1 A jemani maa tumusi maa ni nyaaŋpaariba n ba Judiya paaligu puu la wumiya maa, baligusi maa mi deeni Naawun yela di. 2 A zu, Piita n ti du n gaari Jiruusilim, nyaaŋpaariba maa seesi n kpabira niriba zaa ba ŋmaara yoya la zabi u, 3 a yeli, Bo n na e wa ti kpe dabseesi n bi ŋma yoya la saani, a dira? 4 Piita nyisi yaso n daa n niŋi maa yeli ba, 5 M daa n bani Jopa tiŋŋa puwa, a togsira Naawun saani, ka zaasi zaasim nye wajetintaa, ba gbaag o naŋgbanpiima anaasi, ka mari u yi saazu, a sigi n ta m saani. 6 Ni nyaasi nene, m nyeni yiri buŋkobiri ni moo puu buŋkobiri ni tiŋvuurigusi ni niinsi, 7 ka ma wumi goo n yeli ma, Piita, nyisigi n ku n ŋobi. 8 Ma yeli, M duuma, akayi, m na bi di bunso zaa Juusi dima n chisira. 9 Goo maa lee n togsi buyidaana, a yi saazu yeli, Da chisira bunso Naawunni n naa n ti i, ni e di. 10 Yela maa niŋini lala buta, ka bini maa zaa lee n du saazu. 11 A puli maa niŋi, dabsi bata paa diso ni be la. Ba tumi ba ni, a yi Siiziriya, ba ta m saani. 12 Halli ka ba baligu kurini, Naawun sii yela ma, ni m paa ba gaari. A zu, ma we, ka nyaaŋpaariba bayoobu ŋa paa ma wa ti kpe dabso n booli ma maa yiri, 13 ka daba maa yeli ti, ni o nyeni malaki n za o dii, ka yeli u, ni o tumi ba gaa Jopa wa ti booli Simon, so ba n boona Piita la, 14 o ti yeli u seema o ni o yiri di n niŋi, ka Naawunni o naa ba yabeeri che n paŋŋi ba. 15 Niŋi n na, ka ma piili n togsira ba saani, Naawun sii kpe ba niŋi, seema o n daa n kpe ti niŋi la, 16 ma teesi kusu zaa ti duuma n daa n yeli ti, ni Jon Baatisi suura niriba koom, ka Naawunni wune ni naag o sii ti ti. 17 Ya nyaasi. Seema ti n daa n dee Yeesu yela maa di la, ka Naawunni naag o sii ti ti la, lala n na o naa n ti ba gba. A zu, ka m zagsi bunso Naawunni n wusi ma maa, o veela? 18 Nyaaŋpaariba maa n wumi Piita n yeli n ŋa, ba cheli zabirisim, ka kpeesi Naawunni yetira, Jaa Naawunni lee n ti baliguseesi ba dee ba saamiya, ka nye nyevuri. 19 Jemanso ba n daa n ku Sitiivin, ka ba namsira nyaaŋpaariba maa ga, ba yi n yaari la, seesi daa n paa Foniisiya paaligu ni Sayipira paaligu ni Antiyo tiŋŋa, a togsira Yeesu yela, a yi Juusi dima ko saani. 20 Ama nyaaŋpaariba dabseesi n yi Sayipira paaligu ni Sariini tiŋŋa paa Antiyo tiŋŋa, ka togsi Yeesu yela, a wusi baliguseesi niriba, 21 ka ti duuma ti ba nivudamta deeg o yela di. 22 Niŋi n na, Jiruusilim chaachi dima ti wumi yela maa, ka tumi Baanaba, o we Antiyo, a wa ti nye. 23 O mini n wa ti paa niŋi, o nyeni seema Naawunni n naa barika tira chaachi dima maa. O sufu peligi ga, ka o duusi ba zuuri niŋina, ba naa duuma maa yela loobi ba sufu niŋi yela, ka da zagsi u. 24 O gbagba niŋini nivusuŋŋu, ka Naawun sii ba o niŋi ga, ka o niŋina Naawunni yeride ga. Niŋi n na, nivudamta dee duuma yela nisaaniŋi di. 25 A zu, Baanaba yi Antiyo gaa Taasa wa ti kpabi Sool. 26 O n nye u, o mari u pori n ta Antiyo puwa, o ni nu, ba ti wusira niriba maa. Ba yumgunni ba wusira chaachi dima maa nivudamta. Antiyo puu n na ba piili n booli Yeesu nyaaŋpaariba Kristu dima. 27 A jemani maa Naawun chaamesi daa n yi Jiruusilim sigi n ta Antiyo puwa, 28 ka Naawun sii taasi ba yindaana ba n boona Agaba o yeli, ni kom ni li durinye paaligu zaa. Niŋi n na, kom maa daa n li, a yi jemanso Kiloodiya n daa n niŋi Aroom dima naaba. 29 Kom maa n daa li maa zu, nyaaŋpaariba maa n ba Antiyo puu la lobi ligiri seema ba n nye, a wa ti ti ba taaba la n ba Judiya paaligu puwa. 30 Ba naani ligiri maa ti Baanaba ni Sool ba wa ti ti Judiya chaachi kpemba.
