Timoti ayidaana 3

1Lee n nyaasi, poin ka ti duuma pori n ta, niriba ni nye nam ga, 2a kpali bo, niriba ni kpabira ba kiperi, koo ligiri, koo, a poo, koo, a kpalimina, koo, a tuura Naawunni, koo, a bi tira ba niriba jilima, koo, a ka bunye, koo, a bi kpabira Naawun yela, 3koo, a bi lee n kpabira ba niriba, koo, a bi sagira maa, ba liya, koo, a tuura niriba, koo, a nyisigira suuri yoomyoom, koo, a mari halibee, koo, a chisira yasuma, 4koo, a koosira ba taaba, koo a niŋina yabeeri yoomyoom, koo, a feera maa, ba baŋŋi bunso zaa, koo, a kpabira durinye puu yela, ka bi kpabira Naawun yela, 5koo, a niŋina maa seesi n tumina Naawunni, ama ba yaniŋisa wusira maa, ba bi mari daamaso Naawunni n tira. Da paara niriba ŋa zu. 6Ba seesi wa ti bani yiyasi, a yomsira pogseesi n ka yam. N ŋa pogiba paara yadamta zu, ka ba yabeeri mi tiri ba ga, 7ka ba yi wumi seema yomsiriba maa wusira maa, ama ba mi ki tee n baŋŋi yamonsi nene. 8Seema kusu zaa Yane ni Yambire n daa n bi sagi n paara Musa zu la, lala n na dabsi ŋa gba mi bi paara yamonsi zu, ka yi feera feribeeri, ka seema ba n wusira Yeesu yela bi veela, 9ama ba ki tee n yomsi nivudamta, a kpali bo, niriba zaa ni baŋŋi maa, ba wusira zoltiri yela, a maa seema kusu zaa ba n daa n baŋŋi dabsi bayi maa yela la. 10Nyaasi, e baŋŋi seema ni wusira, ka niŋina, ka kpabira, ka niŋina Yeesu yeride, ka mari kenyiti, ka kpabira niriba, ka bi zagsira, 11ka nyaara nam, ka seema ba n daa n namsi ma ga, a yi Antiyo tiŋŋa puwa, a ni Ikoniyo tiŋŋa puwa, a ni Lisita tiŋŋa puwa. E baŋŋi nam maa zaa, ama ti duuma daa n moligi ma, a yi ba zaa niŋi. 12Yamonsi n na, so zaa n kpabira o tumina Naawunni, a ni Yeesu Kristu, ba ni namsi u. 13Ka yabeniŋiniba ni yomsiriba ni loobi n niŋina yabeeri gaa ga, a yomsira ba taaba, seema Sitaana gba n yomsira ba gbagba la. 14Ama nyi wune, moo nufu na paara yaseesi e n daa n wumi, ka dee nene la zu, a kpali bo, e baŋŋi niseesi n daa n wusi i la, 15ka lee n baŋŋi seema e n daa n niŋi biya, ka baŋŋi Naawunni buku la. Naawun buku maa ni tee n wusi niriba seema ba n di n tee n niŋi Yeesu Kristu yeride, a nye moligirisim. 16Nyaasi, Naawunni daa n ti ba sebi o buku maa zaa, ka buku maa wusira yamonsi, ka wusigu maa kpaasira yabeniŋiniba tuba, ba da lee n niŋina n ŋa, ama ba loobi n bamsira Naawun yela niŋinisim. 17Lala n na, Naawun buku ti niso n paara o zu o mari daama niŋina yasuma zaa.

will be added

X\