nyisigi niriba, a yi kum puwa. 3A zu, ba gbaa ba, ka, a n niŋi zaanoori la zu, ba yo ba dii. 4Ama niriba maa n wumi seema Piita ni Jon n wusi la, ba nivudamta dee Yeesu yela di, Yeesu nyaaŋpaariba pa paa dabsi tusa anu. 5A n kaa bee, a yi tiŋŋa maa puwa, nivudamta sari, nadima ni kpemba ni zaaliguwusiriba, 6a ni buŋkobkuuriba zudaana Ana, a ni Kayafa, a ni Jon, a ni Alisaanda, a ni niseesi n yi buŋkobkuuriba zudaana maa dogim puwa, ba zaa sari, 7ka nyisi Piita ni Jon ni dabso n di n niŋi boobi maa ta, ba ti za seriya diibu ziya, ka ba boosi ba, Bo daama koo yuuri n na ya si naa n tibi dabaa? 8Nisaaniŋi n na, Naawun sii dee Piita niŋi, o yeli ba, Ti nadima, a ni ti kpemba, 9zinaa ya dira ti seriya, a kpali yasuŋso si n niŋi boobi ŋa, seema o n nye alaanfiya la. 10Ti kpabira ya ni Juusi dima zaa ya baŋŋi maa, Yeesu, so ya n daa n ku, ka Naawunni nyisigi u, a yi kum puu la, o yuuri ni o daama n na ti naa n tibi daba maa, o za kpe, a ni alaanfiya. 11Lala n na Yeesu niŋini maa kugiso dimeeriba n daa n meera, ka nyisi n basi, ka o pa loobi kuga maa zaa zudaana. 12A yi durinye ŋa zaa puwa, so zaa ki tee n moligi niriba, a yi ba yabeeri tubiri darigirisim niŋi, ama Yeesu koluŋko. Wune ni tee n moligi ba. 13Kisari maa n ti nye seema Piita ni Jon n mari dabilim la, ka pa baŋŋi maa, ba bi we sukuri zaa, a ku ba noya, ama ba baŋŋi maa, ba ni Yeesu n daa n ba niŋi. 14Ka dabso ba n tibi maa mi za ba saani, a zu, kisari maa bi tee n yeli ba seŋ. 15Ama ba yeli ba ba yi kisari maa niŋi, kisari maa ba togsi taaba saani, 16ka yeli, Wula ti ya n niŋi dabsaa? Jiruusilim dima zaa baŋŋi ba n niŋi mamaachi yela maa, ti ki lee n tee n chisi. 17Ti mi bi kpabira niriba ba wumina Yeesu yela, a zu, ya cheli ti kpaasi ba tuba, ba da lee n togsi Yeesu yela zaa, a wusira niriba. 18A zu, kisari maa booli ba, a ti kpaasi ba tuba yeli ba, Ya da lee n naa Yeesu yela togsi n wusira nira zaa. 19Piita ni Jon yeli ba, Wumbo n so Naawun saani, ti wumi n tira ya, koo, ti wumi n tira Naawunni? 20Ti wune ni yeli yaseesi ti n nye, ka wumi. 21Niŋi n na, kisari maa lee n yeli ba yaseesi, a kpabira ba valisi ba, ka ti ba yi n gaari. Ba bi nye daama darigi ba tuba, a kpali dabso ba n tibi maa gaari yuma pisinaasi, ka so zaa kpeesira Naawunni tira u. 23Ba n ti nyisi ba la, ba daa n gaari ba zodima saani, a wa ti yeli yaseesi kpemba ni buŋkobkuuriba kpemba maa n yeli ba la. 24Ba zodima n wumi n ŋa, ba zaa togsi Naawun saani, ka yeli, Ti duuma, nyini n maali saazu, tiŋŋa, teeku, a ni bunso zaa n ba a niŋi. 25Kusu zaa e sii daa n ti ti yaa naaba Dawuda, so n daa n niŋi e tumtumina la, o yeli, Wula n na baligusi je suuri ga? Ka wula n na ba to jina je? 26Wula n na durinye nadima niŋinini siriya, ba laŋsi n zabi m duuma, a ni o Kristu? 27Seema naaba Dawuda n daa n yeli maa, o lala niŋiya. Yamonsi, a yi tiŋaa puwa, naaba Herodi, a ni Aroom gomina ba n boona Ponti Pailati la, a ni Juusi dima, a ni baligusi, 28ba zaa daa n laŋsi, a ti niŋi e tumtumina suŋŋu Yeesu daaŋu, seema kusu zaa e n daa n le, ka baŋŋi, ka cheli ba niŋi. 29A zu, ti duuma, da ti seema kisari maa n funti ba la niŋi, ka ti ti wune, e tumtuminiba, ti togsira e yela dabilim tiri, 30ka mi naag e daama tibira niriba, ka niŋina mamaachi yela, a kpali e tumtumina suŋŋu Yeesu, a ni o yuuri zu. 31Ba na n togsira Naawun saani la, seela ba n be maa yigsini, ka Naawun sii kpe ba zaa niŋi, ka ti ba togsi Naawun yela dabilim tiri. 32A saŋa la, seesi n paara Yeesu zu la daa n marini naŋgbanluŋko, so zaa bi yetira, ni bunso o n mari niŋini o toori, ama ba yi naani, a tori taaba. 33Niŋi n na, tumusi maa daa n nye daama ga, a wusira niriba seema Naawunni n nyisigi Yeesu, a yi kum puu la. Ka Naawunni ti nyaaŋpaariba maa zaa barika ga, 34ba liŋini zaa bi nyaara nam. A kpali bo, seesi n niŋi bindaandima yi koosi ba bini, a naa ligiri maa ti tumusi maa, ba tori n tira seesi n bi mari la. 36A jemani maa dabso daa n ba niŋi, ba boona u Joosefi, ka tumusi maa mi boona u Baanaba, o yuuri maa gbinni niŋi summa, ka o dogim puu yuuri niŋi Liivai, ka o mi yi Sayipira paaligu. 37Niŋi n na, o koosi o pu, ka naa ligiri maa ti tumusi maa.

will be added

X\