Niŋinisim 15

1Dindaso dabseesi daa n yi Judiya paaligu sigi n ta Antiyo, ba ti wusi nyaaŋpaariba maa, ka yeli, ni ka ba bi ŋma ba yoya seema Musa n daa n yeli la, Naawunni ki nyisi ba yi ba yabeeri niŋi. 2Ba ni Pool ni Baanaba di amore ga. A zu, nyaaŋpaariba maa tumi Pool ni Baanaba ni seesi, ni ba gaari Jiruusilim, a wa ti wumi o yamonsi, a yi tumusi ni chaachi kpemba la saani. 3Ba n wara la, ba dee Foniisiya ni Samaariya paaligusi wara, ka wusira Yeesu nyaaŋpaariba seema baligusi n dee Yeesu yela di, nyaaŋpaariba maa puusi peligi ga. 4Pool ni Baanaba n wa ti paa Jiruusilim, chaachi dima ni tumusi maa ni kpemba la puusi ba, ka ba yeli ba yaseesi zaa Naawunni n paasi ba, ba niŋi. 5Ama Farisii dimseesi n dee Yeesu yela di la nyisigi n yeli, ni ka ba bi ŋma baligusi yoya, koo, ba bi paara Musa zaaligusi zu, Naawunni ki nyisi ba yi ba yabeeri niŋi. 6Niŋi n na, tumusi maa ni chaachi kpemba maa laŋsi, ba baŋŋi yela maa niŋi. 7Ba n togsi n yuu ga, Piita nyisigi n yeli ba, M yidima, ya baŋŋi maa, saŋa la Naawunni daa n nyisi ma ni, m togsi Yeesu yela wusi baligusi dima, ba sagi n pa. 8Naawunni baŋŋi so zaa sufusi, ka daa n naag o sii ti ba seema o n daa n naa n ti ti la. 9O bi gamsi ti ni ba zaa, a nyisi ba yi ba yabeeri niŋi, a kpali ba n niŋina u yeride la zu. N ŋa la zu, o naa ti ni ba loobi liŋini. 10A zu, ka ya zagsi seema 11Ama ti baŋiya maa, ti duuma Yeesu ni naag o barika ti ti ni ba zaa, a moligi ti zaa, a yi ti yabeeri niŋi. 12Piita n ti togsi n baasi, seesi n ba niŋi maa zi surim, ka wumi Baanaba ni Pool n togsi seema Naawunni n paasi ba niŋi, ba niŋi tumtintaasi ni mamaachi yela, a yi baligusi puwa. 13Ba n ti togsi n baasi, Jeemsi yeli, M yidima, ya wumi. 14Simon Piita tee n yeli ti seema Naawunni n daa n daŋŋi n nyisi baligusi dima, ba loobi n pa o zu la. 15Lala yela n na Naawun chaamesi daa n sebi kusu zaa, a yeli, 16ni Naawunni yeli, ni dindaso o ni pori n ta, a ti lee n me naaba Dawuda yiri dikogirisi maa, a maali a nene, 17baligusi zaa, ba seesi zaa o n booli maa, ba ni ti kpabi u. 18Lala wune Naawunni n daa n yeli kusu zaa. 19A zu, m toori niŋi, ya da ti ti namsira baliguseesi n dee Naawun yela ŋa, 20ama ya sebi n ti ba, ba chisira bindirigu zaa ba n naa n ti wunasi ni bugasi, ka da kpabira taaba pogiba ni siriba seema baligusi n kpabira la, ka chisira binseesi n bi korigi, a ni zeem. 21A kpali bo, kusu zaa ti yini zinni, a yi tiŋŋa zaa puwa, seesi ba niŋi wusira Musa zaaligusi, ka daborigu zaa ba karimina o yela yi laŋsigu diisi puusi. 22Jeemsi n ti togsi n baasi, tumusi maa ni kpemba maa ni chaachi dima zaa daa n fe maa, o veela ba n di n nyisi dabseesi, a yi ba puwa, a tumi ba ni Pool ni Baanaba, ba gaa Antiyo. A zu, ba nyisi Juudasi Baasaba ni Sayila, ba mi niŋini chaachi maa yipaariba bayi, 23ka sebi gbaŋaa n lee n pa la tumi ba, ba gaari, Ti taaba n yi baligusi n ba Antiyo tiŋŋa ni Siriya ni Silisiya paaligusi puu la, tirima tumusi ni chaachi dima kpemba puusira ya. 24Ti wumiya maa, niseesi yini kpe we ya saani, a wa ti togsi n saamina ya sufusi. Ti bi yeli ba ba yeli seema ba n yeli maa. 25A zu, ti zaa feni maa, yasuŋŋu n na ti nyisi dabsi yi ti puwa, a ti ba ni Baanaba ni Pool ba ta ya saani. 26Baanaba ni Pool yi kpabirini ba tumina ti duuma Yeesu Kristu, ka ti mi kpabira ba. 27Dabsi maa ti n nyisi maa n niŋi Juudasi ni Sayila, ka ba ti ta, ba ni yeli ya seema ti n sebi kpe, 28ni ti ni Naawun sii sagi n yeli, ya da lee n naa yatooma zaa paasi yaseesi n daga ti n ya n yeli ya ŋa niŋi, 29ni ya chisira bindira zaa ba n naa ti wunasi ni bugasi, ka chisira zeem, a ni buŋkobseesi ba n bi korigi, ka da kpabira taaba pogiba ni siriba seema baligusi n kpabira la. A veela ya niŋina yaŋama ŋa. Ti baasiya. 30Niŋi n na, Pool ni Baanaba ni dabsi maa yi n sigi n gaa Antiyo, a wa ti laŋsi chaachi dima, ka naa gbaŋŋu maa ti ba. 31Ba n ti karimi gbaŋŋu maa, ba puusi peligi, a kpali bunso ba n yeli ba niŋi maa zu. 32Ka Juudasi ni Sayila mi niŋi Naawun chaamesi, ka duusi nyaaŋpaariba maa zuuri niŋi, ka ti ba mari dabilim. 33Dabsi maa n ti yuu beela nisaaniŋi, nyaaŋpaariba maa beeli ba soori, ba pori n gaa Jiruusilim, a wa ti puusi seesi n daa n tumi ba la, 35ka che Pool ni Baanaba yi Antiyo puwa, ba ni nivudamta wusira duuma yela. 36A n ti niŋi daba ayi, Pool daa n yeli Baanaba, Cheli ti wa ti puusi ti taaba, a yi tiŋsi zaa ti n daa n wusi ti duuma yela, ba dee la. 37Baanaba mi kpabira o mari Jon Maaki gaari, 38ka Pool mi fe maa, o bi maali o n di n paa ba gaari, a kpali bo, ba n daa n wara, ka wa ti paa Pamfiliya paaligu la, o kulini, ka che ba, ba tumina ba tuma maa. 39Yela maa loobi ba naŋgbana ayi, ba barigi taaba, Baanaba mari Maaki ba wa ti kpe ŋarintintaa gaa Sayipira paaligu, 40ka Pool mi nyisi Sayila, o ti paag u gaari, ka nyaaŋpaariba maa suusi Naawunni o nyaasira ba, 41ka ba yi n chaŋina Siriya ni Silisiya paaligusi, a duusira chaachi dima maa zuuri.

will be added

X\