Tesalonika ayidaana 3

1Ti taaba, ya suusira Naawunni tira ti, ti ti mari daama ga, a wusira ti duuma yela, niriba ba deeg a dira, seema ya gba n daa n deegira a la. 2Ka ya lee n suusira u, o moligira ti, a yi nivubeeri puwa. A kpali bo, pa so zaa n deegira ti wusigu ŋa. 3Ama ti duuma ki cherigi o sufu, ka ni ti ya mari tama, ka moligi ya, a yi Sitaana niŋi. 4Wune ti duuma ti ti mari tama maa, yaseesi ti n yetira ya ŋa, ya niŋina a ni, ka ki zagsi a. 5O ti ya kpabira taaba seema Naawunni gba n kpabira ya, ka ti ya mari kenyiti seema Kristu n mari la. 6Ti taaba, a yi ti duuma Yeesu Kristu niŋi, ti yetira ya ni, ni ya giligira ya taaba seesi zaa n mari zinyagiri, ka bi tumina seema ti n daa n wusi ya la. 7Ka ya baŋŋi maa, o daga ya niŋina seema ti n daa n niŋina la. A kpali bo, ti n daa n ba ya saani, ti daa n ka zinyagiri, 8ama ka ti daa n dira so zaa bindira, ti daa n yoora u samini. Lala zu ti daa n tumina tuma wuntooŋu ni yiiŋu, ti ti nye ligiri maa, a da ti ya so zaa nyaara nam. 9Ama ka ti daa n dira ya bindira la, o veela samini ka niŋi, ama ti daa n yi yoora samini, ti ti wusira ya maa, o veela ya tumina tuma. 10A zu, ti n daa n ba ya saani la, ti daa n yetira ya maa, ka so zaa n zagsira tuma, o bi daga o n dira. 11Ka ti wumini maa, ya seesi marini zinyagiri, ka bi tumina, ama ka chaŋina foifoi. 12Ba da niŋina n ŋa, ama ba moo nufu tumina nene, a nyaara ba gbagba bindira, ka ba boin, a kpali ti duuma Yeesu Kristu la zu. 13Ti taaba, ya moo nufu, a yi niŋina yasuma. 14Ya nyaasi, ka so zaa zagsi seema ti n sebi n yeli ya n ŋa, ya baŋŋi a daana, ka giligira u, vi o gbaag u. 15Ama ya da niŋi u maa ya dimma, ama ya wusi u yam, a maa nira ni o sunzo. 16Ti duuma, so n tira niŋgbirimaasim la, o ti ba ya zaa saani, ka tira ya niŋgbirimaasim maa jemanso zaa. 17Mani Pool gbagba naa m nuu sebira puusigu ŋa. N ŋa n na ma sebira, a yi m gbana zaa. 18Ti duuma Yeesu Kristu ti ya zaa barika.

will be added

X\