1 M taaba, gbaŋaa n paasira gbana ayidaana ni sebi n tira ya, ka a yi a zaa niŋi, m yeli ya, ya moo nufu, 2 a teesira yaseesi Naawun chaamesi n daa n yeli, ni a n di n niŋi la, a ni yaseesi ti duuma, so n niŋi moligira la n daa n wusira, ka ya tumusi mi daa n naag a wusira ya. 3 Yinni, o veela ya baŋŋi maa, a yi baasigu jemani, siya niŋiniba ni niŋina yabeeri, ka niŋina ya siya, 4 a yetira, ni ya duuma daa n ti noori maa o n di n lee n ta, ni o ba ya? Halli ti badima tee n kpi, yaso zaa na bani maa seema a n daa n ba niŋi, a yi durinye ŋa piiligu, a ti paa zinni. 5 Ba n togsira n ŋa, ba bi kpabira ba teesira maa, kusu zaa la Naawunni daa n naag o daama maali saazu ni durinye ŋa. Durinye ŋa o daa n naa koom maali, 6 ka, a yi Nuhu jemani la, o daa n ti koom paali n di u, 7 ka o ni lee n naag o daama, a kusi saazu ni durinye ŋa zaa bugum, a yi seriya diibu daari maa, ka seesi n bi paara o zu ni nye tubiri darigirisim ga. 8 Ama m taaba, ya da tami maa, a yi ti duuma saani, dindaluŋko niŋini maa yuma tusiri, ka yuma tusiri mi niŋi maa dindaluŋko. 9 A zu, halli ka seesi yetira, ni ti duuma nagimina, a yi o notiibu maa niŋi, o bi nagimina. Ama o yi mari kenyiti ya saani, a kpabira so zaa o zagsi o yabeeri niŋinisim, a da we bugum ziya. 10 Ama ti duuma taabu daa maa ni ta maa tayugu, so zaa ki baŋŋi maa, o ya n tani. A yi jemani maa saazu zaa ni baasi, a ni vu ga, ka bugum ni di ŋmeribiisi, a ni durinye ŋa, a ni bunso zaa n ba o puwa. 11 A kpali bini ŋa zaa n ya n baasi n ŋa, o veela ya n paara Naawun zu nene, a ni yasuma zaa, 12 a gutira daso Naawunni di n di so zaa seriya la, ka ti daa maa o paa yoom. Seriya diibu maa zu, bugum ni di saazu ni bunso zaa, a nyeligi n baasi. 13 Ka seema ti duuma n daa n ti noori la ti mi gutira saazu paali, a ni durinye paali, seela yasuma ko n ba niŋi. 14 A zu, m taaba, ya na n gutira seriya diibu daa maa, ya niŋi aniya, ka o pa ti paa, o da nye ya yabee zaa, ama niŋgbirimaasim. 15 Ka seema ti duuma n mari kenyiti, a na bi ta la, ya ti o niŋi maa ya moligirisim. Lala n na ti todaana Pool daa n naa yamso Naawunni n daa n ti u la sebi yela ŋa ti ya, 16 seema o yi n sebira, a yi o gbana maa zaa niŋi. Ti baŋiya maa, yaseesi o n daa n sebi maa gbina ba toom ga, ka niseesi n ka baŋinisim, a ni niseesi n bi dee Naawun yela nene, ba cherigira a gbina, a ni Naawun buku zaa. Lala n na ba koŋŋi moligirisim. 17 Ama, m taaba, ya tee n baŋŋi yela ŋa, a zu, ya dasi ya maŋsi niŋi, a da ti nivubeeri yomsi ya. A kpali bo, a ni ti ya da lee n paara Naawun zu nene. 18 Ka ya bamsira ti duuma Yeesu Kristu, so n niŋi ti moligira la yela, ka dee barikaso o n tira la. Naawunni ti u yuuri duubu pimpariŋa, a wara saŋa ni saŋa zaa.
