1 Daso ba n boona Pentikosi daari la n daa n ti paa, Yeesu nyaaŋpaariba maa zaa laŋsi taaba ziluŋko. 2 A puli maa niŋi ba wumini vu, a yi saazu, a maa sautintaa n vaara, a paali yiri maa zaa ba n zi la. 3 Ba mi nye binseesi, a maa bugum zulima, a yaari n zi ba zaa niŋi. 4 Ka Naawun sii paali ba zaa niŋi, ba togsira yatogseesi ba n bi wumina, ba vu duura. 5 A jemani maa, a yi Jiruusilim puwa, Juusi dabsi n zora Naawunni dabeem, ka yi tiŋsi ni baligusi durinye zaa puu la niŋi zoogirisim. 6 Ba nivudamta n ti wumi vu maa, ba we, a wa ti nyaasi, ka wumi seema Yeesu nyaaŋpaariba maa n togsira la, ba zaa wumi ba gbagba yatoga. 7 A ku ba noya, ba biina ba sufusi niŋi, ka boosira taaba, Pa Galili paaligu puu niribaa zaa yi? 8 A niŋini wula ti wumina ti gbagba yatoga? 9 Ti seesi yini Paatiya paaligu, seesi Miida paaligu, seesi Yiilami paaligu, seesi Mesopoteema paaligu, seesi Judiya paaligu, seesi Kapadoosa paaligu, seesi Ponta paaligu, seesi Asiya paaligu, 10 seesi Firiga paaligu, seesi Pamfiliya paaligu, seesi Yijipi paaligu, seesi Libiya paaligu see, a leeli Sariini tiŋŋa, seesi Aroom tiŋŋa, seesi Kiriiti paaligu, seesi Areebiya paaligu. Ti seesi niŋini Juusi dima, seesi mi bi niŋi, ka puusira Naawunni seema Juusi dima n puusira u. A ni lala zaa, ti so zaa wumina o gbagba yatoga, ba wusira mamaachi yaseesi Naawunni n daa n niŋi. 12 Lala ku ba zaa noya, ka damtira ba sufusi, ba boosi taaba yetira, N ŋa mi gbinni? 13 Ama seesi niŋi nyaaŋpaariba maa siya, a yetira, Ba ŋuni dapaala, a kuuna. 14 Niŋi n na, tumusi pii ni bayi maa daa n za, ba yindaana Piita tasi n yeli zamu maa, Dabsi n yi Judiya paaligu puwa, a ni seesi n ba Jiruusilim tiŋŋa puwa, m ya n yeli ya ni yaso, ya wumi. 15 Ya nyaasi dabsaa, seesi ya n yeli ba kuunini la, ba bi kuuna, boguu niŋi n na, nira zaa bi kuuna. 16 Yela ŋa niŋini seema Naawun chaame Joowe n daa n yeli, 17 ni durinye baasigu jemani Naawunni ni naag o sii ti baligusi zaa, ka ya biduusi ni ya bipunsi ba wusira Naawun yela, ka ya bipola ni ya dabkura ba zaasira zaasima. 18 Saŋa ŋa mini, Naawunni ni naag o sii ti o girunsi, dabsi ni pogiba, ba ti wusira niriba o yela. 19 Ka o niŋi mamaachi yela, a yi saazu ni tiŋŋa, ba nye. Zeem, bugum, a ni wusi ni ba niŋi, 20 ka wuluŋu pili, ka ŋmeriga loobi bumooŋu, a ŋmaani zeem, poin ka ti duuma daborigu la ta. 21 A jemani la ti duuma ni moligi so zaa n suusira u. 22 Niŋi n na, Piita lee n yeli, Ya Juusi dima, ya lee n wumi m yatoga ŋa. Ya baŋiya, ni Yeesu daa n yini Nazire tiŋŋa puwa, ka daa n ba ya puwa, ka Naawunni ti o tumi tumtintaasi, a ni mamaachi yela, niriba ba baŋŋi, ni o peri Naawunni. 23 Seema Naawunni n daa n le, ka baŋŋi ya n ya n niŋi, ka ya niŋi, a ti nivubeeri gbaa Yeesu, a kpa u tabi daa, o kpi, 24 ka Naawunni nyisigi u, a yi o beerim kum niŋi. A kpali bo, kum maa bi tee n ti o da nyisigi. 25 O yela n na naaba Dawuda daa n yeli kusu zaa la, a yeli, Taaru zaa m nyaara m duuma, o leeli ma, o ba niŋi m nudiya, m da dammi. 26 A zu, m sufu peligiya, ma togsira sufupeeli yatoga, ka marini tama, a yi durinye ŋa puwa. 27 A kpali bo, m baŋini maa, e ki zagsi m sii basi kpiinsi ziya, e mi ki ti e nivusuŋŋu maa niŋa poo. 28 E daa n wusi ma nyevuri yela, ka e ni lee n ti ma sufupeelim ga. A kpali bo, m ni ni ya n ba niŋi zu. 29 Niŋi n na, Piita lee n yeli, M yidima, m ya n yeli ya ni ti yaa naaba Dawuda yela, ya wumi. Kusu zaa o daa n kpiya, ba pi u, ka o kaa maa na ba niŋi. 30 O mi daa n niŋini Naawun chaame, ka baŋŋi maa, Naawunni ti u noori, ni o yaŋsi yindaana ni lee n di o naalim maa. 31 ?ama n na naaba Dawuda daa n baŋŋi yaso n ya n niŋi, ka togsi seema Naawunni n ki zagsi Kristu sii maa basi kpiinsi ziya, ama ka nyisigi u kum puwa, o niŋa o da poo. 32 Lala Naawunni daa n nyisigi Yeesu, ka ti mi loobi n niŋi o dansiyasi. 33 Pimpariŋa Naawunni tini Yeesu daama o zi o nudiya, ka Naawunni mi daa n ti Yeesu noori, ni o ni naag o sii ti u, ka pimpariŋa Yeesu mi dee sii maa, ka naa n tira niriba, a taasi yaseesi ya n nyaara, ka wumina ŋa. 34 Ya lee n nyaasi. Naaba Dawuda n daa n kpi, o bi du saa. Ama o n daa n ba niŋi, o daa n yeli, Duuma yeli m duuma, Zi m nudiya, 35 m ti nyaŋŋi e dindima zaa ti i. 36 Piita lee n yeli, A la zu, cheli Juusi dima zaa, ba baŋŋi maa, Naawunni naa Yeesu, so ya n daa n ku la, a loobi duuma ni Kristu. 37 Zamu maa n wumi seema Piita n yeli la, a tiri ba ga, a yi ba sufusi niŋi, ba yeli Piita ni tumusi maa zaa, Ti yidima, wula ti ya n niŋi? 38 Piita yeli ba, Ya cheli ya yabeeri niŋinisim, ka dee Yeesu Kristu yela, ka ti su ya koom. Ka ya niŋi n ŋa, Naawunni ni che ya yabeeri paŋŋi ya, ka naag o sii ti ya. 39 Ya nye, Naawunni daa n ti noori, ni o ya n naani o sii ti ya, a ni ya biisi, a ni seesi n ba wogila, a ni niso zaa o n ya n booli. 40 Piita n yeli n ŋa, o togsi yadamta paasi, ka lee n yeli ba, Ya niŋina aniya, a nyisi ya zuuri, a yi nivubeeri ŋa niŋi. 41 Dindaari maa nivudamta dee Piita yatoga maa di, ka tumusi maa su ba koom. Ba niŋini niriba tusa ata, 42 ka yi wara tumusi maa saani, ba wusira ba Naawun yela, ka ŋma paanu ŋobira, a teesira Yeesu kum yela, ka togsira Naawun saani. 43 Niŋi n na, dabeem gbaa niriba zaa, ka Naawunni ti o tumusi maa ba niŋina mamaachi yela ga. 44 Seesi n dee yela maa loobi liŋini, ka tori bini tira taaba. 45 Ba seesi n mari bindaalim yi koosi a, ka nye n ti seesi n bi mari. 46 Taaru ba yi laŋsini Naawun dii, ka mi laŋsi ba yiya, a ŋma paanu ŋobira, a teesira Yeesu kum yela, ka dira bindira, a ni pupeelim, 47 ka kpeesira Naawunni, a ni sufusuŋŋu, ka ba yaniŋisa petira niriba zaa. Taaru zaa Naawunni yi ti seesi o n moligira la zoo n paasira.
