Niŋinisim 25

1A n ti niŋi daba ayi, gomina ba n boona Fesita maa daa n ta paaligu maa niŋi, o wa ti ba Siiziriya daba ata, ka du n gaa Jiruusilim. 2Niŋi n na, buŋkobkuuriba kpemba ni Juusi dima kpemba yeli u, ni Pool daa n niŋina yabeeri, 3ka suusi u, ni o ti Pool ta Jiruusilim. Ba yelini n ŋa, a kpali bo, ba toni jina ba ti seesi sogi soori, ka o pa chena, ba yi n ku u. 4Gomina maa yeli, ni ba yoni Pool dii, a yi Siiziriya. A che daba ayi, m ni lee n pori n gaari, 5ya tumi dabsi, ba paasi ma gaari, ba wa ti sami u yabeseesi o n daa n niŋi la. 6Niŋi n na, gomina maa zi nisaaniŋi daba anii, koo dapiiya, ka wa ti sigi n gaari Siiziriya, ka Juusi dima seesi paag u gaari. A n kaa bee, o ti ba sari, o di Pool seriya, ka yeli soojisi, ba mari Pool ta. 7Ba mari u ta, Juusi dima maa nyisigi n yeli, ni o daa n niŋina yabeeri, ba mi ki tee n wusi, ni yela maa ba n togsira maa niŋini yamonsi. 8Ba n ti togsi n baasi, Pool mi nyisigi n togsi o toori, a yeli, M daa n bi saami Juusi dima zaaligu zaa, koo, a saami Naawun dii laanta, koo, a zagsi Aroom naaba zaaligusi. 9Gomina maa kpabira o maa Juusi dima maa puusi, o boosi Pool yeli, E kpabirini e gaa Jiruusilim, m wa ti di e seriya nisaaniŋi? 10Pool yeli, Aroom naaba daama zu n na e dira m seriya. Lala veela. E baŋiya, ni m bi niŋi Juusi dima yabee zaa. 11Ama ka m niŋini yabeso zu ba n kuura nira, ti ba ku ma. Ama ka m bi niŋi yabeso ba n yetira maa, e ki tee n naa ma ti ba. A zu, m suusirini Aroom naaba o di m seriya. 12Pool n yeli n ŋa, gomina maa ni o nandolibasi togsi yela maa, ka gomina maa yeli Pool, E suusini Aroom naaba, m ni ti e gaari o saani. 13A n daa n ti niŋi daba ayi, naso ba n boona Agipa, a ni o poga Baniisi ta, ba ti puusi gomina maa ba n boona Fesita maa, ka ti yuu. 14Niŋi n na, gomina maa togsi Pool yela, a wusi naaba maa, a yeli, Gomina so n pa m yii la daa n yo dabso dii, o na ba niŋi. 15Ni daa n we Jiruusilim, buŋkobkuuriba kpemba ni Juusi dima kpemba yeli ma daba maa yela, ni m di o seriya maa, o liya. 16Ma yeli ba, ni Aroom dima ki sagi maa, so zaa liya, ama o ni seesi n yetira, ni o niŋini yabee la laŋsi taaba, o nye daama fa o maŋŋa. 17A zu, ba seesi daa n ta kpe, a ti di daba maa seriya, ka m bi laŋŋi ba yuu. A n kaa bee, ma ti ba sari, ka ti ba mari daba maa ta. 18O n ta, niseesi n yeli o liya la nyisigi, a ti yeli yabeseesi o n daa n niŋi la. Ma fe maa, ba n di n yeli, ni o daa n niŋina yabeeri ga, ba n bi yeli, 19ka ba naa ba yaayela, a ni dabso ba n boona Yeesu la yela, a dira amore. Ba yeli, ni Yeesu daa n kpiya, ka daba maa mi yeli, ni o ba niŋi. 20A kpali m bi baŋŋi yaŋama gbina la zu, ma boosi daba maa, a koo, o n kpabira o we Jiruusilim, m wa ti di o seriya nisaaniŋi, 21o zagsi, ka suusi Aroom naaba o pa nye daama di o seriya. A zu, ma ti ba nyaasira u, ka m pa ti nye daama m ti o gaari Aroom naaba saani. 22O n togsi n baasi, naaba Agipa yeli u, M gba kpabirini m wumi daba maa noori puu yatoga. Gomina maa yeli u, Soosa e ni wumi. 23A n chee bee, soojisi nadima ni tiŋŋa maa kpemba laŋsi n wa ti paa naaba Agipa ni o poga Baniisi ba kpe zoŋtintaa maa puwa, a ni ba bimpinsuma wusigu. Ka gomina maa yeli, ni ba mari Pool ta. 24O n ti ta, gomina maa yeli, Naaba Agipa ni so zaa n ba kpe, ya nyaasi dabaa. A kpali o zu, Juusi dima zaa n ba kpe ni Jiruusilim puwa daa n suusi ma, a tasi n yetira, ni m da lee n ti o ba niŋi. 25Ama m daa n bi nye o yabee zaa ba n di n ku u, ka o gbagba suusi ma, ni m cheli, Aroom naaba o di o seriya. 26A zu, m ŋme sufu ba mari u gaari nisaaniŋi, m mi bi baŋŋi seema m di n sebi o yela, a tolimi Aroom naaba. A zu, naaba Agipa ni ya zaa, m mari u ni ta, ti zaa ti wumi o yela, ka m baŋŋi seema m di n sebi o yela. 27A kpali bo, m feni maa, ka e mari diyoora gaari, ka bi wa ti yeli yabeso o n niŋi, o lala yi bi veela.

will be added

X\