Niŋinisim 17

1Ba n wara maa, ba daa n wa ti saa Afipoli tiŋŋa ni Apoloona tiŋŋa, ka paa Tesalonika. Juusi dima laŋsigu dii ba nisaaniŋi, 2ka Pool, seema o yi n niŋina la, o wa ti kpe dii maa wusira niriba. Niŋi n na, daborisi ata, Pool wa ti kpe n nyisi Naawun buku gbinni wusira ba, 3a yetira, ni o daga maa, Kristu so kusu zaa Naawunni n daa n yeli o ni tumi la nye nam kpi, ka nyisigi kum puwa. Ni Yeesu so yela o n togsira ŋa n niŋi Kristu maa. 4Niŋi n na, Juusi dima maa seesi dee yela maa di, ka Giriiki dima seesi n puusira Naawunni seema Juusi dima n puusira la ni tiŋŋa maa kpemba pogiba, ba nivudamta mi deeg a di, ka paasi Pool ni Sayila niŋi. 5Ama Juusi dimseesi mari pubeerim, ba laŋsi nivubeeri n ka waali ba ti niŋi zamu, a tasira tiŋŋa maa zaa puwa, a ni suya, ka we Jeesin dii, a wa ti kpabira Pool ni Sayila, ba mari ba yi n ti ti zamu maa. 6Ba n kpabi ba je, ba gbaa Jeesin ni Yeesu nyaaŋpaariba seesi kpeeŋutiri, a wa ti ti tiŋŋa maa kpemba, ka tasi n yeli ba, ni dabseesi n taasira zabiri seela zaa tani kpe, 7ka Jeesin dee ba, ka ba zaa zagsi Aroom naaba zaaligusi yeli, ni nayindaana ba n boona Yeesu ba niŋi. 8Kpemba maa ni tiŋŋa maa naaba n ti wumi yela maa, o tiri ba ga, 9ba ti Jeesin ni o taaba digili ligiri, ka ti ba kuli. 10O yiiŋu nyaaŋpaariba maa ti Pool ni Sayila yi tiŋŋa maa puwa, a gaa Biriya. Ba n wa ti paa nisaaniŋi, ba kpe Juusi dima laŋsigu dii puwa, 11ka Juusi dima maa kpabira ba baŋŋi Yeesu yela, a gaari Tesalonika Juusi dima. Taaru zaa ba karimina Naawun buku, ba baŋŋi, ni Yeesu yela niŋi yamonsi, koo jiri. 12Ka ba nivudamta ni Giriiki nivudamta, dabsi ni pogkpemba dee yela maa di. 13A jemani maa Juusi dima maa n ba Tesalonika wumi maa, Pool n wusira Yeesu yela yi Biriya, ba we niŋi, a wa ti taasi zamusi ba niŋina waliwali. 14A puli maa niŋi, nyaaŋpaariba maa n ba Biriya la ti Pool kpe ŋarintintaa gaari, ka che Sayila ni Timoti. 15Ka seesi n beena Pool yi ŋariŋu maa puu la mari u gaa Atani tiŋŋa, ka Pool tumi ba, ni ba pori n wa ti yeli Sayila ni Timoti, ba ta yoom. 16Pool na n ba Atani tiŋŋa puu la, a gutira Sayila ni Timoti, o daa n nye, ka tiŋŋa maa mari wunasi ga, o sufu saami u ga. 17Taaru zaa o yi we laŋsigu dii, a wa ti mari Juusi dima ni baliguseesi n puusira Naawunni la dira amore, ka yi lee n we daa puu wa ti wusira niriba, o ni ba yi dira amore. 18Dindaso karichiseesi ba n boona Apikuuri dima ni Sitooka dima paa Pool, ka o wusira Yeesu yela, ba seesi yeli taaba, Wula n na dabso n togsira ga ŋa togsi n yetira? Seesi yeli, A niŋini maa, o n togsira saamba Naawun yela. Ba yelini lala, a kpali Pool n wusira Yeesu yela, seema o n kpi, ka Naawunni nyisigi u kum puwa. 19A zu, dabsi maa mari Pool gaa zoyindaana ba n boona Are zu, ka yeli u, Ti wumini e n wusira yapaala, ka kpabira ti baŋŋi a gbina, wusi ti. 21Ba yelini lala, a kpali bo, Atani dima zaa ni ba saamba zaa bi kpabira ba niŋina seŋ, ka pa yatogipaala wuminisim. 22Niŋi n na, Pool za niriba maa sunsuu niŋi, ka yeli, Ya Atani dima, m pa baŋŋi ya n puusira ya wunasi ga. 23Ni gaa n chaŋina tiŋaa puwa, a nyaasira seelasi ya n puusira ya wunasi maa, m nyeni kugitintaa, ka ba sebi o niŋi, So ti n bi baŋŋi la toori. So ya n puusira, ka bi baŋŋi u maa, ma ta m ti wusi ya la. 24Naawunni n na, ka daa n maali durinye ni binseesi zaa n ba niŋi, ka niŋi duuma yi saazu ni tiŋŋa. O mi bi doora diseesi nisaaldima n meera maa puusi, 25ka tumseesi nisaaldima n tumi n tira u bi moligira u. A kpali bo, wune n tira nisaala zaa nyevuri ni vuusim ni bini zaa, 26ka kusu zaa o daa n naa nivuluŋko maali baligusi zaa n ba durinye ŋa puwa, ka ti ba ba paaligusi ni ba saŋasi. 27O niŋini lala, niriba ba nyaasi n kpabira u, ka pa ti baŋŋi o yela. Ti ni nu zaa mi leeli taaba, 28a kpali o n tira ti kpeeŋu, ti ba niŋi, a vuusira, ka chaŋina. A maa seema ya yiima sebiriba n daa n yeli, Ti niŋini o biisi. 29A kpali ti n niŋi Naawun biisi la zu, ti da feera maa, Naawunni niŋini maa suga, koo kutiri, koo kugiri, koo bunso zaa nisaala n maali. Lala n na niriba daa n feera, ka Naawunni muuri ba feebu maa. 30Ama pimpariŋa o yeli so zaa, ni ba dee ba saamiya. 31O mi zaali daa, dindaso o n di n naa dabso o n nyisi la o di durinye zaa seriya, a ni yamonsi. O nyisigini daba maa yi kum puwa, so zaa ba baŋŋi maa, seriya diibu maa ni niŋi. 32Wuminiba maa n wumi o n yeli dabyindaana kpini, ka Naawunni nyisigi u yi kum puu maa, seesi la u, ka seesi mi yeli, ni ba ni lee n ti wumi o yela. 33Niŋi n na, Pool yi ba puwa, 34ka niseesi pa o zu, ka dee yela maa di. A yi ba puwa, dabso ba niŋi, ba boona u Diyonusi, ka o mi niŋi zoo maa yambaŋiniba yinni, ka pogiyindaana ba n boona Damari mi ba niŋi.

will be added

X\