Niŋinisim 3

1Dabyindaana daa n ba niŋi. Ba n dogi u zaa, o na bi nyisigi saa chaŋŋi. Taaru zaa ba yi mari u wa ti ziili Naawun dii laanta begunoori ba n boona Veelim la, o dibi n nye bini, a yi seesi n kpeera la. Dindaso, wuluŋgauwa, jemanso niriba yi n we Naawun dii laanta, ba wa ti togsi Naawun saani la, Piita ni Jon nyisigi n we, ba wa ti togsi Naawun saani. 3Ba n wa ti paa begunoori maa, ka ya n kpe, boobi maa nye ba, ka dibi ba. 4Piita ni Jon loobi n nyaasi u, ka Piita yeli, Nyaasi ti. 5Boobi maa nyaasi maa ba ni nye bunso ti u, 6ka Piita yeli, Halli m bi mari ligiri, m ni ti i bunso ni mari. Yeesu Kristu n yi Nazire la ti ma ni daama. Nyisigi saa, a chaŋŋi. 7Piita n ti togsi n ŋa baasi, o gbaa boobi maa nuwa, o nyisigi. A puli maa niŋi, o nobpana ni o nobsiŋkpugila nye kpeeŋu, 8o gbari n nyisigi n za, a chaŋŋi, o ni Piita ni Jon kpe Naawun dii laanta. Ka boobi maa chaŋina, ka chigsira, ka kpeesira Naawunni. 9Niriba maa n ba niŋi maa nye u, o n chaŋina, ka kpeesira Naawunni la, 10ka ba baŋŋi o n niŋi boobi, so n zi begunoori ba n boona Veelim la, a dibira la. Yela maa ku ba zaa noya. 11Niŋi n na, Piita ni Jon daa n ba kidedeso ba n boona Sulimaana kidede la puwa, daba maa tabi ba, ka niriba zaa chee n wa ti laŋsi nisaaniŋi, a kpali yela maa ku ba noya ga. 12Piita n nye seema ba n laŋsi maa, o yeli ba, Juusi dima, wula n na yaso n niŋi ŋa ku ya noya? Ka wula ya nyaasira ti ni dabaa ŋa? Pa ti gbagba daama n na, koo yasuma, ti naa n tibi dabaa, o chaŋina la. 13Naawunni, so Ibrahim ni Isaaka ni Yakubu ni ti yaadima n daa n tumi, wune niŋi yelaa, o tumtumina Yeesu yuuri o du. Yarima n daa n ti ba gbaa wune Yeesu, a mari u gaari gomina ba n boona Pailati la saani. O daa n ya n nyisi u, ya zagsi. 14Lala n na ya chisi Naawun nivusuŋŋu Yeesu, ka yeli gomina maa, ni o nyisi nivukuura la basi, ka che Yeesu. 15Lala n na, ya ku Yeesu, so n tira nyevuri la, ka Naawunni nyisigi u kum puwa, ka tirima n niŋi yela maa dansiyasi. 16Ya nyaasi dabaa. Ya baŋŋi u, ka baŋŋi o n nye kpeeŋu. O n niŋi Yeesu yeride la zu, o nye alaanfiya nene, ya zaa nufu niŋi. 17Piita lee n yeli, M yidima, ya ni ya kpemba n daa n niŋi n ku Yeesu la, ya daa n bi baŋŋi o yela nene, ka Naawunni mi cheli ya niŋi lala, 18seema kusu zaa o n daa n ti o chaamesi zaa yeli maa, o Kristu ni nye nam la. 19A zu, ya dee ya saamiya, ka cherigi ya sufusi, Naawunni o naa ya yabeeri che n paŋŋi ya, ka tira ya niŋgbirimaasim, 20ka ti Yeesu, so n niŋi Kristu, o n daa n nyisi la o ta ya saani. 21Pimpariŋa Yeesu ba Alizaana puwa, Naawunni o ti niŋi yaso zaa o chaamesi n daa n yeli kusu zaa la baasi. 22Kusu zaa Musa daa n yeli, ni ti duuma Naawunni ni nyisi chaame, a yi Juusi dima puwa, seema o n nyisi wune Musa la. Ni ya wumi yaseesi zaa chaame maa n ya n yeli, ka da zagsi. 23Ni ka so zaa n zagsi, ka yeli, ni o ki wumi, Naawunni ni nyisi u, a yi Naawun niriba puwa, ka ku u. 24Lala Musa daa n yeli, ka Naawun chaame Samiyu ni Naawun chaamesi zaa n pa o zu la mi yeli pimpariŋa yela. 25Yarima n niŋi chaamesi la yaŋsi, ka noso Naawunni n daa n ti ya yaadima, a yeli, ni Ibrahim yaŋsi ni ti durinye baligusi zaa nye barika la, yarima yela n na. Lala zu, 26Naawunni daa n nyisigi o tumtumina Yeesu kum puwa, ka tumi u, o ta ya saani, a ti ya barika, ya zaa ya cheli ya yabeeri niŋinisim.

will be added

X\