Niŋinisim 27

1Niŋi n na, soojisi kpemba yindaana daa n ba niŋi, ba boona u Juliya, o ni o taaba soojisi zaa yuuri niŋi naaba Agasita soojisi. A jemani maa gomina ba n boona Fesita la ŋme o sufu, ni jemanso paaya, ba ti mari diyooriba gaari Itali paaligu, o naa Pool ni diyooriba la seesi ti soojisi kpeema maa o nyaasira ba. 2Ka ti ni ba zaa wa ti kpe ŋarintintaa n yi Adamitiya, ka ya n gaari tiŋseesi n ba Asiya paaligu noori, ka dabso ba n boona Aritaaka, ka niŋi Tesalonika n ba Masidoona paaligu puu la biya paa ti gaari. 3A n chee bee, ŋariŋu maa paa Sidon, ka soojisi kpeema maa mari Pool ni jilima, ka ti o wa ti puusira o zodima, ba mari u, ka o pori n kpe ŋariŋu maa puwa, ti gaari. 4Ti n wara la, sau ŋmeera ŋariŋu maa, ti saa Sayipira paaligu, 5ka lee n wa ti saa Silisiya ni Pamfiliya paaligusi, ka wa ti paa tiŋŋa yindaana ba boona Mira, ka o ba Lisiya paaligu noori. 6Nisaaniŋi n na ti yi ŋariŋu maa puwa, ka soojisi kpeema maa nye ŋarintintaa yindaana n yi Alisaandi, ka ya n ti gaari Itali paaligu, ti wa ti kpe u, 7ka o yi n chaŋina beelabeela, ti di daba ayi, ka paa Nida, a ni nimbirimoo. Ama a kpali sauwa n bi sagi ti wara yii zu, ti loobi n wa ti saa Salimooni n ba Kiriiti paaligu, 8ka chaŋina beelabeela begsi paaligu maa noori, a wa ti paa tiŋso ba n boona Zisuŋŋu, a leeli tiŋŋa yindaana ba n boona Lasiya. 9Poin ka ti paa nisaaniŋi, ti duusi ŋariŋu maa yuu, naŋgbanleebu daa ti gali, a paa jemanso niriba n zora dabeem ba duusira ŋarima, a yi teeku puwa, ka pa paa niŋi. Pool yeli ba, 10M taaba, m baŋiya, ka ti yi n gaari ti ni nye daaŋu, ka saami ti ziirisi, a ni ŋariŋu maa, a ni ti nyevuya. 11Ama soojisi kpeema maa zagsi Pool noori, ka wumi ŋariŋu duusiriba kpeema ni ŋariŋu maa daana noya. 12Ka a kpali seela ba n be la bi veela ba n yuugira niŋi, a yi waari jemani, ba nivudamta mi kpabira ba yi nisaaniŋi duusira, a koo ba ni tee n paa tiŋso ba n boona Fiiniki, ka ba Kiriiti paaligu noori, ka to wuluŋu liya. 13A n ti niŋi daba ayi, sau daa n wa ti yi kiŋkagili, a vaara boinboin, ba fe maa, ba ni paa seela ba n kpabira. A zu, ba nyisi ŋariŋu maa kutiri, a yi koom puwa, ka o wa ti begsi Kiriiti paaligu noori. 14A n ti niŋi beela, sautintaa yi kiŋkagili maa yindaana, a gali paaligu maa, ka ti ŋme ŋariŋu maa, 15ŋariŋu maa bi teeg o za, ka loobi n wara kosunsuwa, 16a wa ti saa kuŋkunni yindaana ba n boona Kooda. Ti n wara maa, ti niŋi aniya naa ŋarimbila n ba koom puu maa, a du biŋkarigu maa puwa, ka le. O yela wumi ti ga, ka ti niŋi u, 17ka lee n na midaasi, a le ŋarintintaa maa poli n jili, o da saami. Niŋi n na, ba fe maa, sau ni mari ba gaari seela n bi limsira, a wa ti saami ŋariŋu maa. A zu, ba lerigi ŋariŋu maa tantitintaa, sauwa o da lee n ŋmeera u mari ba wara yoomyoom, ka o dolisi n gaatira. 18A n chee bee, sau vaara ga, ka koom damtira ga, ba piili n nyisi ziirisi basira. 19A n lee n kaa bee, daba ata daari, ba gbagba nyisi ŋariŋu maa binseesi basi. 20Ti lee n di daba ayi, ka bi nye wuluŋu, koo ŋmeribiisi zaa, ka koom na damtira ga, ti zaa fe maa, ti ki baa. 21Lala n na ti yuu, ka so zaa bi di bindira. A jemani maa Pool nyisigi n za, a yeli, M taaba, ti n daa n na ba kuŋkunni zu la, m yeli ya, ni ya da ti ŋariŋu maa yi Kiriiti paaligu gaari seela zaa, ka ya zagsi, a nye namaa, ka ya bini lee n saami. 22Ya niŋi aniya da zora dabeem, ya yindaana zaa ki kpi, ka ŋariŋu maa wune ni saami. 23Wula ma niŋi n baŋŋi n ŋa? Yiiŋu la Naawunni so n niŋi m duuma, ka ma tumina u la tumi o malaki o ta m saani, 24a ti yeli ma, Pool, da zora dabeem, e ni paa Aroom naaba, o di e seriya, ka Naawunni ki ti e taaba la n ba e saani, a yi ŋariŋu maa puu maa liŋini zaa o kpi. 25M niŋini Naawunni yeride, ni seema malaki maa n yeli maa ni niŋi, a zu, ya da zora dabeem. 26Dindaso ŋariŋaa ni saami, a yi kuŋkunso n ba teeku ŋa sunsuu niŋi. 27Ti dapii ni anaasi yiiŋu, sauwa mari ŋariŋu maa gaatira, a yi teeku so ba n boona Adiriya la. Tunsuu n ti paa, ŋariŋu la duusiriba maa fe maa ti leelini duuri, 28ba naa kutiri wa ti bugsi koom maa limsim, o niŋi yaadi pisinaasi. A n ti niŋi beela, ba lee n bugsi, o niŋi yaadi pisita, 29ba fe, a koo ŋariŋu maa ni ŋme kugitintaasi, o gbinniŋi o chibi. A zu, ba nyisi kutiya anaasi, a basi o nyaaŋa, o da lee n chaŋina, ka suusi Naawunni beeg o chee. 30Niŋi n na, ŋariŋu duusiriba maa kpabira ba zo, ka che ti, a zu, ba yeli, ni ba ti nyisi ŋarimbila maa, a wa ti le kutiya, a niŋi ŋarintintaa maa yiya. 31Ama Pool yeli soojisi ni ba kpeema maa, ni ka dabsaa ka ŋariŋu maa puwa, ba ki baa. 32A zu, soojisi maa ŋmaasi ŋarimbila maa midaasi, o dolisi n gaari. 33Bee ya n ti chee, Pool yeli ba zaa, Zinaa n niŋi ya dapii ni anaasi, ka ya zora dabeem, ka bi dira seŋ. 34A zu, ya niŋi aniya di bindira, a nye kpeeŋu. Yamonsi, ya liŋini zaa ki nye daaŋu zaa. 35O n ti togsi n basi, o za ba zaa puwa, ka naa paanu, ka togsi Naawun saani, ka ŋma u ŋobira. 36Niriba maa zaa n ba kobsiyi ni pisiyapoin ni bayoobu nye zuuri duusigu, ka di bindira. 38Ba n di n piri, ba naa chiseesi n che, a lobi n niŋi koom niŋi, ŋariŋu maa du beela. 39A n kaa bee, ba nye kuŋkunni, ba mi bi baŋŋi u, ka lee n nye koom noori n mari tambisigu, ba kpabira ba mari ŋariŋu maa paa niŋi. 40A zu, ba seesi nyisi kutiya maa basi koom niŋi, ka ba seesi mi larigi midaasi yi seela ba n gbaa n duusira la, ka ba naa tanti yagili ŋariŋu maa yiya, o chaŋŋi n wa ti paa niŋi. 41Ba n wara maa, ka na bi paa duuri maa, ŋariŋu maa gbinniŋi to tiŋŋa, o yii firi, o chaŋŋi n je, ka koom maa n damtira la saami o nyaaŋa. 42Soojisi to jina ba ku diyooriba la, ba da li koom, a zo n gaari. 43Ka soojisi kpeema maa mi bi kpabira ba ku Pool, o yeli, ni ba da niŋi lala, ka yeli niriba maa zaa, ba seesi zaa n baŋŋi koom liibu, ba li n du, 44ka seesi n bi baŋŋi, ba gbaa ŋariŋu maa daari, a wa ti du duuri. Lala ti zaa niŋi n du kuŋkunni maa.

will be added

X\